Jeugjournaal truukkieke: ''veer in Mofert höbbe väöl trakters''

Gein spang tösse te kriege.

Gister waas `ne belangrieken daag veur `t Limburgs. Inne Provinciale Staote waerdje doe `t Uitvoeringsprogramma Limburgse taal ''Same veur `t Limburgs 2025-2027'' bespraoke. Bie hoeage oetzunjering moch tiedes det agendapuntj plat waere gekaltj in `t Limburgs Parlement. Ein en anger mot oeteindelik leie toet `n deil 3-erkènning van `t Limburgs, womit oos plat dezelfdje status es `t Fries zou kriege in Nederlandj.

Veur `t Jeugjournaal waas det `ne raeje óm `n cameraploog nao `t zuje te sjikke óm op `n basissjoeal qoutejes op te haole. Daoveur streke ze neer op Basissjoeal ''De Hovenier'' in Mofert. Behalve voxpop wole ze natuurlik ouch `n paar Moferse zinkes huuere. `t Meis exemplarisch Mofers zinke kwoom van van Yuri: veer in Mofert höbbe väöl trakters. Twieë maedjes kwome nag mit de veurbeeldje miens stevele zitte ónger de pratsj en ich wanjel gaer mit miene kielf in `t bós.

Kielf is trouwens `n waord waat oearsprunkelik oet `t Remunjs Begoons kump en wuuertj in Mofert veurnamelik gebroek door jóngere. Meugelik höbbe veer hie te make mit `ne Remunjse expansie ónger invloed van Remunjse vastelaoves-popcultuur. Toch sprook `t maedje mitte stevele ónger de pratsj onvolpreze Mofers en zeker gein Remunjs; in `t Remunjs zou `t ''sjtevele'' zeen. En d'r waas ouch nemes waat `t zinke Wie se oetzuus gebroekdje; of dae höbbe ze droetgeknip, det kan ouch.

Veer kónne toch waal constatere det in Mofert de kinjer óngerein op sjoeal nag ummer euverwaegend plat kalle. In ein stad wie beveurbeeldj Remunj is det zeker neet mieë `t geval. En det is haopvol veur `t Mofers.