Verkezingskal: tonnag `ne Moferter kandidaat

Mer dan waal neet veur Provinciale Staote

Veurige maondj meldje veer nag det d'r oppe kandidatelies vanne BBB veure provinciale staoteverkezinge geinen eine Moferter steit. En det is nagal opmèrkelik veur zón boeredörp. Mer behalve veur de Provinciale Staote moge veer op 15 mieërt ouch `n vekske roead kluuere veur `t watersjap. En dao zeen veer dan toch `ne Moferter boer oppe kandidatelies staon: Edje vanne Veurhaof. Edwin steit es vice-liesdujer op nómmer 25 vanne BBB-lies.

Euvergestap

Mitte veurige Watersjapsverkezinge stóng Edwin nag oppe lies van Waterbelang Midden-Limburg. Waterbelang Limburg is `n saort van CDA mer dan veur `t watersjap. Ze rope zelf waal hieël hel det zie `n zelfstenjige pertie zeen, mer mitte verkezinge van dit jaor zeen maar leefs 9 vanne 9 liestrèkkers van die pertie van CDA-hoeze. De pertie is dus waal degelik sterk aan `t CDA gelieerd. Edje vanne Veurhaof zelf is volges eige zègke gelökkig noeats lid gewaes van `t CDA.

Geine Moferter kandidaat veure PS

Naodet de provincie alle kandidatelieste bekindj haet gemaak kónne veer concludere det veure Provincale Staote geinen eine Moferter kandidaat is. D'r zeen waal versjillende kandidate oet anger dörper binne oos gemèndje. Oet `t proces-verbaal van `t watersjap bliek det Edje vanne Veurhaof d'n insigste kandidaat oet Mofert is.