Net oppertied veur `t vestelaovessezoen.
Vaste deilnaemers van `t LVK zeen al jaore Harrold en Ron van La Bamba. Ouch dit jaor zitj d'r weer `n inzending in mit dit nuuj leedje Vaste♥ndj 4Ever. Jao, geer laestj `t good: d'r steit ''vaste-love-ndj'' en det ''love'' sjreive ze dan es `n hertje. Veer zeen benuujd wie döks det dit door de browsers wuurtj waergegaeve es: ''Vasteë¿ndj'' of zoeaget. Waal leuk bedach.
Laes wiejer
Maak van twieë aaj kuuj zès.
Tiedes de raodsvergadering vanne gemèndje Roerdale van vandaag leet raodslid Henk van der Linden zich weer `ns van ziene bèste kantj zeen. Oppen agenda stóng namelik de tiejelike weuninge waat in Postert en Mofert nag geboewdj motte gaon waere. De rechter tikdje `t kolleesj oppe vingers, ómdet ze de procedure veur de ómgaevingsvergunning neet juus haw gevolg. Ten ónrechte mèndje zie det mit ein ''verklaoring van gein bedinkinge'' geliek veur alle locaties kós waere beslaote. De rechter oeardeildje det det neet juus waas en det det per locatie mos waere gedaon. Daoróm waerdje `t veurstèl nans nao de raod gesjik. `n Formaliteit natuurlik, ómdet d'r breije raodssteun is veur de gekaoze locaties.
Laes wiejer
Mofert blief neet onbespraoke.
80 jaor bevriejing. Veer motte d'r in Mofert nag 4 maondj op wachte: op 23 januari 1945 waerdje Mofert pas bevriedj. Mer aafgeloupe donderdig, 12 september waerdje 80 jaor geleje `t ieëste dörp van Nederlandj bevriedj: Mesch inne gemèndje Eisde-Mergraote. Belangriek genóg veur `t keuningspaar óm nao oos provincie aaf te reize.
Laes wiejer
Nao 12 jaor börgemeistersjap.
Vandaag, oppen ieësten daag van `t politiek jaor, maak Börgemeister De Boer-Beerta van Roerdale bekindj det zie volgend jaor de ambskitting ane wilge geit hange. Op 1 juli löp haore twieëdje ambstermien aaf en zie geit neet door veur `ne volgende termien. De VVD-bestuurster is dan 12 jaor börgemeister van Roerdale gewaes. Veur daen ties waas zie raodslid, wèthajer en locobörgemeister van de Gelderse gemèndje Buren.
Laes wiejer
De Griekse tragedie in Peries
Kómkómmertied is weer bezig. Waat zèk ich? `t
Is al `n half jaor kómkómmertied in Mofert. Planne veur windjmeules lègke naeve
`t PVV-pertieprogram innen
ieskas. D'r wuuertj serieus getwiefeltj
euver `t rendement van zon-op-landj. En wie zitj `t mit die tiejelike weuninge?
Dao steit nannieks. Nieks nuuts ónger de slaagsjeem zon dus. Volgers van Mofert.nl zeen al maonje de
homepage aant F5'e, zónger resultaat. Dus haet de redactie mich gekóntakteerd
of `t neet weer `ns hoeag tied wuuerj veur dae zomercolumn. Alleh dan.
Laes wiejer
Dao is `t nanneet te laat veur.
Nao de Spaanse en Limburgse taal geit Dwayne vanne Miek `t noe ouch `ns probere in `t Nederlandstalig genre. Mit ziene gister regerelase singer ''Te Laat'' baort hae noe `n anger, of mesjiens waal `n breier publiek aan. De teks moog dan waal Nederlandstalig zeen, mer mit de meziek blief d'r waal degelik in ziene vertroewdje Letiens-Amerikaansen hook. `t Is `n bewèrking van ''Salir Con Vida'' van de Colombiaanse band Morat en de net zoea Colombiaanse zenger Feid. De nómmer is aafgemix door Unimusik en die zitten in ziene zweite Heimat Monterrey. Nederlands mit `n Mexicaans tintje dus. De teks van deze latino-smartlap haet Verheyden zelf gesjreve.
Laes wiejer
Det is wo `t óm geit, dees verkezinge.
Wiejer is d'r nag éín anger belangriek thema en det is mieë of minder migratie. `t Zeen allebei thema's wo-in de conservatief-rechse hook van `t politieke spectrum zich dudelik in profileert. D'r is `ne kans det veer bie de dees verkezinge flinke wins zólle boke. Mer allein es det deil van `t electoraat zich de meujte nump óm nao `t stömbureau te gaon.
Laes wiejer
En ouch nemes oet de res van Roerdale.
De kandidatelies veel veurige waek weer inne brevebös en dus höbbe veer weer `n analyse gemaak van verkeesbare kandidate oet `t dörp, de gemèndje en de regio. Ouch mit dees verkezinge zeen veer weer geine Moferse kandidaat truuk, zelfs neet oete gemèndje Roerdale. Staon d'r dan waal Limburgse kandidate op verkeesbare plaatse? Veer basere ós hiebie op de lèste peilinge van EenVandaag/Ipsos en Maurice de Hond en gaon oet vanne woonplaats dae oppe kandidatelies steit vermeldj. Limburgers die noe in `t boetelandj wone zeen dus boete besjouwing gelaote.
Laes wiejer
Samevatting veur Mofert
Dao kan bès nag waal `n kestieëlke bie.
Entertrain Events, de evenemènte-ongernaeming van Igor Stel, geit de horeca op `t Kestieël oetbate. Det meldj de Stichting Kasteel Monfort op häör Facebookpagina. Zie doon noe ouch al de horeca in en róndj anger monumente, zoeawie Kestieël Lömmerig en de Hómpese Meule. Stel, dae in 2021 de slömste miens van Limburg waas, is oeats begós es belonnekloon. Naeve de geneumdje exploitaties is ouch `t entertainment center All in Echt van hem.
Laes wiejer
Paul Pisters, rös in vraej.
Paul Pisters, veurmalig pestoear van Mofert is aafgeloupe goonsdig op 90-jäörige laeftied gestórve. Dónderdig waerdje det al min of mieë bekindj gemaak oppe Facebookpagina Mofert Mien Dörpke, mer vandaag waerdjen `t ouch dore femielje bekindj gemaak inne gezèt. Ganse Moferter generaties zeen door deze goje miens geduip en höbbe van hem d'n Ieëste Hèlge Kemune gekrege. Vanaaf 1 november 1977 waas Pisters pestoear vanne Sinte-Ketrienparochie in Mofert. In 2018 lag hie die functie neer, mer haet daonao nag väöl misse veurgegange. Veur Moferter is en bleef hae nag ummer ''menieër pestoear'', ouch naodet hae zien bestuurlike functie ane wilge haw gehange.
Laes wiejer
De vastelaoves-top 11 van DJ Sjoester
Hie is d'r dan weer: de top 11 van DJ Sjoester veur de kómmende vastelaovendj. Mit de disclaimer det `t `n dramatisch slech meziekjaor
is. Ochja, gelökkig zit d'r onnag zat meziek van vreuger jaore in dae laptop van Sjoester. Alaaf!
Laes wiejer
Net oppertied veur de finale.
Hie is d'r weer: de jaorlikse vastelaoves-top-11 van Pater
Noster. De lekkerste vastelaovesmeziek veur dit sezoen. Dit jaor gaon veer `ns
neet van 1 nao 11, mer tèlle veer aaf van èlf nao de nómmer ein, net wie me det
vreuger deej bie de top 40. Veer beginne dus mit de leedjes die oppe
reservebank zote.
Laes wiejer
...en ómgaeving.
Mit 3 meziekkorpse op 3000 inwoners kan Mofert zichzelf zónger gène `n muzikaal dörp neume. En ouch de vastelaovendj is in Mofert `n fieës waat, veur `n dörp, nag oetbundig wuuertj gevierd. Toch haet `t lang gedoerd veurdet `t make van vastelaoesleedjes `n vas óngerdeil is gewaore van dit fieës in oos dörp. `ne Leedjesaovend is beveurbeeldj nag noeats vanne gróndj gekómme. Veurdet La Bamba van après-skimeziek is euvergestap nao vestelaovesmeziek moste veer `t doon mit Bèsten Tied van Cor en Maan, ''Mofert'' van The Sjrot en hie en dao nag get leedjes van róndj 1990 waat door Joekskapel Eine Ôngerein zeen opgenomme. De lèste jaore is me in Mofert toch weer get mieë bezig mit `t sjrieve van vastelaovesleedjes. Veer höbbe veur uch alle vastelaovesleedjes van dit sezoen waat min of mieë get mit Mofert te maken höbbe.
Vastelaoesduo La Bamba haet in december al twieë nuuj leedjes oetgebrach. Óm te beginne ''Limburgse nachte'', wovan ze de clip bie kefee Bószich in Pötbrook höbben opgenómme. Op zich waal `n aardig melodieke, mer dae is neet door Ron van Jo van Seef zelf bedach.
