Koeltoerkatern: nuuj leedjes van La Bamba en Zenger Rotsjo

Net oppertied veur `t vestelaovessezoen.

La Bamba: Vaste♥ndj 4Ever

Vaste deilnaemers van `t LVK zeen al jaore Harrold en Ron van La Bamba. Ouch dit jaor zitj d'r weer `n inzending in mit dit nuuj leedje Vaste♥ndj 4Ever. Jao, geer laestj `t good: d'r steit ''vaste-love-ndj'' en det ''love'' sjreive ze dan es `n hertje. Veer zeen benuujd wie döks det dit door de browsers wuurtj waergegaeve es: ''Vasteë¿ndj'' of zoeaget. Waal leuk bedach.

Es meziek haet Ron van Jo van Seef dit kieër veur dance gekaoze. Meugelik wille ze hiemit de jeug aanspraeke, mer waarsjienlik zal ein of angere DJ dit nag door ziene laptop motte haole óm `t veur daen doelgroep interessant te make. Op `t lès probere ze mit daen intrumentale brök onnag happy hardcore d'r in te waeve, mer volges ós huuerdje dae gabberhouse zich vreuger gans anges aan.

De tekste zeen opgeboewdj wie veer van Ron waal dökker höbbe gezeen. De coupletjes mit per regel éín veurbeeldj waat dan taengeneuver de Limburgse vastelaovendj waere gepositioneerd. Vervolges wuuertj in `t refrein dae Limburgse vastelaovendj oetgebrèdj aangepreze. Ein dudelik veurbeeldj hievan is ''Veer moge weer'' oet 2017.

Zenger Rotsjo: Sjeet op

De gebäörtig Moferter singer-songerwriter Rotsjo haet op `t nipperke veur `t vastelaovessezoen onnag `ne hit oete pen gepers. Oppe meziek van Sexmachine van James Brown haet d'r `n herkènbaar thema ónger wäörd gebrach. `t Geit namelik euver `t scenario es se in `n kefee dós kries en `t stervesdrök is ane tap. Van die momente des se dinks aan twieë wäörd, nege lètters. Dit kieër haet Rotsjo `ns neet alle karakters inne videoclip zelf gespeeld, mer zeen d'r nag rolle weggelag veur angere.

De opnamelocatie is, zoeawie sommige luuj al höbbe gezeen, Kefee De Knoterpot. De rol van kastelein Johan wuuertj dan ouch vertolkt door zichzelf.

Zenger Rotsjo in Kefee De Knoterpot