Kómkómmertied: Omtzigt en de ratteneukers

Paniek inne tent bie d'n aje politiek

`t Bès bewaarde geheim oete Nederlandjse politieke gesjiedenis waerdje aafgeloupe zónjigaovendj oete deuk gedaon. `t Is ongeluifelik det dit al daen tied geheim is gebleve (toet zónjigmorge; ein bron is döks genóg). Mer hae duit `t, det is zeker. `t blief nag effe óndudelik wie lank dae lies wuuert en of ze in eder keeskring mit gaon doon, mer hae duit `t. Óndanks det mit name de VVD d'r alles aan haet gedaon óm dit te veurkómme. De aje politiek is in paniek, ómdet dit `n gevaor is veur de plucheplekkers. En dan waere d'r spelkes gespeeld. Smerige spelkes.

Op 6 augustus waas aad Twieëdje Kamerveurzitter Khandija Arib te gas bie Zomergasten. Dao haw zie `t euver de vieze spelkes waat d'r door sommige waere gespeeld (truukkieke hieje; op 2:19:24). Politieke spelkes euver `t algemein, mer zie neump ouch specifiek de fluustercampagnes die d'r toen dus al gäöndje wore taenge Pieter Omtzigt. Neet later es precies éínen daag daonao leet aad-minster Henk Kamp (VVD) op radio precies det zeen waat Arib bedoelde.

Ten ieëste stèlt dit VVD-fossiel hie det Omtzigt gein verantjwaordelikheid nump. Onbegriepelik det hae zoeaget durf te suggerere. Omtzigt behuuerdje van 2003 toet 2017 en van 2017 toet 2021 bie `n pertie waat regeringsverantjwaordelikheid haet genómme. Verantjwaordelikheid naeme beteikentj veur `n Twieëdje Kamerlid `t controlere van `t kabinet ouch es dien eige pertie in det kabinet zitj. Verantjwaordelikheid naeme beteikentj veur `n Twieëdje Kamerlid `t sjrieve van initiatiefnota's, wètsveurstèlle en amendemente. Laot det noe precies die dinger zeen waat Omtzigt ane loupende bandj duit en haet gedaon. Vervolgens wuuertj gesuggereerd det hae mentaal te labiel óm een pertie te leide. Mer `t meis smerige waat Kamp hie zaetj is det Omtzigt door zijn werk wat ie gewoon in de fractie deed al een een burn-out kreeg. Waat Kamp hie effe ''vergitj'' te vertèlle is det ónger leiding van ziene politiek leider (Rutte), de regering structureel relevante informatie achterheel veur de Kamer. Kamp ''vergitj'' hie effe de kwestie functie elders te neume; det geval wo det anger VVD-fossiel - Annemarie Jorritsma - Omtzigt per se weg vom Fenster wool höbbe. Kamp ''vergitj'' hie onnag effe te vertèlle det Omtzigt door zien eige pertie (CDA) nag `n stök of get metser inne rök kreeg gestaoke. Dae burn-out kwoom neet zoeamer van get fractiewèrk.

Ratteneukers

Es se-n e bietje wits wie `t d'r in Den Haag aan toe geit dan wits se dus: dit is toet in detail gespind, oetgedach en veurberèdj. Dit kump neet allein mer oet `t brein van Kamp zelf. De VVD-top probeerde hie Omtzigt tiedes ziene ''''bedinktied'''' mentaal kepot te make. Ze probeerde hie Omtzigt op anger gedachte te bringe, ómdet ze zeve kluuere stróntj sjiete veur `m. En doe kóns mich neet wiesmake det Yesilgöz hie nieks van wis. En wie d'r toen toch get gezeik ontstóng op det verrèkdese Twitter X euver dees oetspräök van Kamp, toen smeet ze opèns `ne tweet d'r oet det `t van häör neet haw gehoof. Det is `n saort van doon esof se aafstandj nums terwiel se eigelik geinen aafstandj nums.

Kamp is hie precies waat ze inne Vereinigde Staote `ne ratfucker neume. Ratteneuker klink mesjiens `n bietje vulgair, mer ich höb daen term neet zelf verzonne. In Amerika is dit dus `ne gebroekelike term veur dit saort vieze spelkes. Mit dank aan Bas Paternotte, waat daen term hie introduceerde.

Pechtold duit `t nag `ns dön euver

En dao kump de volgende ratteneuker oet de mottebel gekraope: D66-coryfee Alexander Pechtold (neet allein bekindj van `t neuke van ratte). Hae mot onnag effe d'r in vrieve det Omtzigt de probleme neet oplos. Nae Mr. Neukhut, ómdet zón bietje al zien pogine óm probleme op te losse waere weggestömp door de coalitieslave. En neet ómdet die veurstèlle zoea slech zeen, mer ómdet `t `t kabinet neet oet kump.

