Koeltoerkatern: de nuje prinsesjlager is oet

Det haet ouch alweer väöl te lang gedoerdj.

Traditioneel wie ze zeen is de Moferse boyband Nieks Verlaore weer de studio ingedaoken óm `ne prinsesjlager op te naeme. `t Haet weer väöl te lang gedoerd veurdet d'r `ne aanleiding waas veur `n nuuj leedje. Door al det corona-gezeik is d'r twieë vastelaovessezoene lank geine nuje prins mieë gewaes. Laot det dan ouch de titel vanne sjlager zeen: ''Doertj lang''.

Teks is weer speciaal gesjreven oppe prins. Prins Frank IV steit bekindj óm zien geknoter, waat ouch toet oetdrökking kump in ziene spreuk Eine daag neet geknoterdj, is eine daag neet gelaef!. En uiteraard `t feit det d'r mieë es twieë jaor lang haet motte wachte veurdet d'r eindelik dae scepter in ontvangs haet moge naeme. Qua teks is dit sowieso `t bèste Moferse vastelaovesleedje van dit sezoen.

De zank is wie veer det gewindj zeen van Nieks Verlaore: dae volle kroeg-koear-zank inne kuuerkes. `t Sjuufke van dae microfoon van Stefan vanne Mink zal waal weer op min tieën höbbe gestange. De solo's van leadzenger Dennis Zeele uiteraard weer zuver oppe graot en döks net d'rnaeve. De coupletjes gaon zelfs nao `ne net get te hoeage geforceerde kopstöm.

De meziek is good geklawdj (waat ummer baeter is es slech verzonne). Veer vermoede det de meziekkeus ónger invloed van bepaolde adjudante - en van eine specifieke adjudant - is gekaoze. `t Origineel wille veer uch neet ónthaje. Mer lèt op: deze mos se zeker neet aan dien kinjer laote huuere (woh neet, Joost?).