Laes wiejer
Good veur 648 branjoere.
De kösters van Postert zeen op zeuk nao `n vrouw waat gister óm `n oer of half tieën inne kepel is gewaes. De kösters sjrieve neet expliciet d'rbie woróm det ze op zeuk zeen nao dees vrouw. Mesjiens is `ne vriegezelle köster op zeuk nao `n vrouw waat onnag waal `ns inne kirk kump. Of haet dees dame mesjiens de buuers oppen offerblok laote lègke. De postscriptum suggereert ieëere det dees medam zich dae stapel noveenkaese mit heives haet genómme, mer haw vergaete aaf te raekene bie de zelfscan.
Laes wiejer
Gaontj geer mer röstig slaope. Chritje Wolfhage waak euver uch.
In `t ganse landj haet me vandaag las van hoeag water. Kelders en zelfs hoezer dreige te euverstruime, sjeepvaart is stilgelag en euverloup-dinger loupe euver. Tömmerfrans zitj al de gansen daag Nu.nl te F5'e óm te kieken of d'r al emes is verzaope. De Rien blief mer stiegen esof `t nieks is en morge: dan steit de Maas hoger es zomer `21. `t Watersjap is haet op Aadjaorsdaag opgesjaold nao DEFCON 2. En det is allemaol de sjout van BBB. Sins die in de watersjappe zitte is `t dweile mitte kraan aop. Gelökkig dan mer det `t algemein bestuur van Watersjap Limburg noe gekaozen haet veur `n diekgravin oet GroenLinks-hook, dus alles kump good. Mer toet daen tied motte veer `t veurluipig doon mit `ne CDA'er aan `t roer. Es veer det dan mer euverlaeve.
Laes wiejer
...mer neet door Mofert.nl
Zoeawie bekindj waeren op Facebook alle Piete gecancelled waat neet döks genóg dore sjouw op en aaf höbbe gesjraveld. Det kump of doordet me-n in Silicon Valley gein óngersjied kan make tösse blackface en Zwarte Piet of doordet me dao überwoke is. Gelökking steit vrieheid van expressie hoeag inne Mofert.nl-vaan haet de redactie nieks op mit pólletieke krekdje.
Laes wiejer
Wedstriedje waem `t helste kan zwejje.
Aafgeloupe zaoterdig veel `t dook veur de coalitie van Roerdale. Teminste, waat PvdA/GroenLinks betruf. Es gevolg daovan haet wèthajer Jacqueline Westhelle-Aelen (PvdA) per 1 november óntslaag genómme. Det beteikentj det de raodsvergadering van desnaovendj d'n ieëste is zónger Westhelle es wèthajer. Veer zeen benuujd in wieverre dao ruchbaarheid aan wuuertj gegaeve. De raodsvergadering begintj óm 19:30 oere en wuuertj oetgezónge op Ziggo kanaal 41 of via de livestream. Mer zoeadet geer `t neet hoof te doon, volge veer `t veur uch.
Laes wiejer
Is `t dan noe vaerdig mit det gezeik?
De tiejelike weuninge kómme in Mofert oppen hook Sportlaan-Boordmoolwaeg. Daet haet `t kolleesj veurige waek beslaote. Vandaag kwome bórgemeister en wèthajers mit `ne breef aan de ómweunende óm det besloet toe te lichte. `t Kolleesj haw al ieëre aangegaeve det de locatie Sportlaan de veurkeurslocatie waas. B&W zaetj de reacties vanne bie-einkóms van 7 september te höbbe mitgewaoge in `t besloet, mer die gove gein aanleiding óm veur `n anger locatie te keze.
Laes wiejer
Westhelle-Aelen kan lekker in Oearsbaek blieve wone.
`t Is zoeawied: stikstofvrie gezeik inne coalitie. De fractie PvdA/GroenLinks stap oet de coalitie. Coalitiepertieje Roerstreek Lokaal!, Democraten Roerdalen en PvdA/GroenLinks höbben `t in `n gezamelike verklaoring euver `n versjil van inzich, richting en oetveuring van `t coalitieprogram. Det versjil is inne aafgeloupe periode wie langer wie mieë zichbaar gewaore.
Laes wiejer
...en dit kieër onneet oete res van Roerdale.
Bie de veurige verkezinge waas `t Edje vanne Veurhaof waat de ieër van Mofert hoeag mos haje es watersjaps-kandidaat veur de BBB. Mitte kómmendje verkezinge steit d'r gaar nemes oet Mofert oppe lies vanne boerepertie. Sterker nag, d'r is überhaupt geinen inwoner van Mofert kandidaat veure Twieëdje Kamerverkezinge. En det geldj neet allein veur Mofert, mer veure ganse gemèndje Roerdale.
Laes wiejer
... in `n barbaars, homofoob, Islamitisch kutlandj.
Oze Max haet weer `ne werreldtitel oppe tes. Hae haoldje gister tiedes de sprintrace in Qatar genóg puntje óm zeker te zeen van `t kampioensjap. In detzelfde landj woont in pure luxe (betaald van ''oos'' geldj, bedoeld veur `t Palestijnse volk) Hamas-leider Ismail Haniya. Geer weit waal: Hamas is det clubke waat gister en vandaag nagal in `t nuuts waas. `t Regime van Qatar maaktj goje sier door `t organisere van `ne Formule Ein Grand Prix, mer haet d'r totaal gein meujte mit óngerdaak te gaeve aan deze terroristeleider.
Laes wiejer
Sjeiend griffier Notermans mit vreugpensioen.
Per 1 januari 2024 haet de gemèndje Roerdale `ne nuje griffier. De gemèndjeraod haet de veurdrach gister tiedes de raodsvergadering goodgekeurd mit 17 veurstömme veur en 2 blanco. Monique Heijnens-Coenjaerts zal vanaaf begin volgend jaor de griffel van Rob Notermans euvernaeme. Veur de euverdrach is Coenjaerts vanaaf 1 december dit jaor al plaatsvervangend griffier. Per 1 januari geit de hujige griffier Rob Notermans mit vervreug pensioen.
Laes wiejer
En bórgemeister sloop Van der Linden.
Tiedes `t vraogehalfuurke veuraafgäöndj ane gemèndjeraodsvergadering van desnaovendj haw raodslid Henk van der Linden (Ons Roerdalen) `n aantal vraoge euver dae Poolse landjdaag van begin deze maondj. Hae plaatsdje ónger angere vraogteikes bie de aanwezigheid vanne pliesie en euver de in zien uig kille en botte wijze van presenteren en reageren naar de aanwezige mensen
. Hae vroog ouch of `t kolleesj tevreje waas euvere opzèt en `t verloup vannen aovendj.
Laes wiejer
Vergaete te plugge
Jao, geer laestj `t good: `t sjuutj nanneet erg op mit de views van de lèste relaese van Zenger Rotsjo. De videoclip steit al `n waek op YouTube, mer dae video is noe pas `n 170 keer bekeke. Det zeen dus zoea ongevieër 24,285714 views per daag. Det is neet ech zoeawie veer `t van deze gebäörtig Moferter rasarties zeen gewèndj. `t geit hie waal óm `nen arties waat op `t houfpodium van kefee De Knoterpot haet gestange, dus dan höbs se dien spaore waal verdeend, tunk ós. Normaal geit zónne nuje single van Rotsjo wie `n rekèt nao d'n ieëste plaats inne Moferter charts. Waat ging d'r mis?
Laes wiejer
Not in my kestieëlhaof.
Desnaovendj vanaaf 19:30 oere is d'r weer `nen inspraokinformatieaovendj euver de tiejelike weuninge. Want de groeate vraog waat gans Mofert bezig hèltj is: wo gaon ze kómme. Oeteindelik is ederen hook en eder gaat in Mofert beoeardeild op gesjiktjheid. De gemèndje wiltj die locaties nans mit de bewoners van Mofert bespraeke, óm vervolges `n definitief besloet te naeme. De veurkeur van `t College geit oet nao de locatie Sportlaan A (oppen hook Sportlaan-Boordmoolwaeg).
Mofert Mien Dörpke haet zich al ingegrave euver dit top-down-besloet
. Mer Mofert.nl blief zoeawietj geer det van Mofert.nl gewèndj zeent: altied fair and balanced. Volg daoróm oze razende reporter via de liveblog op Twitter X, hieónger.
Laes wiejer
Mit Mofers tintje.
Gister vónj in `t Nationaal herdinkingspark in Remunj de jaorlikse herdinking plaats róndj `t Nationaal Indië-monumènt 1945-1692. Dit jaor gebeurde det mit `n Mofers tintje. Kinjer van basissjoeal De Hovenier mochte de hoeagwaerdigheidsbekleiërs helpe bie `t lègke van de kranse en droge `n gedich veur. Veur es geer neet de ganse herdinking wiltj kieke mer waal de jeug van Mofert wiltj zeen, höbbe veer veur uch `n paar tabblaedjes tösse d'n oetzending in geduudj.
