Limburgse Vastelaovesleedjeskal (LVK): De top 11

... volges Pater dan, hè.

Aljaors róndj de finale van `t LVK kóm ich mit `ne top 11 van nuje vastelaovesleedjes. Hie vinjs se de sjiekste, nuujste en meis trendy vastelaovesleedes van dit sezoen. Geliek hie-ónger steit de YouTube-playlist en dao-ónger eder leedje apaart, veurzeen van interessante feitjes.

Op Nummer Eins nómmer éín steit dit jaor Pruuf Mar mit `t leedje Ojjem Blieve Hale. Broor en zus Koonings höbbe zelf ouch mitgesjreve aan `t leedje; det wiltj zègke Tamara aan de teks en Stef aan de meziek. Mark van Mullekom steit es ieëste auteur vermeldj veur zoeaweel de teks es de meziek en Jerôme Lenders steit onnag es mede-componis vermeldj. Es finalis van `t LVK verwach ich toch minimaal `t linker rieke.

Pruuf Mar wuuertj oppe voot gevol door `t Valkebergse duo Any en Roy mit `t Daak d'r aaf. Nae, veer höbben `t hie neet euver de Wolfgang Petry-cover van Miesjke, mer euver `n nuuj leed wovan de zoeawaal de teks es de meziek is gesjreve door Vleddig-frontman Frans Hermans. Bie `t LVK zeen ze minder fortuinlik es in deze top 11: `n plaetske inne finale waas neet veur häör weggelag. Es ich zoea nao de clip kiek vraog ich mich aaf of ze dae in detzelfde boewvallig urbex-pandj höbbe opgenómme es wo La Bamba dit jaor dae hallucinante clip haet gesjaote.

Dan gaon veer door mit `n nómmer waat `t in `t LVK neet de halve finales haet gehaold. Ónger `n mom van D'r mot waal `ne echte band inne top 11 staon prizzenteer ich uch: Bieske mit Toeter. Ich höb dees band zelf nanneet live zeen optraeje, mer mich tunk det zie oppe buun nag baeter oete vèrf kómmen es vanaaf `t sjerm. De maote van engergie waat van zón buun aaf kump mot waal hoeag zeen, mer blief waal aafhankelik van of leadzenger Nick van Oerle ziene Ritalin haet genómme.

Veur `t ieës `n plaatsgebónje leedje in deze top 11. De Zoepneus oet Vènraoj haet oetgepak mit `n ode aan häör woonplaats. In jaore-tachtig-look, aafgewisseld mit de sjabbe-look, zinge zie euver ónger angere d'n trespa van `t plaatselike winkelcentrum en de pislóch in ein of angere vootgengerstunnel. Mieke (van Bjorn en Mieke) zorg veur de hogere neutjes op `t inj. Teks en meziek zeen van Lijn 87 (waarsjienlik `n saort van Lien-80-hooligans; nag oetzeuke, red.). Gehieël onterech zeen ze neet doorgedrónge toet de halve finales van `t LVK, of - zoeawie zie det zelf bewaere - zeen ze inne '''kwartfinales''' blieve staeke.

Wo zeen veer gebleve? Och jao, nómmer 5. Ouch hie `n leedje waat neet inne finale van `t LVK is gekómme. De Wieërtenieër Stefan Wolter mit Ein.. Twieë.. Drejje! Teks is van Mark Bouwmans en meziek van Mark Bouwmans en Ronald Moonen. Wiltj geer hie onnag `n ''''feitje'''' euver weite? Alleh dan: ich höb oet ieëste handj vernómme det dae maot kan zoepe wie `ne kaetellepper.

Op plaats 6 goje bekindje in dees lies: Spik en Span. Dit jaor nao mien meining neet zónnen topper wie de aafgeloupe jaore, mer good genóg veur in `t lieske: Dao!. Zoewie veer det de lèste jaore zeen gewindj höbbe Jo en Niek zelf de meziek gemaak en Niek same mit Jos Wackers de teks. LVK-finalis!

Nag `ne nuujkómmer in dees lies op nómmer 7 inne persoean van Maud du Chatinier. Det klink hieël Frans, mer de teks van Pak mich vas! is gewuuen in `t Limburgs plat. Helaas ouch blieve plekke innen halve finales van `t LVK, mer toch good veur `n zevende plaats in dees lies. De teks kump oete pen van Paul Leenen en Ronald Claessens haet de nuuetjes oppe belk geteikendj.

Sjup & Sjoop, de hoes-dj's van CV Nooit Genog, staon op nómmer 8 mit Film Kwiet. Normaal is van daen dance-meziek neet zoeazieër mien teske tieë, mer veur de nueudige variatie zeen ze toch in mien lieske terechgekómme. Ich kan `t ouch waal waardere det ouch vanoet daen hook limburgstalige meziek kump, waat dan weer `ne gans angeren doelgroep aansprik. Det is good veur de vastelaovendj en good veur de streektaal. Gaonjt zoea door, men! Daonaeve höbbe ze nag `n streepke veur ómdet inne clip beelje van Mofert veurbie kómme.

Update 4-2-2023: Kump dae John Tana éínen daag nao `t bekindjmake vanne top 11 nag mit get nuuts aankakke. Det wuuertj dan plaats ach en `n half.

Boete mededinging

De volgende leedjes staon waal oppe lies mer doon boete mededinging mit. Det is ómdet de sjriever van dit stök direc of indirec `ne zoeadanige betrokkenheid haet det d'r neet de nuuedige objectiviteit kan betrachte.

Op nómmer 9: D'r Tim mit De voesregel. Veurgaonde jaore kwoom deze jóng oet Kirkraoj mit `n get flotter nómmer, mer dit kieër haet d'r same mit Dwayne Horbag `ne ballad gesjreve (Meziek: Dwayne, teks Dwayne en Tim). Mit de halve finales van `t LVK en bie CMC Alaif höbbe veer kónne zeen des se dae jóng neet mos laote playbacke. Neet det d'r det neet kan, mer doe zuus toch waal det playbacke neet zien dink is. Deze arties mos se live zeen en det kan op vastelaoveszaoterdig bie de Vogel op `t Uulebal vanne Moferter Uulkes. Dit jaor zitj D'r Tim veur `t ieës inne finale van `t LVK. En es geer uch aafvruueg waem die Celine oet de clip is: ich kan uch oet ieëste handj vertèlle det die gaar neet besteit.

Op plek 10 vinje veer Ivana, ouch emes oet de stal van Limbo Studio's. `t Leedje Veer zeen dao! is helaas blieve staeke inne halve finales van `t LVK, mer is waal Broenssems leedje van `t jaor. Teks en meziek zeen van d'r Tim Hamers. Lèt ouch `ns op die vakkundig ingezónge kuuerkes.

En last but not least in dees lies is de nuje van Sjpringlaevend: 16 Jaor. Verrassend genóg zeen zie dit jaor neet door nao de finale van `t LVK. De meziek is gecomponeerd door Sjpringlaevend-frontman Dwayne Horbag en de teks is bedach en opgesjreve door teksdichter Bas Keltjens. De videoclip mot geer uch zeker `ns bekieke, want dae bevat acteerwèrk wo ze bie GTST nag `n puntje aan kónne zuge. Dit duo kóntj geer trouwens ouch live zeen en huuere op vastelaoveszaoterdig bie de Vogel tiedes `t Uulebal.

Nag mieë top 11's

Hie-ónger vinjs se nag mieë playlists van veurgaondje jaore: