Patere: De linkse wolk is `n verzinsel van de VVD

Óm wied weg te blieve van `t stikstofdebat.

Zelje waas d'r zoeaväöl aandach veur de provinciale staoteverkezinge es dit jaor. D'n oearzaak daovan motte veer neet inne provincie zeuke, mer in Den Haag. De crises stapele zich op en `t vertroewe in Rutte-IV is toet `n dramatisch deeptepuntj gedaald. In de peilings haet de coalitie inne Twieëdje Kamer nag mer `n 50 zetels euver van de 78; det is dus nag mer ein derde. En aangezeen de Provinciale Staote de leje vanne Ieëste Kamer keze, is deze onvrede `n belangriek thema bie dees verkezinge. De regeringspertieje höbbe noe al gein mieërderheid innen Ieëste Kamer (43%), mer volges peilinge van Maurice de Hond zou det percentage zoeamer `ns 7 procentpuntj kónne dale nao 36%. De nuje senaat kan straks flink get wètgeving frustrere en dus zal Rutte zich - es `t geit óm nuje wètte - motte sjikke nao `t nuje politieke landjsjap waat zich nao goonsdig zal gaon aafteikene.

Linke wolk

En dan opèns, in `n interview inne Telegraaf, touvere Rutte en Schippers de linkse wolk oete hoeagen hood. Wo kump det in gaodsnaam opèns vanaaf? Óm `ne mieërderheid innen Ieëste Kamer te haole, bewees de linkse oppositie zich de aafgeloupe jaore es troewe slöppendraeger. `t D66-beleid waat Rutte-IV oetveurt wuuertj mit alle plezeer gesteund door mit name PvdA én GroenLinks. Rutte en GroenLinks slaopen al jaore op éín kösse en dan zou d'r noe opèns spraoke zeen van `ne relatiebreuk? Det is op zien zaachs gezag opmèrkelik.

De heite aerpel dae stikstof hètj

Zoea langzamerhandj kump d'n aap oete moew. Zón bietje `t meis controversiële óngerwerp van dezen tied - de stikstofkwestie - wuuertj stèlselmaotig genegeerd door de VVD tiedes deze campagne. Zoeawaal Rutte es Schippers laote dae heite aerpel lever in `t kèlle aafkeule toet nao de verkezinge. Schippers weigerde te reagere op `n stèlling euver stikstof in `t verkezingsdebat van WNL op Zondag. Ik reageer niet op stellingen die bedoeld zijn om te polariseren, waas de motivatie. Bullshit natuurlik. De stèlling Meer koopkracht, minder asielzoekers waerde waal loestig door Schippers beantjwaord; esof die stèlling neet polariseert.

Eine van de prominentste taengestenjers van `t stikstofbeleid, BBB-veurvrouw Caroline van der Plas, daagde VVD-leider Rutte oet veur `n ein-op-ein-debat. In ieëste instantie haw d'r daen oetnuuediging genegeerd, mer wie de premier in `n oetzending van Jinek op 22 februari daomit waerde geconfronteerd, bewaerde hae det d'r dao waal veur te porre waas. Hae stèldje veur óm det tiedes `t slotdebat oppen daag veur de verkezinge te doon.

Geregeld, zóts se dinke. Mer Markie waas effe vergaete det de NOS `n strakke planning haet mit det slotdebat en des se dao neet zoeamer efkes op verzeuk `n extra ein-op-ein-debat drin kóns fietsje. Hae snap toch ouch waal des se es leider van `n politieke pertie neet zoeamer kóns bepaole waat d'r oppe NPO wuuertj oetgezónje; det geit allein es se van D66 bös.

En dus, waerdje Jaïr Ferwerda, de politiek verslaaggaever van Jinek, op paad gesjik óm `n debat te fixe. Mer waat dinks se? Doe troch die sjietbóks van `ne Rutte opèns de keutel in, want: drök, drök, drök. Op de terechte suggestie van Ferwerda det Rutte deze twieëstried oet de waeg liek te gaon, reageerde de premier det hae gaar geine stried haet mit Caroline, mer mit de linkse wolk. Serieus? Geine stried mit Van der Plas? `t Ganse jaor al zitj Caroline zich inne haor mit `t kabinet, inne persoean van VVD-minister Van der Wal. En óngertösse haet Rutte aan dae linkse wolk `ne troewe bóndjgenoot óm de stikstofwèt, de spreidingsdwangwèt en de engergietransitie doren Ieëste Kamer te loeadse. Volges Rutte gaon dees verkezinge neet óm stikstof mer óm belastingverhuueginge. Huh?! Dao höb ich tiedes dees campagne dus nag geinen hóndj euver gehuuerd. Ouch totale bullshit dus.

Keuzes make

Wie gezag zoot daen agenda van Rutte knatjsvol. Ieës ging d'r nag `n paar daag weg (vekantie dus) en daonao haw d'r allemaol campagne-dingskes. De agenda waas `ne ramp, zag d'r. Det is waal hieël raar, want op 2 mieërt bleek opèns det d'r waal tied haet óm kómmendje maondig bie de hieëre van Vandaag Inside te gaon zitte. En daen aafspraok stóng op det moment nanneetèns vas, dus Rutte haw waal degelik `n plaetske vrie innen agenda véúr de verkezinge. Nou, dao zal d'r dan waal weer gein actieve... ochja, geer weit waal waat ich mein.

Det optraeje bie Vandaag Inside geit Rutte trouwens ouch weer stömme oplevere. Johan Derksen kan hieël good `n miens aaffakkele es dae d'r op det moment neet bie is. Mer es daezelfdje persoean dao aan taofel zitj, dan wuuertj zienen toean significant genuanceerder. Op `t ènj vanne aaflevering zal Derksen zègke dan toch mer VVD te gaon stömme bie gebrek aan baeter. Waat ich dich brom.

VVD vruueg, Pauw drejt

En waem luuet zich (weer) veur `t VVD-kerke spanne? Precieees: BNNVARA en VARA-coryfee Jeroen Pauw. Zie vónje `t `n good idee óm kosbare primetime-zendtied te verspille aan `n debat waat nörges euver geit en wo nemes op zit te wachte. De insigste raeje det miense daohaer gaon kieke, is óm te zeen of `t Caroline is gelök óm `n plaetske oppe veurste rie te bemechtige.

Sam Hagens is `t trouwens mit mich èns. Det geer `t effe weit.

`t Excuus van Jeroen Pauw is det ze de twieë grotste pertieje (innen Ieëste Kamer) höbbe gepak. MER DET IS DUS NEET ZOEA. PvdA en GroenLinks zeen namelik twieë apaarte pertieje en zeen twieë apaarte fracties innen Ieëste Kamer. Det zie höbbe aangekondigd det ze inne volgende termien inne senaat `ne gezamelike fractie gaon vorme, det moog dan waal zoea zeen, mer of ze dan ouch bie de grotste twieë fracties huuere, vèlt nag te bezeen.

Stömwiezer

Höbtj geer nag ummer gein idee wo-op geer mot stömme dan zeen d'r uiteraard weer allerlei van die stömwiezers: Stemwijzer, Kieskompas, num mer op. Kómtj geer dao onneet oet, ómdet die beveurbeeldj weer allemaol versjillende oetslaeg gaeve, probeer dan `ns de stömwiezer van Jan Dijkgraaf.

Pater Noster
09-03-2023 | 19:40
© Mofert.nl