Live: beëdiging wèthajers

Mer ieës nag `nen houp begruuetinge.

Nag efkes en dan is `t zoea wied: `t nuuj kolleesj wuuertj beëdigd tiedes de gemèndjeraodsvergadering waat desnaovendj óm 19:30 oere beginj. `t Is `ne boemvollen agenda mit ieës nag allerlei begruuetinge en anger geldjzakes op `t program. Dan kump pas de prizzentatie van `t raodsakkaord Samen aan het Roer 2026-2030 en daonao, es agendapunt 14, steit pas de beneuming en beëdiging vanne wèthajers oppe lies. Es ze ieës nag al die begruuetinge wille behanjele, dan kómme ze toch vaart aant make. Einpitter Henk van der Linden (Ons Roerdalen) zal óngetwiefeldj waal `t ein en anger aan te mèrke höbbe op al die óngerwèrpe. Bie tiedgebrek haet me nag `n oetloupmeugelikheid nao volgende waek dónderdig, mer `t is neet winselik óm de beëdiging door tiedgebrek alweer `n waek oet te stèlle. Of ze motte besloeten óm d'n agenda óm te goeaje, mer `t is pólletiek zuverder óm die financiële besloete nag te laoten aafhanjele door de hujige wèthajer Jans Smits (Democraten Roerdalen), dae geldjzakes geit euverdrage ane nuje wèthajer Jos Paffen (PRO Roerdalen).

Wie dan ouch: 5 kandidate staon inne startblök óm Roerdale te gaon besture. En veer höbbe edere kandidaat `n vraog gestèldj.

Loes Vestjens

Pertie: Roerstreek Lokaal
Aantal fte: 1
Vraog: Wie geit de liestrèkker vanne grotste pertie, 4 pertieje van links toet rechs 4 jaor lank bie-ein haje?
Antjwaord: Vanoet alles wat we in de politiek gewind zeen, snap ich det miense kieke nao partieje es zeende links of rechts en alles wat d’r tussenin zit. Mer ich zou idderein gaer oet wille neudige óm `ns mit `ne angere bril te kieke.

RL!, DR, CDA en PRO zeen same good veur 7.413 van de in totaal 8.868 sjtumme… Ruum 83% van de sjtumme dus. Daomit zeen ich dit samenwerkingsverband neet es `n verzameling van links nao rechts, mer es `n heel sjoon en veural gedrage vertegewoordiging van de väöle versjillende inwoners die Roerdale riek is.

Til daobie op det ich es liestrekker vanne grotste partie tiedes `t formatieproces höb moge ervare det bie idder partie `t hert vlotter geit kloppe van `n Roerdale woe-in iderrein van 0 toet 100+ mit moog en kin doon en woe `t good wonen, werke en laeve is; den kins se ellein mer concludere det door same verantwoordelijkheid te nemen en inhoud en verbinjing baove eigenbelang te stelle veer allemaol samen `n sjoon biedrage kinne levere aan de toekoms van Roerdale.

Geit `t de kómmende 4 jaor den nooit botse tussen al die versjillende luuj? Vast waal…! Mer es v’r in det botse waal mit ein in gesprek blieve en truuk gaon nao de vraog wat v’r auch alweer wole bereike veur ós inwoners, óngernemers en verenigingen…den komme v’r d’r waal oet…Linksóm, rechtsóm of gebroederlijk door `t midde.

Roland Slangen

Pertie: Roerstreek Lokaal
Aantal fte: 1
Vraog: Waatfer óngerwerp zotj geer ech gaer in eur portefuij wille höbbe, waat geer noe neet höbtj gekrege?
Antjwaord: Ruimtelijke ordening.

Jan Smits

Pertie: Democraten Roerdalen
Aantal fte: 1
Vraog: Waem kwoom op 't idee óm mao 8 jaor finansië oet eur portefuij te haole?
Antjwaord: Roerstreek Lokaal is de grotste partie in Roerdale en daomit de kertrikker vanne formasie. De aafgelaope tied zeen d'r meerdere euverligke gewaes. Mit alle partieje same (ich verwies hieveur gaer nao de gesjpreksversljage oppe website vanne gemeinte) mer ouch door RL mit alle partieje afzonderligk. Bie die lètste gesjprekke zeen de partieje bliekbaar toet de conclusie gekómme det `t baeter zou zeen om finansië neit meer bie mich te laote.

Remco Vrinzen

Pertie: CDA Roerdalen
Aantal fte: 1
Vraog: Wie mot det mit eur wèthajersjap, es geer volgend jaor mieërt inne Provinciale Staote waertj verkaoze?
Antjwaord: Ich bön op dit momènt neet veurnömmes mich te kandidere (veur de Provinciale Staote, red.)

Jos Paffen

Pertie: PRO Roerdalen
Aantal fte: 0,2
Vraog: Woróm gaef geer de veurkeur aan (de facto) onbezoldigd wèthajersjap, baove de functie van onbezoldigd financieel adviseur?
Antjwaord: (Mónjeling beantjwaord en daoróm geparafraseerd en nao Mofers vertaald) In `t begin hawwe veer al de veurkeur óm `ne onbetaaldje wèthajer te levere, mer in `t begin leek det neet meugelik te zeen. Vervolges in óngerzoch op waatfer meneer `t meugelik zou zeen óm es ónbetaald adviseur `n biedraag te leveren aan `t bestuur.

`n Adviseursjap zou toch `n lestig verhaol waere; dao bleke toch `n aantal häök en uig aan te zitte. Zón functie Blief `n bietje hange tösse `t kolleesj en `t ambtenieëreapparaat. Es adviseur kóns se neet officiceel continu bie `t kolleesj zitte.

Vervolges haet me-n `nen ómwaeg gevónje, wodoor `t toch meugelik is om per saldo onbetaald te wèrke es wèthajer. Ómdet eder Nederlandse gemèndje per definitie `n ANBI status haet, kan `t truukgestort salaris ouch fiscaal waere aafgetroch. (Anges zou d'r belasting motte waere betaald euver inkómste die d'r per saldo neet zeet, red.) Daoóm is toch gekaoze veur `t wèthajersjap veur 0,2 fte.

Óm 19:30 begintj de raodsvergadering en dae is te volge op OR6 via Ziggo kanaal 41, KPN en XS4ALL kanaal 1507, via de site van OR6, of hie ónger.

Updaten 21:30 Stömminge zeen gedaon. Jan Smits is de mins populaire wèthajer binne de raod: 14 van de 18 stömme veur (d'r waas eine aafwezige), 3 blanco en ein stöm waas oetgebrach op `nen angere vanne lies van Democraten Roerdalen, namelik Iloy Goossens. Dinkelik wuuertj Goossens later vanaovendj beëdigd es gemèndjeraodslid. Daonaeve is hae ouch Staotelid veur BBB. Veer vermoede det Smits zelf op Iloy Goosens haet gestömp, meer veer zólle d'r waarsjienlik noeats achter kómme. Nuujkómmer Jos Paffen is de meis populaire wèthajer: hae is unaniem verkaoze. Beëdiging is ouch gedaon. Noe is sjorsing veur de felicitaties.

Updaten 22:08 Edje vanne Veurhaof (Democraten Roerdalen) beëdig es börgerraodslid van Roerdale. Det waas: te verwachte. Wiejer ouch beëdig es börgerraodslid: Mark Meuwissen (Democraten Roerdalen), Roy Wolters (CDA) en Diëgo Helwegen (Ons Roerdalen)