Menieër pestoear gestop mit baeje
Paul Pisters, rös in vraej.
Paul Pisters, veurmalig pestoear van Mofert is aafgeloupe goonsdig op 90-jäörige laeftied gestórve. Dónderdig waerdje det al min of mieë bekindj gemaak oppe Facebookpagina Mofert Mien Dörpke, mer vandaag waerdjen `t ouch dore femielje bekindj gemaak inne gezèt. Ganse Moferter generaties zeen door deze goje miens geduip en höbbe van hem d'n Ieëste Hèlge Kemune gekrege. Vanaaf 1 november 1977 waas Pisters pestoear vanne Sinte-Ketrienparochie in Mofert. In 2018 lag hie die functie neer, mer haet daonao nag väöl misse veurgegange. Veur Moferter is en bleef hae nag ummer ''menieër pestoear'', ouch naodet hae zien bestuurlike functie ane wilge haw gehange.
Pisters is op 2 april 1960 priester gewiedj door buusjop Moors. Vlak daonao, op 1 juli is hae keplaon op Keuningsbós gewaore. Det haet d'r persies 10 jaor gedaon. Vanaaf 1 juli 1970 waas hae keplaon in Brunsem, waat d'r toet zien aantraeje in Mofert haet gedaon.
Vriezinnig
Pisters stóng bekindj es `ne vruntjelike miens, mer ouch veural es `ne vriezinnige priester. Hae waas `t neet altied ins mit de standjpuntje van Roeame en van Remunj en hanjelde dao ouch haer. Veur hem waas `t kirkelik protocol óngergesjik ane mienselike maot. En es veer dan recent laezen euver gedoons mit `n lesbisch vastelaovesprinsepaar in Ittere, dan weite veer stiekem waal waat oze Paul in zón situatie haw gedaon. Daonaeve stóng pestoear midden inne Moferter samelaeving. Dit alles maakdje Pisters in Mofert `ne oetzunjerlik gewaardeerde en geleefdje miens euver alle range en stènj haer. Jao, zelfs ónger socialiste waas hae geleef, getuge óngersäöndj bezeuk in mei veurig jaor.
Vastelaoveshert
Zoea ane veuraovendj vanne vastelaovendj kónne veer neet anges es ouch effe stilstaon bie ziene betrokkenheid bie de Moferse vastelaovendj. Pisters haw `t vastelaoeshert oppe juuste plaats zitte. De veurmalige jeugraod van Mofert, de ''Kèrkule'', haw zien honk ónger de kirk. Gans get jeugprinse van Mofert zeen oetgerope persies ónger `t priesterkoear. Es mieë jónges zich hawwen aangemeldj óm jeugprins te waere, dan deej menieër pestoear laote door `nen envelop te trèkke. En ane jeugraod waerdje dan, in `t biezeen van hem, bekindj gemaak waem de gelökkige waas.
Sins d'n ieëste vastelaovesmis, waat aljaors same mit KV D'n Uul van den Grauwert wuuertj gehaje, waas pestoear Pisters d'r `n groeat veurstenjer van óm de ganse mis in `t plat te doon. Ouch de liturgie geit in Mofert gewuuen in `t plat en det is get waat in väöl parochies óndinkbaar waas en is. Vanoet `t bisdom waerdje det op e gegaeve moment verbaoje. Mer in `t eigezinnig dörpke Mofert bleef me biebeltekste in `t plat veurdrage inne vastelaovesmis, ouch dankzij pestoear Pisters. Ein van de hoeagtepuntje van alle vastelaovemisse is toch waal 2003. Ónger de klanke van Joekskepel Eine Ôngerein en mit Prins Mart I veurop leep d'r `ne polonais dore kirk. En menieër pestoear: dae stóng te glundere achter `t altjaor. Det zaetj toch genóg.
Aafsjied naeme
Wiltj geer persuuenlik aafsjied naeme, dan kan det morge (vastelaoveszónjig 11 februari) tösse 12:00 en 14:00 oere in zorgcentrum 'Maison Molenbeecke' ane Hindrik van Gelderstraot. De oetvaartmis wuuertj gehajen op zaoterdig 17 februari óm 10:30 oere inne Sinte-Ketrienkirk in Mofert. Aansloetendj is de begrafenis op `t kirkhaof in Mofert.
De herinnering aan pestoear Pisters blief veurtbestaon. Dao baove in daen tore: dao hink, tösse de klindere klokke Jozef en Maria, de grotste klok, genaamp Paul. Zoea kónne veer allemaol efkes aan hem truukdinke, es de groeate klok wuuertj geloejd.