Ministerie van Nuance. Aafzeen van diene raodszetel: kezersbedrog of wies besloet?

Zèk `t mer

Stèl, doe wuuers mit veurkeurstömme verkaoze inne gemèndjeraod, mer doe accepteers dien beneuming neet, nag veurdet de nuuj raod wuuert geïnstalleerd. In de reacties op det nuuts oppe Facebookpagina van RoerdalenNu.nl raegentj `t be- en veroeardeilinge euver `n dergelik besloet van `ne Moferse kandidaat. D'n eine nag nuuetliker es d'n angere. Variërend van Niet netjes, toet KEZERSBEDROG!!!1!, veurnamelik van persoeane wovan me mit aan zekerheid grenzende waarsjienlikheid kan zègke det die kezers neet op dae kandidaat höbbe gestömp. Eine sjrief zelfs freude is dat (sic), waat netuurlik bullshit is. Hoeag tied veur `t Ministerie van Nuance óm hie `n zeenswies euver in te dene.

Waal kandidaat, mer neet bereid

Kandidate waat neet bereid zeen - det wèltj zègke: neet van plan zeen - inne raod te gaon zitte, die zuus se bie eder pertie: de liesdujers. Liesdujers zeen prominente, döks bekindje kandidate waat es alderlèste op `n kandidatelies staon en, op `n inkel oetzunjering nao, neet van plan zeen óm inne raod te gaon zitte, noe neet en later neet. De raeje, woróm det die persoeane oppe lies staon is neet mieë es stömme trèkke veur die pertie. Det fenomeen opzich al zóts se kónne classificere es ''''kezersbedrog''''. Al tunk `t mich det `t euver `t algemein waal bekindj is det dees kandidate neet ech inne raod of angersäörtig parlemènt gaen zitte.

`t Börgerraodslidmaotsjap es politieke stage

Óm `t besloet van `ne kandidaat te kónne doorgrónje mot me de bekwaomheid höbbe óm zich in emes anges zien situatie in te laeve en in dit geval e bietje begriepe wie det in zie wèrk geit bie zón lokale pertie. Es se veur `t ieës bie zón pertie kums kieke, dan is `t gebroekelik det me-n ieës ervaring opboewtj binne de pertie, of es börgerraodslid inne raodsaviescommissie geit zitte. Väöl raodsleje zeen zoea häör carriere begós. Door dao maeters te make boetj me ervaring op in `t reile en zeile vanne lokale politiek en `t veure van debatte inne politieke arena. Det is toch weer `ne gans angere gang van zake es in `t bestuur vanne Boerebondj, óm mer `ns `n veurbeeldj te neume. Daoróm staon kandidate waat veur `t ieës veur `n lokale pertie op `n lies staon, döks op `t plaats waat es onverkeersbaar wuurtj besjouwd. Det is `n plaats waat, puur op basis van liesvolgorde, gein kans maak op `ne raodszetel. Kurstjens stóng op nómmer 8 en det is inne gemèndje Roerdale zón ''onverkeesbare'' plaats; in oos gemèndje haoltj gein inkel pertie oeats 8 zetels mit `ne raod van 19. `t ''''Gevaor'''' lèk dan nag ummer oppe loer det se mit veurkeurstömme wuuers verkaoze; en dan maak `t neet oet of se op nómmer 8 of op nómmer 30 steis. Woróm zètte pertieje dan überhaupt al die rookies oppe lies? Ouch det haet `n functie. `t Is veur de pertie van waerd óm te weite in waatfer maote waem van häör leje wuuert aangespraoke door `t volk. `n Gemèndjeraodsverkezing is daoveur de perfecte thermomaeter in `t kloppendj votlaok vanne gemèndjelike samelaeving. Zoea weite ze waatfer leje potentie höbbe óm op `n later moment te waere gekaoze inne raod. Daoboete is `t onnag `ns zoea det te beneume börgerraodsleje oppe lies motte höbbe gestange bie de lèste gemèndjeraodsverkezinge. Dus óm `ne pool aan kandidaat börgerraodsleje te vaerdig te höbbe staon mós se die weel oppe lies zètte.

En dan, baove alle verwachtinge, kries se es beginnend kandidaat genóg veurkeurstömme óm rech te höbbe op `ne raodszetel? Doe bös d'r in zón geval waarsjienlik neet op veurberèdj óm `t werk es raodslid (waat allemaol in diene vriejen tied mot, naeve dien wèrk) op dich te naeme. Waat duis se dan? Geis se d'r toch veur mit `t gevaor det óf `t raodswèrk óf dien eige wèrk of allebei mer half wèrk wueurtj. Es veer `t doon, dan doon veer `t good zóng `ne bekindje Limburgse groep oeats. Is `t neet aannaeme van dae raodszetel dan kezersbedrog of `n wies besloet? Zèk `t mer.