Laes wiejer
...of ''GROENLINKS / Partij van de Arbeid (PvdA)''; det kan ouch.
"Verenigd Links" zal neet op `t stömbiljet es "Verenigd Links" waere geneump. En onneet es "RoodGroen". Det kónne veer noe al mit zekerheid zègke. D'n insigste meneer óm mit twieë (of mieë) pertieje mit `n gezamelike lies aan `n verkezing mit te doon is door middel van samenvoeging van aanduidingen
, ofwaal door gebroek te make van Artikel H 3 lid 3 vanne Keeswèt. Det lid guuef d'n indener van `n keeslies de meugelikheid óm de name van de versjillende politieke pertieje (of de aafkortinge daovan) same te veuge toet eine gezameliken aanduding.
Laes wiejer
Óm `t aaf te lieëre...
Ómdet de Mofert.nl zomercolumn pas inne twieëdje waek vanne sjoealvekantie is begós, haet oze vaste columnis nag éín aaflevering van ''Kómkómmertied'' veur uch in petto. De serie bedinkinge euver de Twieëdje Kamerverkeziginge van dit jaor, wuuertj daoróm kómmendje dónderdig aafgeslaote mit de allerlèste aaflevering van dit sezoen. En veer kónne alvas verklappe det d'r `n scoopje aankump.
Laes wiejer
Paniek inne tent bie d'n aje politiek
`t Bès bewaarde geheim oete Nederlandjse politieke gesjiedenis waerdje aafgeloupe zónjigaovendj oete deuk gedaon. `t Is ongeluifelik det dit al daen tied geheim is gebleve (toet zónjigmorge; ein bron is döks genóg). Mer hae duit `t, det is zeker. `t blief nag effe óndudelik wie lank dae lies wuuert en of ze in eder keeskring mit gaon doon, mer hae duit `t. Óndanks det mit name de VVD d'r alles aan haet gedaon óm dit te veurkómme. De aje politiek is in paniek, ómdet dit `n gevaor is veur de plucheplekkers. En dan waere d'r spelkes gespeeld. Smerige spelkes.
Laes wiejer
Oet en nao Den Haag.
Bie de splinterpertie CDA gáón de lèsten tied veural miense weg oet Den Haag. In `t bezunjer Twieëdje Kamerleje, die aangaeve zich nimmieë verkeesbaar te stèlle bie de kómmendje verkezinge. Logisch ouch. Mit `n veuroetzich op 6 zetels is de kans ja klein des se moogs blieve zitte. Mer d'r is nag mieë bie die pertie gebeurd dees waek.
Laes wiejer
Waat is van uch gewaore nao 9 jaor Brussel?
Frans Tömmermans. Ich haw bewónjering veur dae man. `n Jaor of ach geleje, wie d'r net in Brussel zoot. Spraeke kan d'r good, hae kwoom sereen en betroewbaar op mich euver en is onnag `ns `ne Limburger. Óm mer effe mit die lèste eigesjap te beginne: Limburger zeen is neet relevant veur `ne minister-president. `t Höbbe van `n Roda JC-sezoenskaart aevemin. En `t feit det d'r inkel kieëre per jaor in zien stamkroeg Café Pelt in Haerle zitj (hae is zoea gewuuen gebleve
), is `n slech argument óm emes `t Teurke in te stömme.
Laes wiejer
De lèste Romona is neet mieë. RIP
Jo van Seef (Roemen) is aafgeloupe dinsdig heim in Mofert gestorve. Det haet de femielje vandaag bekindj gemaak. Jo is in 2020 al ernstig krank gewaes en waas begin 2021 oetbehanjeld heives gesjik. Wie `n wónjer herpakdje hae zich en is nag `n paar jaor ónger ós gewaes, toet aafgeloupe dinsdig. Inne tössentied haet `t L1-televisieprogramma Óngerwaeg nag twieë aafleveringe mit Jo gedrejdj en oetgezónje (binjend truukkiekadvies; filmkes gans óngeraan dit artikel). Die paar extra jaor waat Slivvenhieër `m gegaeven haet, haet zoon Ron (van La Bamba) de gelaegenheid gegaeven óm nag `n duet mit zie vader op te naeme. `t Bekindjste leedje van Roemens orkes De Romona's, ''Mien aajers hoes'' is op die meneer in september 2021 nans oetgebrach.
Laes wiejer
Det witj nemes.
En veer zoue antjwaord kriege veurige waek zaoterdig veur zien vakantie dees waek nao zien vakantie. Veer höbben `t natuurlik euver de Nationale Omtzigtman en `t antjwaord wo zoea eigelik gansch het land
op zit te wachte. `t Is noe al `t bès bewaarde geheim van politiek Den Haag aller tieje, want `t is nag ummer neet bekindj waat Pieter Omtzigt geit doon mit de kómmende verkezinge. Waat zeen te opties?
Laes wiejer
`n Vieze stróntjkluuer.
/s3/static.nrc.nl/wp-content/uploads/2023/07/web-1707binglpvda2.jpg)
De politieke pertieje PvdA en GroenLinks gaon in november mit `ne gezamelike lies en program mitdoon ane Twieëdje Kamerverkezinge. Geine fusie dus, mer `n saort prooftied. Wie motte veer dit zeen? `ne Match made in heaven of in hell. Ich mot geliek dinken aan `t traditioneel sociaaldemocratisch electoraat: daen ''''arbeider'''' van vreuger of dae gepensioneerde boomer van noe. Zitte die te wachte op woke? Zitte die te wachte op klimaathysterie? Zitte die te wachte op opgedrónge diversiteit? Ich vraog `t mich aaf. Noe dink ich waal det de PvdA al väöl arbeiders verlaore is aan ónger angere Wilders. Mer wie zitj det mit dae gemaotigde socialis. Zuutj dae `t nag zitte óm op Verenigd Links
te gaon stömme? Mesjiens waal mit `ne klassieke PvdA'er aan `t roer. Mer is Tömmermans de juuste persoen óm det deil van `t electoraat binne te haole (of te haje)? Dao-euver mieër in `ne volgende aaflevering van Kómkómmertied
.
Laes wiejer
De zomercolumn van Mofert.nl
De voltallige redactie van Mofert.nl haet `n waek reces. Mer gelökkig zeen d'r gein spannende dinger in Mofert te verwachte vanoet de gemèndje, want zie zeen ouch mit vakantie reces. In taengestèlling toet de redactie doon die d'r waal 6 waeke euver óm bie te kómme. Mer good, `t bleive ambtenieëre, wor. Dit jaor höbbe veer geine take-out-the-trash-day vlak veur de vakantie gadj euver geveulige óngerwerpe. De locatie in Mofert veur de tiejelike hoesvesting is nanneet bekindj. `t College haet wieselik beslaoten óm det besloet euver `t reces haer te höffe. De locatie Sportlaan waas dan waal de veurkeurslocatie, mer de gemèndje geit alle aangedrage locaties nans óngerzeuke. `t Definitieve rapport euver die vogelshredders op `t Wolfsplateau luuet onnag efkes op zich wachte en ouch `t besloet wie veer noe al dae ''''''greune'''''' energie bie-ein motte sprokkele zal waal nao de vakantie kómme.
Laes wiejer
`t Is `n kwestie van gedöldj, röstig wachten op d'n daag det op Vloearepperstaasje weer `nen trein kump.
Plaatsnaamborde wo Mofert
op steit. Waem wiltj det noe neet. CDA-gemèndjeraodslid Remco Vrinzen pleitte dao ouch veur tiedes de gemèndjeraodsvergadering van desnaovendj. In door hem ingedeendje motie reep hae ónger angere op toet `t óngerzeuke van de meugelikheid óm de plaatsnaamborde in Roerdale twieëtalig oet te veure. Daonaeve waerdje in die motie opgerope óm subsidie ter besjikking te stèlle veur kinjerdaagverblieve óm plat kalle te stimulere.
Laes wiejer
RIAnt inkOOMEN veur de elite, AOW'tje veur `t volk.
