Truukkieke: Monique oetzwejje
Aafsjied van `n börgermoder.
Desmiddig is tiedes `n boetegewuuene raodsvergadering op Kestieël Dalenbrook aafsjied genómme van bórgemeister Monique de Boer-Beerta. Es geer de det höbtj gemis, dan kóntj geer `t truukkieke. Inne vergadering, dae waerdje veurgezaete door plaatsvervangend veurzitter Willen vanne Koets, kwome spraekers aan `t waord names de provincie, names bórgemeisterskrink Midde-Limburg, `t kolleesj en de raod.
Gouverneur Emile Roemer prees häör börgermodersjap bie ingriependje gebeurtenisse, zoeawie de MH17-ramp wobie ouch twieë inwoners van Mieëlik óm te laeve zeen gekómme, en in crisissituaties wie de coronacrisis, de mienwaegbrandj en de euverstruiming van de Roer. Ouch lof veur de grenseuverstaekende samewirking op `t gebied van cultuur, tourisme en brandjveiligheid. Jos Hessels noom `t waord names bórgemeisterskrink Midde-Limburg. Beginnend mit `n stökske zelfspot det zie jaorelank ziene bórgemeister is gewaes. Hae haet ja 10 van de 14 jaor det hae noe al bórgemeister van Ech-Zöstere is, in Mofert gewoont. Ouch hae haoldje de samewirking mitte Pruse buurgemèndjes aan. Mer hae sprees ouch häör óngezoute meining, mer ouch mienselikheid óndanks versjillende meininge.
Locobórgemeister Jan Smits deej `t waord names `t kolleesj. Hae zoot 12 jaor geleje es raodslid inne vertroeweskemissie en hae herinnerde zich de daadkrachtigen indrök tiedes `t ieëste gesprek. Smits haoldje aan det De Boer `n loesterend oear haw veur wèthajers en raodsleje in geval van probleme. Hae is in dae zin ervaringsdeskundige van wie hae `n paar jaor geleje ónger vuur loog vanwaege `n stök in De Limburger euver veurmalig drugssmoekkelieër Peter W., dae gelieerd zou zeen aan Smits' pertie Democraten Roerdalen. Names de raod sprook de plaatsvervangend veurzitter vanne raod. Willem benaodrökje de verbinjende capaciteite en de benaderbaarheid in crisissituaties.
De slottoespraok waas van De Boer zelf. Behalve de verplichte bedenkskes blikdje zie ouch veuroet: mieë tied veur femielje en vrunj en häör angere passie: de kuns. Oeteindelik waas `t de ieër aan Willem vanne Koets óm häör de ambskètting aaf te doon mit de verlossende wäörd Hij is los!
TV-portret
Lokale ómroop OR6 haet dees waek `n portret van bórgemeister De Boer-Beerta oetgezónje, mit verhaolkes van ónger angere aad griffier Rob Notermans, aad-fractieveurzitter en aad-wèthajer Jan den Teuling.