De ''''''neptuug'''''' vanne MH17

Bie edere biografie waat d'r van Pieter Omtzigt inein wuuertj gemonteerd mot altied effe de ''''''neptuug'''''' vanne MH17-ramp waat hae zou höbbe laoten opdrave, waere geneump. `n Kwestie trouwens wo-euver hae al lank en breid haet toegegaeve ontzorgvuldig te zeen gewaes. Mer waat waas dao noe ane handj.

Op 11 mei 2017 waas d'r bie de Vrije Universiteit Amsterdam (VU) `ne panelaovendj euver de MH17-ramp, wo óngerzeukers, journaliste, parlementariërs en naobestäöndje aanwezig wore. Dao waas `ne Oekraïense asielzeuker waat zien verhaol wool doon euver waat d'r haw gezeen: de zoeagenaamdje ''''''neptuug''''''. Dae man waas van plan óm `n verhaol van `n half oer aaf te staeke, waat in deze setting neet meugelik waas. Omtzigt haw van teveure mit dae man gespraoke en wis det dae man neet de meugelikheid kreeg óm zoea lank verhaol te doon, daoróm haw Omtzigt `n sms'je gesjik nao d'n tolk mit `n paar kernpunten van `t verhaol. De belangriekste kernpuntje wore det hae 1) anger (Oekraïense) vleegtuge inne lóch haw gezeen daen daag en 2) det `t JIT (Joint Investigation Team) `m neet zou erkènne es tuug. Tiedes daen aovendj kwoom eigelik allein daen tolk aan `t waord mit dae samevatting van `t verhaol en de vraog van dae man wo d'r zich mos melje. Vervolges antjwaorde Omtzigt dae man det d'r zich bie `t JIT mot melje mit dit verhaol.

`n Half jaor later, oppen èlfde vannen èlfde, kump `t NRC opèns mit `n stök euver det veurval. `t NRC introduceert in det stök de benaming nepgetuige. Zie wore d'r namelik achter gekómme det dae man neet zelf anger vleegtuge haw zeen vlege, mer zien vrouw. Hae bleek dus zelf geinen tuug te zeen. Get waat Omtzigt neet wis en neet haw kónne weite. Veur de res suggereert `t NRC det Omtzigt op daen aovendj d'n indrök haet gewèk det dae man neet door `t JIT zou zeen gehuuerdj. In werkelikheid haw dae man dus gezag det `t JIT `m neet es tuug erkèndje en haet Omtzigt gezag det d'r zich bie `t JIT mos melje.

`t NRC ging vervolges nag get wiejer door te suggerere det Omtzigt twiefel zou höbbe gezejd euver de toedrach vanne ramp. De conclusie van `t JIT waas det de MH17 is neergehaold door `n Russische Buk-raket. `t Feit det dae man (of dus eigelik zien vrouw) anger vleegtuge zou höbbe gezeen, zou volges `t NRC twiefel zejje euver de toedrach, ómdet det de kremlin-laezing zou óngersteune det de MH17 zou zeen neergehaold door `n Oekraïens F16 gevechsvleegtuug. In werkelikheid zeen d'r mieë getuge gewaes die verklaord höbbe det ze nag anger vleegtuge in `t lóchruum höbbe gezeen, waat euveriges gein bewies is veur de laezing van `t Kremlin.

Es hie emes onzorgvuldig is gewaes, dan is `t waal `t NRC. De dicussieleider Helle Hueck (ouch te zeen en te huuere hiebaove in `t filmke) haet gezag det zie gebeld is door `t NRC, mer det häör reactie neet in `t stök is opgenómme. En ouch journalis Pieter Klein, dae ouch op daen aovendj aanwezig waas en `t ein en anger taengeneuver `t NRC haet verklaordj, zei op Twitter det get cruciaals oet zien verklaoring door `t NRC is genegeerd. Klein waas toen adjunct-hoofredacteur van RTL Nieuws en is noe hoofredacteur van Nieuwsuur. Toet slot VU-docent Erik Denters, waat ouch aanwezig waas, verklaordje op Twitter `t volgende:

`t Liek d'rop det Andreas Kouwenhoven en Wilmer Heck van `t NRC hie dachte `n groeat sjandaal te höbbe bloeatgelag. Zie wore zelf neet aanwezig op daen aovendj. Alle nuances van miense die waal dao wore zoue hun verhaol allein mer minder explosief höbbe gemaak. Daoróm koze zie d'r veur `t gemaak veur óm die nuanes mer weg te laote. Jounalistiek is keuzes make, zoeawie Klein det ouch bevestigd. Mer dae keus mot dan waal gebaseerd zeen op waorheidsvinjing; neet op ijdelheid en tunnelvisie van de journalis.

Dus es geer noe nans get huuertj euver de ''''''neptuug'''''' vanne MH17, dan weit geer noe wie `t zitj.

Pater Noster
24-08-2023 | 20:00
© Mofert.nl