Coalitiekal: de bepirkdje verantjwaordelikheid van Jos Paffen en PRO

Verantjwaordeliheid naeme, mer toch ouch neet.

Roerstreek Lokaal, Democraten Roerdelen, `t CDA en PRO Roerdalen (veurhaer GroenLinks-PvdA) gaon same oetveuring gaeve aan `t raodsakkaord in Roerdalen. Det höbbe de pertieje `n paar waeke geleje al laote weite in `n gezamelike verklaoring. Ieëre waas al bekindj det dees 4 pertieje wiejer ginge kalle óm toet `n coalitie te kómme.

Wèthajersverdeiling

D'r zeen 4 kandidaat-wèthajers: Loes Vestjens en Roland Slangen van Roerstreek Lokaal!, Jan Smits van Democraten Roerdalen en Remco Vrinzen van `t CDA. Opvallend is det PRO geine wèthajer levert, mer PRO (neemt) verantwoordelijkheid door Jos Paffen af te vaardigen als onbezoldigd adviseur op het gebied van financiën. Oet de formatiegesprekke kwoom dudelik de wins nao veure óm mieë in control te zeen. De financiële situatie waerdje volges PRO tiedes die gesprekke ómsjreven es `ne rollercoaster. Daoróm druueg PRO veurmalig financial controller Jos Paffen aan óm de gemèndjefinansië weer oppe rit te kriege. (En noe is `t klaor mit al die Ingelse terme, red.) Paffen (LinkedIn) geit ónbetaald ane slaag es financieel adviseur van `t kolleesj. De exacte invölling en aafspräök zeen nanneet gans dudelik en waere inne kómmendje periode in samewèrking mitte gemèndjesikkertaer oetgewèrk.

Bestuurlike verantjwaodelikheid?

De gezamelike verklaoring wuuertj gekop mit Roerstreek Lokaal!, Democraten Roerdalen, CDA en PRO nemen bestuurlijke verantwoordelijkheid voor uitvoering raadsakkoord Roerdalen 2026-2030. Mer waatfer verantjwaordelikheid nump PRO dan persies es zie geine wèthajer levere, mer `ne - zoeawie det dan in deftig Nederlandsj hètj - onbezoldigd adviseur. Nao vraoge van Mofert.nl aan PRO Roerdalen kump dao gein dudelik antjwaord op. De wèthajer dae geldjzakes in zien portefui haet is pólletiek verantjwaordelik en de gemèndjeraod is houfverantjwaordelik veur de gemèndjefinansië. Oeteindelik verklaordje fractieveurzitter Patrick Joris det d'r op dit moment gein spraoke is van bestuurlike verantjwaordeliheid, mer det det nag aafhankelik is van de persieze invölling vanne adviseursrol in samespraok mitte gemèndjesikkertaer.

Geldjzakes geit nao 8 jaor weg oet portefui Smits

Börgemeister Van Agtmaal is de beougdj portefuihajer geldjzakes. Det is opmèrkelik, ómdet Jan Smits al zoealang hae wèthajer is (sins 2018) geldjzakes in zien portefui haet zitte. Noe liek `t d'r dus op det dit belangriek óngerwerp weg geit bie de wèthajer vanne meis rechse pertie van Roerdale en de kómmende jaore sterk wuuertj beïnvloed door `nen adviseur vanne meis linkse pertie vanne gemèndje.

Installatie wèthajers

D'n installatievergadering van `t nuuj kolleesj steit gepland op 11 mei. Waarsjienlik zal dan ouch mieë dudelik waere euver de exacte invölling van de rol van Paffen en de biebehuuerendje aafspräök. Ouch zal dan `t raodsakkaord veurlègke.