1500 miljard euro. Det is `t bedraag waat herverdeild geit waere mit `t oetveure vanne nuje Wet toekomst pensioenen. Waarsjienlik de wètswieziging vanne grotste financiële ómvang aller tieje. Al eur zoerverdeendj pensioen wootj geer verplich aan höbtj motte deilnaeme wuuertj strakkes op `n ingewikkelde - en dus ontransparante - meneer ómgezat in `n persuuenlik pötje. En neet allein veur de miense die nag pensioen aant opboewe zeen. Nae, ouch veur alle gepensioeneerde. De risico's waere strakkes bie `t individu neergelag. De oetkieëringe waere variabel. Ze gaon daomit jaorliks ómhoeag. Of ómlieëg. Wieväöl? Kouptj uch dan van eur lèste resje pensioen mer `ne kristalle bolle (glazere böl wèrke neet). De oetkieëringe gaon namelik mitbewaege mit de buuerskoerse. De pensioenfondse moge veur jóngere zelfs gaon belègke mit gelieëndj geldj. Belègke mit gelieëndj geldj is precies de raeje woróm det se bie Jan van Storms gein belègkingshypotheek of - de inne jaore `00 zoea populaire - hybride hypotheek kós aafsloete. Ómdet Jan `t gein good idee vónj óm mit gelieëndj geldj te belègke. Dan is `t dus gein good idee. Wiltj geer nag mieë argumente huuere woróm deze nuje pensioenwèt nag mieë gein good idee is, bekiek dan hie-ónger `t college waat Pieter Omtzigt goof tiedes d'n ieëste termien vanne plenaire behanjeling vanne wèt inne Twieëdje Kamer.
Laes wiejer
Haopelik haet d'r good gespaard en alles en alles.
D'n daag wovan veer allemaol wiste det d'r oeats ging kómme, mer wovan nemes wis wienieë, geit noe toch ech binnekort aanbraeke: Jan van Storms geit mit pensioen. Zien assurantiekantoear haet det sjriftelik aan häör klantje bekindj gemaak. Mer dit is neet d'n insigste boeadsjap van dae breef. D'n aanleiding van `t sjrieve is det Storms & Geurts Assurantiën per 1 juli 2023 geit ''''samewirke'''' mit Veldsink advies. De naam van Storms & Geurts Assurantiën geit dan ouch verangere in Veldsink - Storms Geurts. `t Logo is in principe det van Veldsink Advies; döks is det `n teike det de filiaal-specifieke aanduding op termien geit verdwiene, mer det is aafwachte.
Laes wiejer
Die ''''''weuning'''''' bleek dus toch `ne caravan te zeen.
Bórgemeister De Boer-Beerta van Roerdale haet vandaag op gróndj vanne Opiumwèt `ne caravan geslaote anen Hoesbóngerwaeg. Det maakdje de gemèndje vandaag bekindj. In die weuning dae caravan haw de plisie op 4 januari dit jaor `t ein en anger gevónje. De sloeting geldj veur d'n doer van 1 jaor.
Laes wiejer
Beknopte geschiedenis van Montfort
in `n nuuj jeske.
Zaoterdig 15 april versjeen `t book Montfort - Geschiedenis van een klein stadje en een groot kasteel
, gesjreve door de gebäörtig Moferter amateurhistoricus Fedor van Genook (Coenen). Veur `ne dore wol gevèrfdje heemkundekènner waas d'r neet väöl nuuts te laeze. `t Meiste is waal op ein of anger meneer truuk te vinje in 54 jaorbeuk vanne heemkundevereniging of in ein van de väöle angere beuk euver `t stedje, `t kestieël, `t amb en de Hieërlikheid Mofert. Toch zeen d'r hie en dao `n paar opmèrkelike oetspräök van de auteur die ieërdere publicaties in `n anger daagleech zètte.
Laes wiejer
Ouch al make 113 stömme `t versjil in zetelverdeiling.
Door de totale chaos rónjelóm de veurluipigen oetslaag, de get minder veurluipigen oetslaag, `t amateuristische raekenmodel vanne Keesraod, nag te verdeile reszetels en jenkende stömmetèllers is `t nag totaal óndudelik wie `t zitj mit de verdeiling van de zetels veur `t Watersjap. Aageloupe vriedig maakdje Mofert.nl de zetelverdeiling bekindj op basis vanne getalle waat doe door `t Watersjap zeen gepubliceerd. De twieë ónverdeilde reszetels zoue volges de Mofert.nl verkezingsdeens gaon nao Water Natuurlijk en Waterbelang Horst-Helden-Beesel. Mer wie `t Watersjap aangeloupe maondig mit totaal angere getalle kwoom, ging dae reszetel van Water Natuurlik opèns nao Waterbelang Land van Weert + Leudal. Uiteraard waas Water Natuurlijk not amused en vroog óm hertèlling. Tösse de twieë oetslaeg zote in sommige gevalle versjille van mieë es 3000 stömme. Volges `t Watersjap kwoom det door `ne omissie in de optelling
en ómdet d'r correcties zeen doorgeveurd op gemèndjelik niveau. Door al dae zeik is de definitieve bekindjmaking al oetgestèldj van vandaag nao morge óm 15:00 oere.
Laes wiejer
Es `t Watersjap `t neet zelf duit, doon veer `t waal.
`t Watersjap Limburg haet d'n oetslaag vanne watersjapsverkezinge bekindj gemaak. Det wiltj zège, ze höbbe `t aantal stömme per lies bekindj gemaak. Mer bie de beraekening vanne zetelverdeiling zeen ze bie 24 van de 26 zetels blieve staeke. Volges Diekgraaf Patrick van der Broeck zeen d'r 12 reszetels, en zots se volges de keeswèt mer 10 reszetels moge verdeile. En noe motte ze bie de Keesraod te raoje gaon waat ze mit die 2 lèste reszetels motte doon.
Laes wiejer
BBBaeter es PVV, in eder geval.
Gister waerdje inne loup vannen aovendj dudelik get de monsterzaege van BBB veur `ne politieke aerdversjuving ging zorge. Ouch in Roerdale is BBB de groeate winnieër. Inne prognose van 12 mieërt van Maurice de Hond zou PVV nag de grotste pertie waere in Roerdale. Dae vogel bleek neet op te gaon, net wie in de meiste gemèndjes in oos provincie.
Laes wiejer
Nou. Zoea:
`t Watersjap is in Nederlandj by far de aadste bestuurslaog. `t Aadste watersjap (waat trouwens nag ummer besteit) is `t Hoogheemraadschap van Rijnland, waat in 1255 waerdje ingestèldj door graaf Wullem II van Hollandj. Mer wie zitj det in Mofert? Inne 19'dje ieëw haws se-n al Waterschap Vlootbeek. Wienieë dae precies is opgerich, is neet gans bekindj, mer waarsjienlik bestóng `t al in 1874. Det watersjap waas belas mit `t waterbehieër in `t struimgebied van `t Vlaot en zien zietek, wo-ónger de Helderbaek en de Krómbaek (de óngerhandj opgedruuegdje baek wo de buursjap De Baek ziene naam aan dank). Waterschap Vlootbeek haet nag toet 1980 bestange. In det jaor fuseerde `t Watersjap mit Waterschap Geleen- en Molenbeek toet Waterschap Geleen- en Vlootbeek. Det watersjap haet neet lang bestange, want in 1983 ging `t op in Waterschap Roer en Overmaas. De meiste miense kump dae naam nag bekindj veur, want det haet nag toet 2017 bestange. Doe fuseerde de twieë nag euvergebleve Limburgse watersjappe toet Waterschap Limburg.
Laes wiejer
... óm d'n ieër hoeag te haje.
Wie veer al ieëre meldje op dees site, steit d'r geinen eine kandidaat oet Mofert oppe kandidatelieste veur de Provinciale Staoteverkezinge. Veur `t watersjap vinje veer neet mieë es eine kandidaat oet oos dörp. Mer wie zitj det mit de res vanne gemèndje. Veer höbbe veur uch zitte tèlle.
Laes wiejer
Óm wied weg te blieve van `t stikstofdebat.
Zelje waas d'r zoeaväöl aandach veur de provinciale staoteverkezinge es dit jaor. D'n oearzaak daovan motte veer neet inne provincie zeuke, mer in Den Haag. De crises stapele zich op en `t vertroewe in Rutte-IV is toet `n dramatisch deeptepuntj gedaald. In de peilings haet de coalitie inne Twieëdje Kamer nag mer `n 50 zetels euver van de 78; det is dus nag mer ein derde. En aangezeen de Provinciale Staote de leje vanne Ieëste Kamer keze, is deze onvrede `n belangriek thema bie dees verkezinge. De regeringspertieje höbbe noe al gein mieërderheid innen Ieëste Kamer (43%), mer volges peilinge van Maurice de Hond zou det percentage zoeamer `ns 7 procentpuntj kónne dale nao 36%. De nuje senaat kan straks flink get wètgeving frustrere en dus zal Rutte zich - es `t geit óm nuje wètte - motte sjikke nao `t nuje politieke landjsjap waat zich nao goonsdig zal gaon aafteikene.
Laes wiejer
De vastelaoves-top 11 van DJ Sjoester
Nag mer efkes en dan bars weer los: `t sjoonse fieës van `t jaor. In Mofert höbbe veer einen DJ dae altied oppe huuegdje is vanne nuutste vastelaovesmeziek, en wisseltj det aaf mit aje bekindje. Veer höbben `t euver nemes minder es DJ Sjoester. Es dae in de booth steit, dan wits se det `t bieëstig good wuuertj. Óm alvas inne stömming te kómme haet hae veur uch de top 11 samegestèldj veur de kómmendje vastelaovendj. Loester nao Sjoester en gaef gaas!
