Verkezingskal: gein hertèlling watersjapsverkezinge

Ouch al make 113 stömme `t versjil in zetelverdeiling.

Door de totale chaos rónjelóm de veurluipigen oetslaag, de get minder veurluipigen oetslaag, `t amateuristische raekenmodel vanne Keesraod, nag te verdeile reszetels en jenkende stömmetèllers is `t nag totaal óndudelik wie `t zitj mit de verdeiling van de zetels veur `t Watersjap. Aageloupe vriedig maakdje Mofert.nl de zetelverdeiling bekindj op basis vanne getalle waat doe door `t Watersjap zeen gepubliceerd. De twieë ónverdeilde reszetels zoue volges de Mofert.nl verkezingsdeens gaon nao Water Natuurlijk en Waterbelang Horst-Helden-Beesel. Mer wie `t Watersjap aangeloupe maondig mit totaal angere getalle kwoom, ging dae reszetel van Water Natuurlik opèns nao Waterbelang Land van Weert + Leudal. Uiteraard waas Water Natuurlijk not amused en vroog óm hertèlling. Tösse de twieë oetslaeg zote in sommige gevalle versjille van mieë es 3000 stömme. Volges `t Watersjap kwoom det door `ne omissie in de optelling en ómdet d'r correcties zeen doorgeveurd op gemèndjelik niveau. Door al dae zeik is de definitieve bekindjmaking al oetgestèldj van vandaag nao morge óm 15:00 oere.

Neet allein Water Natuurlijk haet óm hertèlling gevraog. Ouch BvNL haet gein vertroewe in daen oetslaag. Zie krege opèns `n dieke 2200 stömme minder. Toch zou `t neet toet `n hertèlling kómme, sjrief 1Limburg. Volges `t Centraal Stömbureau ónger leiding vannen diekgraaf kan hertèlling alleen als er een ernstig vermoeden bestaat dat een of meer gemeentelijk stembureaus zodanige fouten hebben gemaakt dat die van invloed kunnen zijn op de zetelverdeling. Mer wieväöl stömme versjil kónne invloed höbbe oppe zetelverdeiling?

113

De Mofert.nl verkezingsdeens haet `t veur uch oetgezóch. Hóngerddertieën. Hón-gerd-der-tieën. Laot det efkes op uch inwèrke. Ter vergeliek: tösse d'n ieëste en twieëdje bekindjmaking zote döks versjille van bekans 4000 stömme. Volges oos beraeking zou `n versjuving van 113 stömme van Waterbelang Horst-Helden-Beesel nao BBB beteikene det BBB neet 4 mer 5 zetels zou kriege en ''CDA-in-`t-zoer'' Waterbelang zou dan van 10 truuk gaon nao 9 zetels. Mer `t Centraal Stömbureau, ónger leiding van diekgraaf en CDA'er Patrick van der Broeck vindj bie veurbaat al det hertèlling neet nuuedig is.

Kónne ze morgevreug ieës efkes de Johan Remkes van `t zuje, Jan Schrijen, belle óm hie oet te kómme?