Kómkómmertied: Wie Frans Timmermans oet mien linker rieke verdween

Waat is van uch gewaore nao 9 jaor Brussel?

Ruben L. Oppenheimer lag alvas `n (atoom)bömke ónger de campagne.

Frans Tömmermans. Ich haw bewónjering veur dae man. `n Jaor of ach geleje, wie d'r net in Brussel zoot. Spraeke kan d'r good, hae kwoom sereen en betroewbaar op mich euver en is onnag `ns `ne Limburger. Óm mer effe mit die lèste eigesjap te beginne: Limburger zeen is neet relevant veur `ne minister-president. `t Höbbe van `n Roda JC-sezoenskaart aevemin. En `t feit det d'r inkel kieëre per jaor in zien stamkroeg Café Pelt in Haerle zitj (hae is zoea gewuuen gebleve), is `n slech argument óm emes `t Teurke in te stömme.

Gebrek aan politische Bildung

Wie kump det toch det ich dao noe gans anges euver dink? `n Groeat deil daovan wiet ich aan gebrek aan politische Bildung in daen tied. Es lineaire televisie dienen insigste nuutsbron is, dan mis se väöl. De gesjreve pers druueg waat det betruf nag ummer `n belangriek deil bie ane Nederlandse journalistiek. En daoveur hoofs se dich neet op alle gezètte waat ós landj riek is `n abonnement te pakke. D'r zeen zat stökker waat online gratis te laeze zeen, ouch van de traditionele gezètte. Op internet vinjs se väöl bagger, mer ouch allerlei versjillende meininge, die in sommige gevalle degelik óngerboewdj zeen mit linkskes nao de relevante bronne. Zoea kums se nagal `ns get taenge, ouch op det verrèkdese Twitter X.

Tömmermans wantroewtj Rosenmöller, want: ex-communis

De site van WikiLeaks guuef ós soms `n interessant kiekske in de diplomatie. In 2010 smeet die organisatie `ne berg geheime documente van de Vereinigde Staote online. De naam Frans Timmermans kump regelmaotig in die stökker veur. In mei 2006 beveurbeeldj, ging `t euver `t succes van de SP in daen tied under the charismatic leadership of Jan Marijnissen. Zoeawie edere politieke junkie witj, is de SP oeats ontstange es `ne maoïstische (communistische) pertie. Laes mit waat Frans toen zei euver samewèrking mit dees aad-communiste:

In a separate meeting with the Ambassador on May 17, PvdA member (and close Bos advisor) Frans Timmermans rejected outright any possibility of forming a coalition government with SP. Timmermans stressed that Bos recognizes that even to hint at such a possibility would alienate large numbers of centrist voters both within and to outside the PvdA. In his view, it would be foolish for the PvdA to trust anyone who used to be a communist.

Die lèste wäörd zeen dus de letterlike wäörd van ome Frans. Des te opmèrkelik det oetgeraekendj hae noe leider wiltj waere vanne combinatie PvdA-GroenLinks. GroenLinks is in 1990 ontstange oet ónger angere de Communistische Partij van Nederland (CPN). Dan kóns se waal zègke: Ja chod, det is 33 jaor geleje. Mer `t wuuertj pas ech interessant es veer nao d'n Ieëste Kamer gaon kieke. In det deil vanne Staote Generaal vorme PvdA en GroenLinks noe al éín fractie. De veurzitter van die fractie is GroenLinkser Paul Rosenmöller. Frans zal toch waal oppe huuegdje zeen van `t feit det Rosenmöller vreuger `ne revolutionaire communis waas. Hae waas namelik van 1976 toet 1982 lid van de maoïstische ''Groep Marxisten-Leninisten'' (GML), wovan twieë jaor es bestuurslid. Mit dae kènnes zots se toch verwachte det Tömmermans véúr de verkezinge alvas `t vertroewe op geit zègke in deze PvdA-GroenLinks fractieleider. Mer ich kan uch op `n breefke gaeve det d'r det neet geit doon.

En waat zal Frans d'r dan van vinje det aad-CPN-fractieveurzitter Ina Brouwers oppe kandidatelies wiltj staon?

Wie zitj det noe mit det zuurstofmasker?

