Verkezingskal: weer geine Moferter óm op te stömme
En ouch nemes oet de res van Roerdale.
De kandidatelies veel veurige waek weer inne brevebös en dus höbbe veer weer `n analyse gemaak van verkeesbare kandidate oet `t dörp, de gemèndje en de regio. Ouch mit dees verkezinge zeen veer weer geine Moferse kandidaat truuk, zelfs neet oete gemèndje Roerdale. Staon d'r dan waal Limburgse kandidate op verkeesbare plaatse? Veer basere ós hiebie op de lèste peilinge van EenVandaag/Ipsos en Maurice de Hond en gaon oet vanne woonplaats dae oppe kandidatelies steit vermeldj. Limburgers die noe in `t boetelandj wone zeen dus boete besjouwing gelaote.
Lèste peiling Europees Parlemènt van Maurice de Hond. (Bron: Maurice de Hond)
Veer zeen waal `n aantal Limburgers op verkeesbare plaatse, mer allemaol net boete de peilinge. De VVD steit op 5 zetels inne peiling. Op nómmer 6 steit Fabiènne Hendricks. De gebaoren en getaoge Mestreechse haet in `t verleje de provincie verlaote en haet dao `ne kesentied inne gemèndjeraod van Bloemendaal gezaete. Noe woont zie mit häör gezin weer in Mestreech. `nen Angere gebäörtig Mestreechteneer is Teun Janssen, dae op nómmer 3 steit vanne lies van Volt. Of hae kans maak op `ne zetel in Brussel is bedinkelik: EenVandaag peilt Volt noe op 2 zetels, mer Maurice de Hond hèltj `t bie eine zetel. Det twieëdje zetelke inne EenVandaag-peiling zal dus waal `n reszetelke zeen; det maak de kans op 3 zetels veur dees eurofiele pertie waal erg klein.
`t CDA haet Jeroen Lenaers oet Stamprooj op nómmer 3 staon, terwiel die pertie inne peilinge op 2 zetels steit. Hae zitj al tieën jaor names `t CDA in `t Europees Parlemènt, mer zal dus genóg Weesgegroetjes mótte baejen óm ziene zetel te behaje. Veur 2014 waas hae beleidsmitwèrker van tant Ria van Sint-Joeas.
Toet slot steit bie de Partij voor de Dieren Frank Wassenberg op nómmer 2. De Hond peildje de PvdD nag op eine zetel, mer inne peiling van EenVandaag bleef det ein reszetelke oet; det zal dus nag lestig waere. Wassenberg is gebaoren in Heer (dus neet gebaoren in Mestreech; Heer waas doe nag `n zelfstenjige gemèndje), mer woontj noe in Gelaen. Veurhaer zoot Wassenberg inne Provinciale Staote en toet pekskesaovendj veurig jaor inne Twieëdje Kamer names de PvdD. Dankzij hem höbbe veer noe `ne nuje orgaandonatiewèt, al waas d'r dao zelf neet blie mit.