Drie Moferter beëdig es börgerraodslid Roerdale

Mit ondudelikheid euver Diëgo Helwegen.

Desnaovendj zeen inne gemèndjeraodsvergadering van Roerdale 3 Moferter beneump, beëdig en geïnstalleerd es börgerraodslid. Börgerraodsleje naeme gein besloete, mer zitte inne raodsaviescommissie; zie advisere de raod en bereie stökker veur. Zie waere door de pólletieke pertie, woveur zie oppe lies stónge, veurgedrage. Van Edje (Kurstjens) vanne Veurhaof (Democraten Roerdalen) waas al bekindj det hae dae rol ging vervölle, naodet d'r zien raodszeter neet innoom. Wiejer waas Mark Meuwissen ouch door Democraten Roerdalen veurgedrage. Roy Wolters (CDA) greep op `n paar zetels nao mis óm mit veurkeurstömme inne raod te kómme. Dees redactie pleitte al veur `n rol es börgerraodslid veur deze jónge Moferter.

Opmerkelik is waal det in `t raodsveurstèl ouch Diëgo Helwegen (Ons Roerdalen) steit geneump. Mer hae is tiedes dees vergadering neet beëdig en dao waerdje wiejer ouch nieks euver gezag. Helwegen profileerde zich inne verkezingscampagne es belangebehertiger veur de Sinti-cultuur; hae is getrouwd mit `n Sintezza. Helwegen waas mit 41 stömme de 6e Moferter in de aafgeloupe verkezingen, geliek achter Roy Wolters.

Inne veurige raodsperiode zoot Constant (Frenken) van Genouwe es börgerraodslid inne raodsadviescommissie. Hae is dit kieër neet veurgedrage door CDA Roerdalen en is dus gein börgerraodslid mieë.