Nag dezelfdjen daag det Tömmermans ziene kandidatuur bekindjmaakdje lag Jeroen Pauw al e bömke ónger de campagne door zich kritisch oet te laote euver Tömmermans' optraeje bie de VN-veiligheidsraod euver de MH17. Pauw vónj dae speech sjandalig: alles waat Tömmerman hao zei waas gelaoge, aldus Pauw. Noe zots se kónne zègke det `t verhaol strict genómme neet gelaoge waas, mer `t waas in eder geval waal oeten dieken doem gezaoge. D'r wore gein aanwiezinge det die passagiers get höbbe zeen aankómme. Later det jaor zoot Tömmermans taengeneuver dat zure hoofd van Pauw (letterlike wäörd van Tömmermans; docu, 44:00). Jeroen Pauw bevroog dao Tömmermans kritisch euver det veurval.

Wie door `n wèsp gestaoke verzon Tömmermans ter plekke `t verhaol det d'r emes waas gevónje mit `n zuurstofmasker op zie gezich. Hae suggereert det dae persoean det dink zelf haw op gedaon. Det bleek dus kómplieët gelaoge. D'r waas inderdaad `ne Australische passagier gevónje mit `n zuurstofmasker, mer neet op `t gezich, mer ómme nak. D'r is gein inkel bewies gevónje det daen Australiër zich det dink zelf op haet gedaon.

Sins det veurval is Tömmermans pissig op Jeroen Pauw en is daoróm noeats mieë aan zien talkshowtaofel versjene. Det wuuertj nag get es Pauw in november `n verkezingsdebat mot gaon presentere.

Deze man wiltj dus premier van dit landj waere. Dan dink ich: gaon veer noe ech d'n eine Pinokkio vervange door d'n angere. En dan nog: daen eine Pinokkio haet geine journalis gecanceld, ómdet d'r `n kritische vraog stèltj. Tömmermans dus waal. Volwasse gedraag liek mich dan weer waal `n relevante eigesjap veur `ne minister-president en det liek Frans Tömmermans neet ummer te vertoeane.

Ideologische bezaetenheid

Naodet Tömmermans op `nen aos heef veur waat betröf `t veurzittersjap vanne Europese Commissie kreeg hae `n plan inne hendj geduujd waat koste waat kós door `t Europees Parmement mos waere geloeads: de Green Deal. Gein inkel instrument haet Frans inne gereidsjapskis laote lègke óm parlement en burger werm te make veur dit beleidsplan. Ich geluif ech det Tömmermans d'r heilig in geluif det dit nuuedig is óm de planeet te redde. Hae sjuut dao in mien uig dusdanig in door det alles geoorloofd is. Miense sjoew make mit aannames, wobie zelfs de doeaje neet mit rös waere gelaote. Storm Poly waas nanneet gaon lègke of de vrouw waat doe waas doeadgebleve, waerdje veur Frans' klimaatkerke gespant. Mesjiens bön ich get ongenuanceerd, mer ich vinj dit dus walgelik en premier-onwaerdig. De partner van die vrouw, dae tiedes `t tragisch veurval naeve häör innen auto zoot waas ouch not amused

Volkskrant-weitensjapsjournalis Maaren Keulemans hèltj Frans de wèts bie.

De actie van Tömmermans pas waal in `n petroean van klimaat-angsporno. Wo is d'n tied gebleve det veer El Niño nag de sjout kóste gaeve? Alle waersextreme waeren allewiel zónger motivatie 100% toegesjreve aan klimaatverangering en ederein waat daobie óm `t laeve kump is `ne klimaatdoeaje. Hae pleit zelfs veur `ne herdinkingsdaag veur klimaatslachoffers:

Dit is dus dezelfde Frans Timmermans es dae waat in 2015 `t volgende sjeef:

Diversiteit

Nag waal `t meis ironische aan dit verhaol is det de kopstökke van GroenLinks, die waat altied de moel vol höbbe van diversiteit, noe keze veur `ne blanke witte cisgender hetereoseksuele man. En det terwiel sommige pertieje ane (centrum-)rechse kantj van `t politieke spectrum `n vrouw baovenaan de lies zètte (BBB, VVD), wobie de VVD onnag geit veur `n dame van kluuer mit migratieachtergróndj.

I rest my case

En dan zeen d'r nag verhaole euver de ervaringe van Boris van der Ham mit Tömmermans (onsympothiek en naar beneden trappen, naar boven likken) en `t beukske waat Plasterk aop deej euver ome Frans. Mer ich laot `t hie bie.

Pater Noster
10-08-2023 | 20:00
© Mofert.nl