Laes wiejer
Mer dan waal neet veur Provinciale Staote
Veurige maondj meldje veer nag det d'r oppe kandidatelies vanne BBB veure provinciale staoteverkezinge geinen eine Moferter steit. En det is nagal opmèrkelik veur zón boeredörp. Mer behalve veur de Provinciale Staote moge veer op 15 mieërt ouch `n vekske roead kluuere veur `t watersjap. En dao zeen veer dan toch `ne Moferter boer oppe kandidatelies staon: Edje vanne Veurhaof. Edwin steit es vice-liesdujer op nómmer 25 vanne BBB-lies.
Laes wiejer
Is det refrein van Det zien de feite
neet stiekem van
Ummer d'r Naever?
Wie aljaors zeen d'r weer van die nuje vastelaovesleedjes
oetgekómme wovan se dinks: det höb ich toch al `ns ieëre gehuuerdj. Doe wits
waal: det d'r zón stökske meziek in zit waat - meistal onbedoeld - waal hieël
väöl weg haet van bestäöndj leedje. Speciaal veur de volgers van Mofert.nl höb
ich veur uch de meis spaekende geliekenisse op e rieke gezat.
Laes wiejer
... volges Pater dan, hè.
Aljaors róndj de finale van `t LVK kóm ich mit `ne top 11 van nuje vastelaovesleedjes. Hie vinjs se de sjiekste, nuujste en meis trendy vastelaovesleedes van dit sezoen. Geliek hie-ónger steit de YouTube-playlist en dao-ónger eder leedje apaart, veurzeen van interessante feitjes.
Laes wiejer
En nag de groetjes van Graatje, hè
Gister kwome Sjup & Sjoop, de dance-act van CV Nooit Genog, mit eine nuje release veur `t loupendj vastelaovessezoen. Nooit Genog is al jaore vaste deilnaemer ane Groeaten Optoch in Mofert. De hoes-DJ's van dees carnavalsvereniging bringe mit einige regelmaot eige EDM-nómmers oet mit carnavaleske tekste. Dit kieëer zeen ze `n stök vanne Film Kwiet
. Tja, det kries se döks es se op zónne vastelaovesdaag de klok róndj zuups, wor. De tekssjrievers höbbe noe waal begrepe det in `n succesvol vastelaovesleedje altied get van lalalala
, nananana
of ohohohooo
mot zitte. Mit daen teks zou deze nómmer nag neet höbbe misstaon op `t LVK, al zal de hoofvakjury dao waarsjienlik anges euver höbbe gedach.
Laes wiejer
En veur angere pertieje trouwens onneet.
Geer laes `t good, jao. Oppe kandidatelieste vanne BoerBurgerBeweging veur de Provinciale Staoteverkezinge van 15 mieërt steit geinen eine kandidaat oet Mofert. Veur zónne agrarische gemeinsjap wie Mofert zots se det waal verwachte, mer nae: nul kandidate oet Mofert. Det geldj trouwens ouch veur alle angere lieste die bekindj zeen gemaak. CDA neet, VVD neet, SP neet, GroenLinks neet, LOKAAL-LIMBURG neet, Partij voor de Dieren neet.
Laes wiejer
...year-to-date en in verhajing toet `t aantal inwoners.
Want inne ieëste waek van `t jaor haet de pliesie in Mofert al `n aardige verzameling aan geisverrumendje middele gevónje: `n half póndj wiet, 34 gram keta, 85 gram sos en 27 gram efedrine (wiki). Wiejer haet de pliesie onnag 2100 aan contante en 2 valse ID-kaarte aangetroffe. En det oppe Hoesbóngerdwaeg of all places! (Die weuning zou dus ouch `ne caravan kónne zeen.)
Laes wiejer
Nimmenemaal, waat die badjes dao oet höbbe gevraete. Mer `t levert waal spectaculair materiaal op.
`t Filmke vanne Groeat Vuurbal des Doeads höbbe veer inmiddels allemaol waal gezeen. En d'r is ouch al genóg euver gespraoken en gesjreve. Mer de TeleLimburger bleek nag mieë footage achter de handj gehaje te höbbe. In `n artikel oppe site van De Limburger van aafgeloupe dinsdig publiceerdje ze `n foto vanoet 'nen angere hook (180 grade óm precies te zeen). Ónbegriepelik det dees foto neet `t gedrökdje exemplaar vanne gezèt haet gehaoldj.
Laes wiejer
Det haet ouch alweer väöl te lang gedoerdj.
Traditioneel wie ze zeen is de Moferse boyband Nieks Verlaore weer de studio ingedaoken óm `ne prinsesjlager op te naeme. `t Haet weer väöl te lang gedoerd veurdet d'r `ne aanleiding waas veur `n nuuj leedje. Door al det corona-gezeik is d'r twieë vastelaovessezoene lank geine nuje prins mieë gewaes. Laot det dan ouch de titel vanne sjlager zeen: ''Doertj lang''.
Laes wiejer
Det sjeeltj weer `n paar windjmeules
Inne raodsvergadering van desnaovendj haet de gemèndjeraod van Roerdale beslaoten óm `n zonnepark aan te lègke tösse de stort en `t spaor/A73. D'r is al ieëre `n vergunning verlieëndj veur zonnepanele oppe stort. De oppositie (Ons Roerdalen en CDA) stömdje taenge. `t CDA haet zien bedinkinge bie de boewkoste en `t rendement waat `t oeteindelik geit oplevere. Ons Roerdalen vindj `t plan te mager en haet twiefels euver wie de exploitatie dore gemèndje zelf vorm geit kriege.
Laes wiejer
En de wèthajer haet gein idee wo die 260 maeter vanaaf kómme.
De gemèndjeraod van Ech-Zöstere haet de Energievisie Echt-Susteren 2022-2026 inne raodsvergadering van desnaovendj aangenómme. Dao-in steit ónger angere det windjenergie `n optie is. Ein van de zeukgebiede veur windjengergie waat noe bekindj is, grens aan Mofert. Nao hoofdelike stömming bleek det 4 raodsleje van Lijst Samenwerking (LS) taenge wore. Twieë anger raodsleje van dae fractie, wo-ónger fractieveurzitter Jos Wackers, stömdje veur. De algemeine tendens inne raod waas det me ieës alles óngerzoch wiltj höbbe, zoeadet ze later `n waaleuverwaoge beslissing kónne naeme. Det zou ouch precies d'n instaek vanne engergievisie zeen op `t gebied van windjenergie.
Laes wiejer
Töp töp tö dö dö dö döp töp!
Desnaovendj waas op L1 de bekindjmaking vanne halve finaliste veur `t Limburgs Vastelaovesleedjes Konkoer. Daobie is bekindj gemaak det La Bamba mit häör leedje `t Geheim door is nao de halve finale. Ze zitte inne twieëdje halve finale op startnómmer 30.
Laes wiejer
Waat zaes se? Of se salami lös?
Wèthajer Hub Meuwissen (duurzaamheid, PNES) vanne gemèndje Ech-Zöstere sjitterde dan waal van aafwezigheid tiedes de inspraokinformatie-aovendje euver `t in dae gemèndje te realisere windjmeulepark; hae haet toch neet stilgezaete de aafgeloupe maondj. Nao aanleiding van `t gezeik det inne gemèndje Roerdale is gewaes euver `n windjmeulepark op Ieësele, haet `t college beslaoten óm de Energievisie Echt-Susteren aan te völle mit `ne paragraaf. In dae Hubke-Mieëwese-salami-paragraaf wuuertj nag `ns dudelik gemaak det ieës alle óngerzeuke waere aafgerundj en det dan pas dore raod wuuertj beslaote of det windjmeuleparkt d'r überhaupt waal mot kómme. De gemèndje Ech-Zöstere wiltj hiemit de in Roerdale zoea gevreesde salamitactiek vaslègke in häör beleid.
Laes wiejer
Neet ratataaa, mer töp töp tö dö dö dö döp töp
Noe bekiektj uch ieës mer `ns dae clip, dan kalle veer daonao wiejer.
Laes wiejer
Help Fedor. Hae witj `t zelf onneet.
Waat is `t?
a. `n Kruuts
b. `ne Stein
c. `n Prehistorisch ponskaertje
d. Vief van de tieën gebaoje.
e. get anges, namelik. (reagere inne comments vanne Facebook-post hie-ónger)
Laes wiejer
Heh? Waat zaes se? Of se salami lös?
Desnaovendj wore de ieëste inspraokinformatiebie-einkómste vanne gemèndje Ech-Zöstere euver 'n te realisere windjpark in dae gemèndje. En dao wore veer natuurlik bie, want ein van de zeukgebiede (zeukgebied A) lèk op steinworp aafstandj van Ieësele, wo de gemèndjeraod van Roerdale al `n windjmeulepark haet aafgesjaote.
