Ultieme boeredörp levert geinen eine kandidaat veur BBB
En veur angere pertieje trouwens onneet.
De blinje vlek van BBB róndj Mofert. (bron: BBB Limburg)
Geer laes `t good, jao. Oppe kandidatelieste vanne BoerBurgerBeweging veur de Provinciale Staoteverkezinge van 15 mieërt steit geinen eine kandidaat oet Mofert. Veur zónne agrarische gemeinsjap wie Mofert zots se det waal verwachte, mer nae: nul kandidate oet Mofert. Det geldj trouwens ouch veur alle angere lieste die bekindj zeen gemaak. CDA neet, VVD neet, SP neet, GroenLinks neet, LOKAAL-LIMBURG neet, Partij voor de Dieren neet.
D'r mot waal waere gezag det neet alle lieste al bekindj zeen. Van de zittende pertieje höbbe FvD, PVV, D66 en 50PLUS nag gein lieste bekindj gemaak. Dao zou natuurlik nag waal `ne Moferter op kónne staon, mer det blief aanwachte.
Aafsplitsers
Ultieme aafsplitspertie FvD verloor vanwaege `t debacle mit róndj de Thierryjugend al 4 van de 7 fractieleje. Die ginge wiejer ónger de naam Samen voor Limburg (SVL). In september veurig jaor sloot de fractie zich aan bie JA21, óm zich in december weer truuk te trèkke en toch weer wiejer te gaon ónger de naam Samen voor Limburg. Jao, jao, `t is mich met ane rechter kantj van `t Limburgse politieke spectrum. JA12 haet `ne kandidatelies gereid mer nanneet gepubliceerd. SVL haet neet bekindj gemaak of ze überhaupt ane verkezinge van 2023 mit gaon doon.
Ónaafhankelik staotelid Emma Palmen haet zich `n jaor geleje aafgesplits van `t CDA. Emma (veer moge Emma zègke) is zèk mer `n saort van Mona Keijzer, mer dan mit `n eige pertie. Die nuje pertie Omzien! haet twieë kandidate wovan geine oet Mofert.
De FvD blief zichzelf vergreumele. Staotelid Roel Westhoff splitste zich ènj augustus veurig jaor aaf nao aanleiding van pro-Putin oetspräök van pertieleider Thierry Baudet. Of Westhoff de kómmende verkezinge kandidaat is, is nanneet bekindj, mer politiek auteur Chris Aalberts mèntj `m gezeen te höbbe op `t pertiecongres van BVNL. Ouch BVNL haet nag geine kandidatelies veur Limburg bekindj gemaak.
Ik vermoed Roel Westhoff te zien, de laatste FvD-afsplitser in Limburg waarvan niemand wist waar hij bij zat. Kennelijk dus bij BVNL.
— Chris is erbij (@ChrisIsErbij) December 10, 2022
Veur noe is d'r nag geine Moferter kandidaat bekindj. D'r motte nag `n aantal lieste bekindj waere gemaak veur de Provinciale Staoteverkezinge. Meer ouch de Waterschapsverkezinge zeen op 15 mieërt, dus dao kómmen onnag `n deil lieste veur. Aafwachte dus.