Jeffrey van Agtmaal veurgedragen es nuje börgemeister van Roedale
Geine Limburger, waal `n zaachte g.
De CDA'er Jeffrey van Agtmaal is dore gemèndjeraod van Roerdale veurgedrage es nuje börgemeister. De gebaoren en getaoge Wes-Braobenjer is al mieë es 11 jaor wèthajer inne gemèndje Woensdrecht en op dit moment ouch ieëste locobörgemeister van die gemèndje. De gemèndje Woensdrecht haet `t ein en anger gemein mitte gemèndje Roerdale: allebei zeen plattelandjsgemèndjes mit väöl natuur en ze bestaon allebei oet `n aantal dörper van tösse de 1000 en 10.000 inwoners. Woensdrecht haet `n dieke 22.000 inwoners en Roerdalen haet d'rs bekans 21.000 en de Wes-Braobantjse gemèndje haet `ne bevolkingsdichtheid van 242 inwonders per veerkantje kilemaeter taengeneuver 236 in Roedale. Angeswaeges is Woensdrecht net wie Roerdale `n grensgemèndje. Veurhaer is van Agtmaal onnag 8 jaor Staotelid vanne provincie Noord-Braobantj gewaes veur `t CDA. Mit 40 jaor aad wuuertj hae de jóngste börgemeister van Limburg. Van Agtmaal is getrouwdj en haet twieë jóng zeunkes.
Volges zien LinkedIN-profiel haet d'r onnag `n bullshitbaan bie `n boewadviesbureau, waat aan de naam te zeen waarsjienlik zien eige bedriefke is. Get waat d'r dinkelik innen ieskas mot zitte tiedes zien loupbaan es börgemeister. `t Is neet bekindj in wieverre Van Agtmaal al plat versteit, mer allich kan d'r veur `n stoumcursus bie pertiegenoot Remco Vrinzen terech.
In `n beslaote raodsvergadering gisteraovendj haet de gemèndjeraod beslaoten óm Jeffery van Agtmaal veur te drage. De vertrouweskómmissie haet twieë kandidate mit `n veurkeursvolgorde veurgedrage ane raod. Waem dae twieëdje kandidaat waas, zólle veer dinkelik noeats achter kómme gezeen deze conform de Gemèndjewèt 75 jaor geheim zal blieve. Inne aansloetendje aopenbare bezunjere raodsvergadering maakdje de veurzitter vanne vertroeweskómmissie, Willem vanne Koets de veurgedrage kandidaat bekindj. Hae stuutdje mit name euver Jeffery's enthousiasme en betrokkenheid.
In `n interview mit OR6 verklapdje hae det d'r al ieëre mitte gemèndje kènnes haw gemaak, ómdet hae `n trouwerie op Kestieël Mofert haw mitgekaam.
Noetiejig börgemeister De Boer-Beerta maakdje begin september bekindj te gaon stoppe es börgemeister. Op 1 juli zwejt noetiejig börgemeister De Boer-Beerta aaf en zal Van Agtmaal nao alle waarsjienlikheid `t börgemeistersjap officieel euvernaeme. Daoveur geit de veurdrach ieës nao de Minister van Binnelandjse Zake en Keuninkriekrelaties en aansloetendj zal d'r dore Kroon (inne persoean van Keuning Wullem-Alexander) waere beneump. Det is normaal gespraoke `n formaliteit.