Laes wiejer
En jenkers zeen `t ouch.
Waem waal `ns op Ingelstalige social media de Formule 1 volg, witj wo ich `t euver höb. Al vanaaf det Max Verstappen `n bedreiging begós te vorme veur de sjienbaar onverslaonbare ''''Sir'''' Lewis Hamilton begóste de Hamilton-trolle te zaniken en te zeike euver alles waat mit Max te maken haet. Gefrustreerde Verstappe-fans hapdje flink toe en eindeloze discussies woren `t gevolg. Bliekbaar höbbe väöl luuj nieks baeter te doon of is `t ego en d'n ieër van dan waal d'n Ingelsman, dan waal de Nederlenjer te groeat óm al dae zeik lang zich aaf te laote litse.
Laes wiejer
Volg `t liveverslaag op Mastodon Twitter
Desnaovendj en morgenaovendj waere d'r inspraokinformatiebie-einkómste georganiseerd dore gemèndje Ech-Zöstere euver 'n te realisere windjpark in dae gemèndje. En det is ouch veur Mofert van belang, want ein van de zeukgebiede grenze bie Ieësele aan oos gemèndje.
Laes wiejer
En det wiste ze dao al maoooondje.
Dao gaon v'r weer. Naodet de gemèndjeraod van Roerdale Ieësele haet aafgedaon es zeukgebied veur windjenergie, is `t aangrenzende gebied inne gemèndje Ech-Zöstere nag volop inne race veur `n windjmeulepark. `t Gruupke ''Doordachter Duurzaam'' haet det weite oet te pluze es resultaat van `n Woo-verzeuk. Oet `nen e-mail van de Coördinator Duurzaamheid vanne gemèndje Ech-Zöstere bliek det zeukgebied A grenst aan ''''''Mofert Zuid''''''. Oet privacy-euverwaeginge zeen hie en dao get name zwartgelak, zoeawie de naam vanne Coördinator Duurzaamheid vanne gemèndje Ech-Zöstere (det is waal googlebaar). Ouch de name vanne geadresseerde is zwartgelak: eine daovan is emes van Energy Investment Management. Det is `n soart Pondera, mer dan mit `ne langere naam. D'n angere geadresseerde en emes op CC zeen dinkelik miense vanne gemèndje Ech-Zöstere, ómdet deze gans zeen weggelak (es se'n e bietje wits wie Outlook wèrk dan is dae conclusie gaw getrokke).
Laes wiejer
Lekker gewèrk, Dees!
Desirée Cuijpers (veer moge Dees zègke) moog dan waal neet gebäörtig Moferter zeen; det maak ós neet minder gruuets. De advekaote mit eige kantoear in Mofert is namelik genomineerd veur de prestigieuze Roerstreekprijs
. En neet veur de gewuuene Roerstreekprijs. Nae, veur de Belofte van de Roerstreek
. Volges oze sportredactie hink d'r aan `ne ''belofte'' meistal `ne strenge laeftiedseis. Noe zeen veer van Mofert.nl fel taengestendjers van ageism en motte veer daobie onnag zègke det Dees d'r nag altied óm door e ringske te haole oetzuutj. Mer `t luuet ós ós waal aafvraoge waat det dan beteikentj, dae belofte.
Laes wiejer
Of toch neet. Of toch waal. Of toch neet. Jewaal toch waal. Veer snappen `t neet mieë. Efkes nao `t Place de la Concorde belle.
De vreuge vogels höbbe Max Verstappen desmorge de euverwinning zeen pakke mitte Grand Prix van Japan. En ouch es se dich twieë oer höbs verslaope, dan haws se-n eigelik allein de start en de ieëste 3 rundjes gemis. Nao die drie rundjes waerdje de race namelik aafgevlag (roeaj vlag) vanwaege de raenge. Deze race haw `n extra dimensie ómdet Max noe al werreldkampioen zou kónne waere es hae ieëste zou waere en Leclerc neet twieëdje zou waere. Teminste, es de volle puntje waerdje gegaeve. Veer herinnere ós allemaol nag de Grand Prix van Belsj van veurig jaor. Toen höbbe ze vanwaege de range mer inkel rundjes gevare mit Bernd Mayländer aan kop. Dit kwoom dus ouch ómdet `n grand prix race mot waere gedaon binne `n tiedvinster van 3 oer en ja, op e gaegaeve moment is daen tied op. Ómdet me eigelik neet ech haw gerace, is doe beslaote óm neet `t ganse mer `t halve aantal puntje oet te deile. Gezeik natuurlik, ómdet dan altied waal emes wuuertj benaodeild. Fèng, vanwaege det gezeik haet de FIA sins dit sezoen `ne nuje regel. Es minder es de hèlf van `t aantal rundjes gerejen is wuuertj de hèlf van `t aantal te behaole puntje oetgedeild en es tösse de 50% en 75% van `t aantal runjes is aafgelag, dan wuuerj driekwaart van `t aantal puntje gegaeve. Puntje waere waal nao baove aafgerundj op ganse puntje, dus neet zoeawie veurig jaor det Verstappen `t kampioensjap won mit 395 1/2 puntj.
Laes wiejer
Tiedes de gemèndjeraodsvergadering van desnaovendj is beslaote det d'r gein wiejer óngerzeuk kump nao windjmeules op Ieësele. `n Amendement van Frans vanne Biemel (Demcraten Roerdalen) is mit groeate mieërderheid dore raod aangenómme. Dao-in steit det allein `t Wolfsplateau (aka Mienwaegplateau) wiejer óngerzoch geit waere op de meugelikheid óm dao windjmeules neer te paote. Allein de fractie van Ons Roerdalen stömde taenge. Zie zoge lever det d'r ieës `n windjenergiebeleid wuuertj bepaold. Onverwach óngersteunde ouch de PvdA-GroenLinks-fractie de motie. Zie zeen ja taenge windjmeules op `t Wolfsplateau. Mit `t óngerzeuk meine zie geliek te kriege det `t daon neet kan.
Laes wiejer
Zèt de sjieps en de neutjes mer vaerdig. Steit `t beer al
kaad? Sjiefke salami d'rbie? Gaontj d'r mer `ns good veur zitte want óm 19:30 begintj
de gemèndjeraodsvergadering wo-in `n besloet wuuertj genómme euver ónger angere
windjmeules op Ieësele.
Laes wiejer
Vanaovendj geit `t gebeure: dan beslis de gemèndjeraod euver `t veurstèl van `t college euver windjenergie. Wo kónne die dinger `t bèste kómme te staon? Motte ze d'r überhaupt waal kómme? Moog Pondera of `n anger adviesbureau zich nag get geldj inne tes staeke veur nag mieë óngerzeuk? Allemaol vraoge wo desnaovendj mieë dudelikheid euver mot kómme. Veer zètte alle standjpuntje op e rieke
Laes wiejer
Al `n dieke waek geleje waas de release van de nuje herfsknaller van de gebäörtig Moferter Zenger Rotsjo. Helaas waas de ganse koeltoerredactie van Mofert.nl op koeltoerele werkvekansie; daoróm dus pas noe in `t koeltoerkatern. Wie veer Rotsjo kénne geit `n nuuj leejde natuurlik gepaard mit `nen diek van `ne videoclip. Rotsjo's veurige hit waas `ne cover van Wacko Jacko, mer ouch deze clip begintj al aardig inne buurt te kómme van de legendarische videoclips van de King of Pop wie dae van Smooth Criminal en dae van Black or White. En dao huuertj uiteraard `ne proloog bie dae bekans net zoea lank is es `t leedje zelf; dit kieër gehieël in stiel van daen tied det alle films nag stóm wore.
Laes wiejer
Waem desnaovendj neet inne gelaegenheid is gewaes óm de informatieaovendj
windjenergie vanne gemèndje Roerdale
bie te wone, haet neet väöl gemis. Zeker neet degene waat dit dossier toet noe
toe höbbe gevolg.
Laes wiejer
En det hölp allemaol neet bie `t vertroewe vanne burger inne politiek en/of de euverheid. Mer waat zou d'r gebeurd kónne zeen? Höbbe de ambtenieëre `t college neet ingelich? Höbbe de ambtenieëre `t college waal ingelich, mer waas det nag veurdet Wèthajer Westhelle-Aelen aantrooj? (Toen zoot dit inne portefuille van wèthajer Jan Smits (Democraten Roerdalen), dae noe nag ummer in `t college zit.) Of haet wèthajer Westhelle-Aelen (PvdA-GroenLinks) bewus `n rapport achtergehaje? (In GroenLinks-kringe numme ze det ouch waal een groot-wassinkje doen
.) `t Lèste scenario is volges `t college neet `t geval; zie wore neet oppe huuegdje van `t bestaon van dit rapport. Veer höbbe veur uch `n analyse gemaak.
