Eindelik: geine hónjsbelasting mieë
Veur de res wuuertj alles duurder.
Wo de politiek in Den Haag d'r `n paar waeke aan óngerhanjeling veur nuuedig haet óm `t èns te waere euver `n begruueting, wuuertj inne gemèndje Roerdale `t belastingplan in 27 minute aafgehamerdj, inclusief stömming. Jao, de rieksbegruueting is óngetwiefeldj `n stök complexer dan dae van `n plattelandjsgemèndje en jao, inne gemèndje haet geine chambre de réflexion wo `n mieërderheid bie-ein mot waere gesprokkeld. Toch mot gezag waere det `t belastingplan van 2025 van Roerdale d'r zónger väöl bomarie doorhaer is gefietsj. Mit name de hónjsbelasting is get wo me zich al jaore euver straevelt inne raod. Door sommige waerdje dae belasting es ajerwèts besjouwd en discriminerend veur luuj waat `n bepaoldj saort hoesdeer höbbe. Dae belasting is vanaaf begin 2025 verlèjjen tied.
CDA-fractieveurzitter Remco Vrinzen haet `t inne raodsvergadering van desnaovendj euver `n wónjer, det dae verrèkdese hónjsbelasting noe eindelik geit verdwiene. Twieë jaor geleje deendje hae al `n motie in mit es doel de hónjsbelasting aaf te sjaffe. D'r zou dan óngerzoch motte waere of det gedèk zou kónne waere mit `t inveure van `ne forenzebelasting. Dae motie waerdje doe weggestömp door de toenmalige coalitie. Noe zeen de kaarte anges gesjödj. Naodet de fractie PvdA-GroenLinks ènj veurig jaor oet de coalitie waas gestap, haet de CDA-fractie zich bie de coalitie geveug en zitj pertieleider Frank Demarteau ane knuup es wèthajer. Veurig jaor waerdje inne programbegruueting al aangekóndig det `t kolleesj (toen nag zónger Demarteau) van plan waas deze belasting per 2025 aaf te sjaffe. `t Kolleesj veug noe d'n daod bie `t waord en stèldje veur óm de verordening hónjsbelasting in te trèkke, waat dore raod unaniem waerdje aangenómme.
Alles wuuertj duurder
Örges zal toch geldj vanaaf mótte kómme óm de begruueting sloetendj te kriege, want ouch veur de gemèndje wuuertj alles duurder. Van forenzebelasting is nag gein spaoke inne gemèndje Roerdale. De klassieke gemèndjelike milkkoe, de OZB, zal in 2025 zoea óngevieër 0,02 procentpuntj hoeager waere: de gebroekersbelasting geit van 0,16219 nao 0,1865 %; eigenieërebelasting geit van 0,10434 nao 0,11981 % veur weuninge en van 0,21247 nao 0,24431 % veur neet-weuninge. Ouch de toeristebelasting zal hoeager waere, namelik € 2,20 veur campings en logies en € 2,24 veur euverige verblieve de man per nach. Veurhaer zote die bedrage ónger de € 2,-. De rioolheffing geit, aanhankelik van `t waterverbroek mit `n paar tientjes ómhoeag. Veur waat de reinigingsheffing betröf geit `t vas tarief toet `ne bak van 80 liter van € 243,- nao € 259,-; `t tarief per laegmaakbeurt verangert neet. Begraafrech wuuertj bekans verdöbbeldj, mer det is veur Mofert neet relevant, ómdet `t kirkhaof van Mofert neet vanne gemèndje, mer vanne parochie is.