Kómkómmertied: Nuje aanduding van "Verenigd Links" is: "Partij van de Arbeid (PvdA) / GROENLINKS"

...of ''GROENLINKS / Partij van de Arbeid (PvdA)''; det kan ouch.

Dit wuuertj `t dus neet

"Verenigd Links" zal neet op `t stömbiljet es "Verenigd Links" waere geneump. En onneet es "RoodGroen". Det kónne veer noe al mit zekerheid zègke. D'n insigste meneer óm mit twieë (of mieë) pertieje mit `n gezamelike lies aan `n verkezing mit te doon is door middel van samenvoeging van aanduidingen, ofwaal door gebroek te make van Artikel H 3 lid 3 vanne Keeswèt. Det lid guuef d'n indener van `n keeslies de meugelikheid óm de name van de versjillende politieke pertieje (of de aafkortinge daovan) same te veuge toet eine gezameliken aanduding.

De aandudinge van de apaarte pertieje (en/of de aafkortinge) motte daoveur waal in `t register vanne Keesraod staon. Toet aafgeloupe maondig hawwe de pertieje de kans óm daen aanduding te laote verangere. De Keesraod maakdje maondig geliek al bekindj det de PvdA dao gebroek van haet gemaak: zie verangerde de aafkorting van "P.v.d.A." in "PvdA"; zónger puntjes dus.

De Keeswèt sjrief aevel neet veur waatfer volgorde mot waeren aangehaje; waarsjienlik moog d'n indener det zelf bepaole. Ouch zaetj de Keeswèt nieks euver wie de versjillende aandudinge vanein gesjeie waere; of det `ne spatie, `ne sjuunse streep, `n koppelteike of get anges is, det sjrief de Wèt neet veur. Óm te kieke waat dao-in gebroekelik is, kieke veer nao de gemèndjeraodsverkeziginge van 2022 in Roerdale. Dao deje de lokale aafdeilinge vanne PvdA en GroenLinks alvas `n vingeroefening door mit `ne gezamelike lies te kómme. D'n aanduding van dae lies waas "Partij van de Arbeid (P.v.d.A) / GROENLINKS". `tzelfde Zeen veer ouch bie de Provinciale Staoteverkeziginge van dit jaor in beveurbeeldj Zieëlandj, wo die twieë pertieje ouch al bie-ein in bèd loge. De twie name zeen dus gesjeie mit spaties en `ne sjuunse streep.

Ich gaon d'r dus van oet det de naam van dae gezamelike lies zal waere "Partij van de Arbeid (PvdA) / GROENLINKS", mer angesóm ("GROENLINKS / Partij van de Arbeid (PvdA)") zou ouch kónne. `t Is onnag meugelik det vanne PvdA allein mer d'n aafkorting wuuertj gebroek, dus "PvdA / GROENLINKS" OF "GROENLINKS / PvdA".

Gemiste kans

Ze zègke döks det linkse miense dök creatief zeen. Ich constateer det det bie die knakkers van PvdA/GroenLinks vies taenge vèlt. Zie hawwe waal degelik de meugelikheid óm `ne nuje gezamelike naam baovenaan die lies te laote drökke. Es de PvdA häören aanduding haw laote verangere in "Verenigd" en GroenLinks häören aanduding haw laote verangere in "links", dan haw dae gezamelike lies d'n aanduding "Verenigd / links" gekrege. "Rood / groen" of "Groen / rood" waas dan ouch meugelik gewaes. Door creatief te zeen mit aandudinge, hawwe ze hie Nederlandj kónne verrasse. `n Gemiste kans, es se-n `t mich vruuegs.

Van Haga's ego

Wybren van Haga (BVNL) haet de lèsten tied `n paar stömmetrèkkers binnegehaoldj óm `ne zetel bie-ein te sprokkele. De bekindje pertiezwerver Henk Krol is door Van Haga op nómmer twieë vanne lies gezat. Det terwiel de pertie van Krol "Lijst Henk Krol" onnag ummer besteit en ouch in `t register vanne Keesraod steit. Op nómmer drie vanne lies kump FDF-veurvrouw Sieta van Keimpema te staon. Det zeen waal väöl egootjes zoea aan `t begin van dae lies van Van Haga. En det duit get mit `ne miens, namelik mit `t grotste ego (Van Haga zelf). Waarsjienlik haet hae daoróm de aanduding laote verangeren van "Belang van Nederland (BVNL)" nao "BVNL / Groep Van Haga".

Logo's

Behalve de pertienaam, kóste de pertieje uterlik maondig `n logo laote registrere. De nuje pertie "Nieuw Sociaal Contract" haet häör logo (waat toch al neet d'n orginaliteitspries zou winne) neet laote registrere. Baovenaan dae lies zal dus allein de liesnómmer enne naam vermeldj staon, zónger logo.