Laes wiejer
De gemèndje haet gewikt en gewaoge, alle veurwaerd langs de plattegróndj van Mofert gelag en toet een besloet gekómme: `t woonerf mit tiejelike weuninge geit in Mofert kómme achter de speeltuin oppe Kirktiend. Det is dus op dae hoeager gelaege landjtóng waat zoea `t brook in löp.
Laes wiejer
Dezen aovendj organiseerde de stuurgroep Doordachter Duurzaam in `t Döpshoes `nen informatieaovendj euver windjmeules. De groep vónj det zoeawaal de inwoners van Mofert (en ómgaeving) es de raodsleje nader geïnformeerd mos waere euver de impact waat windjmeules kónne höbbe op de ómweunende.
Laes wiejer
Aafgeloupe dinsdig tiedes de vergadering vanne raodsadviescommissie maakdje Hugo Verzellenberg (same mit twieë angere leje) van de stuurgroep Doordachter Duurzaam gebroek van zien inspraekrech veur burgers. Verzellenberg is dudelik de techneut van det clubke. D'r vele mich twieë dinger op aan zien betoog waat mich sterk deej dinke aan `n laezing euver de engergietransitie oet 2016: 1) `t Feit det zon en windj neet toezjoer engergie oplevere en des se dus `ne back-up nuuedig höbs. 2) Thorium.
Laes wiejer
De hoogste windjmeule waat d'r op dit moment in Nederlandj steit
is de Haliade-X, op `t uterste punt vanne Twieëdje Maasvlakte. Volges Wikipedia
(dus dan is `t waor) is det dink 248 maeter hoeag. Dae huuegdje duit `n bietje
dinke aan de 250 maeter wo noe spraoke van zou zeen veur die windjmeules op
Ieësele.
Laes wiejer
MeDiScH eXpErImEnT!!!!!!!!1!!
Jao, geer laestj `t good. Die televisietores mit wieke waat hieël, hieël mesjiens op Ieësele motte kómme te staon zeen medische experimente
. Det zaetj Chris Vleugels, zèk mer de Willem Engel van de stuurgroep Doordachter Duurzaam. Vleugels huuertj bie det clubke waat ouch bekintj is van de posters Duurzaamheid oké, mega-molens nee
.
Laes wiejer
`t Zomerreces is veurbie, dus de gemèndjeraod kan weer ane
slaag. De ieësvolgende gemèndjeraodsvergadering is waal pas op 29 september.
Mer zoeawie det gebroekelik is inne lokale politiek waere de besloete
veurberèdj door de raodsadviescommissie. En laot die noe net gister begós zeen
mit vergadere.
Laes wiejer
Óm nag effe truuk te kómme op veurige waek:
Laes wiejer
Ich kóm oet `n gemaotigd socialistisch nès. En al sinds det
ich hökskes roead moog kluuere höb ich es zwervende kezer mit links stömgedraag.
Woróm bön ich dan `ne vaste volger van '''politiek rechse''' platforme wie GeenStijl en TPO?
Óm te beginne mot me weite det de terme (politiek) links en rechs allewiel te
pas en te onpas waere gebroek. Vanoet de rechter hook wuuertj alles waat mer e
bietje klimaatactivistisch en woke is, extreem links geneump. Angesóm wuuertj
alles waat nao conservatisme neigt es extreem rechs weggezat.
Laes wiejer
Draagvlak
: es `n bestuur in oze polderdemocratie `n vervaelend besloet wiltj naeme, dan kump daen term vreug of laat ómme hook kieke. Of det noe is bie `n reorganistatie van `n bedrief, vestiging van `n asielzeukerscentrum of bie `t plaatse van windjturbines. Zoea ouch bie `t plan óm televisietores mit wieke te plaatse op Ieësele. In de samevatting vanne ieëste inspraokinformatieaovendj euver windjenergie wuuertj door de gemèndje bevestigd det voldoende draagvlak
van groeat belang is, zeker veur `n windjenergieproject. Mer wienieë is d'r spraoke van voldoende draagvlak
en wie kóns se det maete? Det is nanneet dudelik. `t College geit same mitte gemèndjeraod bepaole wie ze draagvlak gaon maete.
Laes wiejer
Wits se wo ich `n sjurfhaekel aan höb? Aan activiste die
meine det ze anger luuj de vriejen doorgang te motte weigere op - ich num mer
`n dwarsstraot - aafrit
Ruuestere, de Midde-Pieëlwaeg
of beveurbeeldj de A12.
Oprume, aafveure, weg mit dae kraom. Gank dien eige oprit of plaats mer
blokkere. En es se gein plaats höbs, dan blokkeers se van mien paart dien
veurdeur mit `ne vloertrèkker, mer val mich dao neet mit lestig.
Laes wiejer
`n Paar waeke truuk haw de gemendje Roerdale `ne inspraokinformatieaovendj
euver windjmeules georganiseerd. Helaas waas de voltallige redactie van
Mofert.nl mit reces vakantie en/of op femieljebezeuk in Zwitsterlandj. D'r waas
dus geinen inkele verslaaggaever van Mofert.nl in de gelaegenheid óm dae
bie-einkóms bie te wone (Waem plant zoeaget ouch inne vakantie?).
Laes wiejer
In deil twieë van dit drieloek euver stikstof probeer ich
get duding te gaeve aan en nuance aan te bringe in de discussie euver de
noeadzaak.
Laes wiejer
Nederlandj is al jaore kopluiper es `t geit óm innovatie
inne landjboew en vieëteelt. Ich laes döks det d'r gein landj is det
efficiënter boert en oos landj. Toch blief `t kabinet innovatie oetsloete es
oplossing van `t stikstofprobleem inne vieëteelt. Veurstenjers van inkrimping
vanne vieëstapel veure döks es argument aan det daen innovatie nieks of neet
genóg haet gebrach. Toch zuus se det d'n oetstoeat van ammenjak vanaaf 1990 mit
twieë derde is gedaald. En det terwiel de vieëstapel in dae periode neet
klinder is gewaore. Waal is de verhajing tösse de versjillende saorte vieë
verangerd, waat ouch van invloed kan zeen op d'n oetstoeat.
Laes wiejer
`t Is kómkómmertied in medialandj. Oppe televisie nieks es
herhalinge, de Twieëdje Kamer haet ach waeke reces vekantie en ouch de
gemèndjeraod haet reces toet en mit augustus. `t College haet es lèste waopefeit
nag e bömke gedrop op Ieësele,
mer zal noe waal muuskesstil blieve toet september. Óm de laezers van Mofert.nl
toch `n bietje te bedene in deze zomerperiode, zal alwaekes `ne column
versjiene op Mofert.nl. De stökses van oze vaste columnis Pater zólle op
donderdig vanaaf 19:00 oere online staon.
Laes wiejer
Zoea geit det inne politiek: es se `n geveulig berich nao
boete brings, dan duis se det vlak veur de vakantie. Want es `t volk en de gemèndjeraod
truuk zeen van vekantie, dan zeen ze de hèlf alweer vergaete. Damage control
neume ze det mit `n good Mofers waord.
Laes wiejer
Gister waas bie L1mburg Centraal op L1 `n reportaasj euver
zwumbad `t Sweeltje. Verslaaggaever Jos van den Broek kump aangefietsj en
wuuertj vanachter de hèk oet hertelik verwelkomt door (bad)meister Marx. Dae
Jos merkt gans snugger op det d'r dao neet nao binne kan. Bliekbaar haet d'r
det bördje waat ane hèk hóng euvere kop gezeen.
Laes wiejer
Op 10 juni dit jaor slingerde minister veur Natuur en Stikstof
Van der Wal `n
kaertje de werreld in. Dees Richtinggevende
emissiereductiedoelstellingen per gebied
-kaart (in de volksmoel ouch waal
stikstofkaart
of kluuerplaat
geneump) deej nagal get staof opwejje op `t plattelandj. Boere
trochte nao Stroe City óm te demonstrere en vandaag waerdje nag de A67 geblokkeerd
door boere die `t neet èns zeen mit de planne. `ne Moferter loeanwèrker ging zelfs mitten trakter nao de basissjoeal
in Mofert óm aandach te vraoge veur de problematiek. Mer wie zitj det in Mofert?
Hie-ónger vindj geer `n detail van det kaertje van Mofert en ómgaeving. Excuus
veur de belabberde resolusie; dit is wo veer `t mit motte doon.
Laes wiejer
Joey
Vanherle, dae twieë jaor geleje lanjelike bekindjheid verworf es winnieër
van The Bachelorette geit nag `ne kieër `n poging wage óm mit `n televisieprogramma
`n blónj ane haok te slaon. Zien ieëste poging mit bachelorette Gaby Blaaser
(huhhuh, blaser) leep oet op `n mislökking. Sterker nag, Joey veulde zich door
de actrice veur de bus
gesmete. Mer hey, Joey, `t is `n actrice, hè.
