ZEUKZEUK! Posterse kösters op zeuk nao kleptopyromaan

Good veur 648 branjoere.

De kösters van Postert zeen op zeuk nao `n vrouw waat gister óm `n oer of half tieën inne kepel is gewaes. De kösters sjrieve neet expliciet d'rbie woróm det ze op zeuk zeen nao dees vrouw. Mesjiens is `ne vriegezelle köster op zeuk nao `n vrouw waat onnag waal `ns inne kirk kump. Of haet dees dame mesjiens de buuers oppen offerblok laote lègke. De postscriptum suggereert ieëere det dees medam zich dae stapel noveenkaese mit heives haet genómme, mer haw vergaete aaf te raekene bie de zelfscan.

De nagal oetgebrèdje postscriptum (dae onnag tösse häökskes is gezat) is mich waal `ne postscriptum wovan se zaes: nounou, det is mich nagal `ne postscriptum. Zèk mer gerös `n post-epistel. `t Geit zich óm `ne disclaimer wo-in stein ómsjreve det die camera's d'r neet hangen óm te controlere wie dök Mrie van Keub Schmitz de roeazekrans kump baeje, of wie dök det Peer van Truu van Meijers `n kaeske kump opstaeke veur zien krenkelike sjoeanmam. Nae, de beelje waeren allein truukgekeke in geval van `n substantieel kasversjil.

In `t verleje haet namelik eine persoean veur hóngerde euro's aan noveenkaese geklawtj. Hóngerde euro's! Det zeen al gaw 60 noveenkaese. Det zeen 12960 brandjoere. Det zeen oppe kop aaf ein jaor en 25 waeke. Doe vruuegs dich aaf wo dae miens zoeaväöl kaese veur nuuedig haw. Waas `t veur `n Belzje kabinetsformatie? Waas `t óm `n pandemie aaf te baeje? Of toch gewuuen veur de hanjel? Veer zollen `t noeats weite.

Wie dan ouch: es geer dees dame kèntj of geer zeentj zelf die mevrouw, dan sjik die kösters effe `n pb'ke zoeadet zie oeten druim waere geholpe.