Laes wiejer
De fans van de Zenger Rotsjo kónne dit weekend weer häör hert ophaole. De gebäörtig Moferter kwoom mit de langverwachte release van zien nuje videoclip op zien YouTube-kanaal. Köste noch meujte zeen gespaard óm `t ouch dit kieër weer `n legendarisch sjouwspel te make. Directe link nao de clip hie-hie.
Laes wiejer
Vandaag waas `t weer code
oranje in oos provincie
vanwaege `t groeate Unwetter des Todes. Extreme raengeval,
haachelstein wie golfbelkes, windjstoeate mit tachowaerdes van de
RB18, supercells en jao, zelfs tornado's zeen ós
veurspeld.
Laes wiejer
Daags veur Keuningsdaag is vèlt aljoars de traditionele
lintjesraenge. Dit jaor is d'r ouch `n spetterke in Mofert gevalle. De 76
jäörige Ben vanne Paaj is vandaag óngersjeie es lid inne Orde van
Oranje-Nassau. Hae is al `ne respectabele 65 jaor muzikant en lid vanne fómfaar en
dao ouch actief es manusje-van-alles. Wiejer is hae actief bie De Zonnebloem
aafdeiling Mofert, es penningmeister en hae organiseert dao mit `ne groep
vriewilligers de waekelikse goonsdigmiddigbie-einkóms. Behalve bie de fómfaar
bluues hae sins 1963 ouch bie blaoskepel D'n Eigenheimer. En hae is sins 1969
lid vanne EHBO, aafdeiling Mofert. Veur de res is hae onnag sins 2008 lid van
`t Gemingdj Kirkelik Zangkoear.
Laes wiejer
Tut tut tut, RoerdalenNu.nl
kopt `ne kritische reactie van
de Facebookpagina Mofert Mien
Dörpke op `n stök in Dorpsblad Montfort. Dao-ónger volge natuurlik geliek
allerlei reacties. Reacties van MMD-reaguurders - al dan neet zelf deil
oetmakend van `t MMD-redactieteam - die `t volledig èns zeen mit dae redactie
van MMD, wo anger MMD-redactieleje dan weer bevestigend op reagere. Kort gezag:
`t waas geliek-vieë-lek-zich-fieës in de MMD-bubbel. Meer genuanceerde reacties
kriege dan weer repliek van de MMD-redactie, die trouwens net zoea anoniem
reagere es det dae column in `t dörpsblaad gesjreven is.
Laes wiejer
Dwars door de Lage Landen.
Dwars door de Lage Landen
is `n programma wo-in drie Belzje
(wovan eine cameraman en eine geluidsman) van Oostende nao Mestreech en van dao-oet
via `t Pieterpaad nao Groninge wanjele. En in de aaflevering van gister noom
Mofert `n prominente in. En det begós al in `t boetegebied van Zittert. Noe
gank kieke.
Laes wiejer
Gewoon blijven dóen, natuurlijk samen!
Wie verzins se zón
gedroch van `ne slogan veur dien coalitieakkaord?
Nou, doe paks gewuuen de verkezingsslogan van de ein pertie en dae van
de anger pertie; control-c, control-v en voilà. Aoh wach, wo zitj dan de
nuance van allemansvrundj en grotste pertie Roerstreek Lokaal!? Waat waas dae
verkezingsslogan ouch al weer?
Hm, dae kwoon mich al bekindj veur. Nou dan zèt, óm det te accentuere, mer `n
accent aigu op de -o- van doen
. Det begintj al goon; laote veer haope det `t
akkaord zelf neet zón ónsamehangendj bie-einraapsel is wie de biebehuuerende
catchphrase.
Laes wiejer
...en dao zólle de bewoners vanne Zandj waal blie mit zeen. Ze
höbben dan ouch de aafgeloupe jaore optimaal van häör woongenot kónne genete
waal dökker te make gadj mit `n aopgerete straot. Mer det zeen de bewoners zelf
sjout; esse inne Zandj geis wone, dan zóls se zandj kriegen ouch.
Laes wiejer
Strakkes óm 19:00 oere waere de nuje raodsleje vanne
gemèndje Roerdale beëdigd. Ich bön benuujd waem d'r noe weer te laat is. Volg
deze speciale raodsvergadering via de livestream
of via OR6 op Ziggo kanaal 41.
Laes wiejer
De nuje coalitie veur Roerdale liek róndj te zeen; det
meldj 1Limburg. Roerstreek Lokaal! haet same mit Democraten Roerdelen en
PvdA/GroenLinks `n intentie-euvereinkóms op hoofliene geslaote. Ze laote weite
det d'r `ne solide basis lék óm wiejer te gaon.
Laes wiejer
Haol de tissues mer d'rbie, want veer gaon aafsjeid naeme. Óm 19:00 oer begint de alder-alderlèste vergadering van de aje gemèndjeraod van Roerdale. Volg de vergadering via de livestream of op OR6 op Ziggo kanaal 41. Van waem gaon veer aafsjied naeme?
Laes wiejer
Ieëre waerdje op deze site gebrach det Roerdale maximaal 3 wèthajers moog höbbe. Det
is neet `t geval. `t Maximaal aantal wèthajers is 20% van `t aantal raodsleje;
3,8 wèthajers dus. En ómdet `t zeuke nao `ne gesjikdje wèthajer zónger bein neet
mit vèltj (neet ómdet die minder gesjik zeen, mer ómdet die minder veurkómme),
moog me det aafrunje nao 4. Sterker nag, es me gebroek maak van
deiltiedwèthajers moog Roerdale zelfs 5 wèthajers höbbe, mit `n maximum van 4,4
fte's.
Laes wiejer
Es grotste pertie zal Roerstreek
Lokaal! `t initiatief naemen óm `n coalitie te vorme. Van een cordon
sanitaire, zoeawie in
Remunj de aafgeloupe tied, is in Roerdale gein spraoke, dus alle
combinaties zeen meugelik. Óm toet `ne mieërderheidscoalitie te kómme höbbe ze
in principe mer 4 extra zetels nuuedig. CDA en Democraten Roerdalen kómme
daoveur in aanmèrking. Óm `t draagvlak te vergruuete kan me-n ouch d'rveur
kezen óm mit mieër es twieë pertieje `ne coalitie te vorme.
Laes wiejer
Gans `t vaderlandj waas in rep en roer wie in mei 2021
bekindj waerde gemaak det Ziggo vanaaf sezoen 2022 neet mieë de rechte haw óm
de formule 1-races integraal oet te zende. De rechte veur Nederlandj wore
gekoch door de Zweedse Nordic Entertainment Group en zou besjikbaar gestèldj
waere via de video-on-demand-deens Viaplay. Inmiddels haet zich det óngerhandj
waal `n bietje gelag, feit blief aevel det me noe extra mot betale óm de Formule 1
live te kónne volge. Waat zeen de meugelikhede en waat zeen de veur- en
naodeile. Hie-ónger alles op e rieke.
Laes wiejer
De gemèndjraodsverkezingen höbben in Roerdale neet
bepaold toet `n politieke aerdversjuving gezorg. De VVD deej nimmieë mit, dus
de euvergebleve pertieje hawwe eine zetel mieë te verdeile. De grotste pertie
Roerstreek Lokaal! blief stabiel mit 6 zetels. `t CDA verloor eine zetel en
steit noe op 4. Democraten Roerdalen won eine zetel en is noe mit 4 zetels aeve
groeat es `t CDA. De liêstrouwerie tösse de PvdA en GroenLinks haet
de socialiste good gedaon, want die stege van 2 nao 3 zetels; det höbbe ze
netjes gedaon en haw ich neet verwach. Ons Roerdalen, ten slotte blief mit `n
SGP-echtige stabiliteit op 2 zetels staeke.
Laes wiejer
De stömlokale zeen geslaote en de stömme waere noe getèld. Laes hie alle nuuts euver de oetslaeg vanne gemèndje Roerdale.
Laes wiejer
De gemèndjeraodsverkezinge kómme weer d'raan. Of eigelik
zeen ze al bezig, mer aangezeen de meiste kezers toch op de lèste
verkezingsdaag pas häör stöm oetbringe, höbbe veer net nag effe d'n tied óm te
bekieke waem d'r allemaol op de lieste staon. En Mofert.nl zou Mofert.nl neet
zeen es veer neet `ns duchtig analysere wieväöl Moferter op waatfer lies staon.
Laes wiejer
Jao, geer zeentj `t good: Mofert.nl is weer in de lóch. Nao zès jaor aafwezigheid geit dees site weer veurzeen in `t nuutsaanbod veur Mofert en ómgaeving. Mer anges dan veurhaer: gein links mieë van anger Moferter sites, geinen agenda mieë, mer waal hieël väöl politiek correcte vereinigingsberichte sjerpe analyses en ongefundeerde meininge.
Laes wiejer
