Truukkieke: 80 jaor bevriejing op L1
Mofert blief neet onbespraoke.
80 jaor bevriejing. Veer motte d'r in Mofert nag 4 maondj op wachte: op 23 januari 1945 waerdje Mofert pas bevriedj. Mer aafgeloupe donderdig, 12 september waerdje 80 jaor geleje `t ieëste dörp van Nederlandj bevriedj: Mesch inne gemèndje Eisde-Mergraote. Belangriek genóg veur `t keuningspaar óm nao oos provincie aaf te reize.
L1 maakdje `n oetgebrèdje live-reportage van de herdinking in Mesch. Daobie bleef Mofert neet ónbespraoke. Lang bleef `t verhaol vanne bevriejing van oos dörp in `t verborgene. Allein in Mofert zelf waas me bekindj mit de tragedie waat zich dao haet aafgespeeld. Mer inmiddels begintj `t verhaol wie langer wie mieë bekindjheid te kriege inne provincie en de res van Nederlandj. Vief jaor geleje, tiedes de herdinking van 75 jaor bevriejing in Mestreech, vertèldje toenmalig gouverneur Theo Bovens det femielje van dem oet Staeveswaert in Mofert geëvacueerd zoot. De NOS bestaejdje toen al aandach ane bevriejing van Mofert. En twieë jaor geleje ouch aandach hieveur op nationale televisie in `t programma Dwars door de Lage Landen.
Tiedes de live-oetzending van L1 neump de historicus van deens, Frank Ruber, (vanaaf 23:50) de gebeurtenisse in januari 1945, ómlies mit foto's en filmbeelje van vlak nao de bevriejing van oos dörp. Mer ouch de hujige gouverneur Emile Roemer is bekindj met waat d'r zich hie haet aafgespeeld. Vanaaf 59:25 haet Roemer `t euver de versjrikkinge waat veuraaf ginge ane bevriejing van Mofert.
Speul gerös door nao de stökskes euver Mofert, mer `t ganse programma is ouch zeker de meujte waerd óm truuk te kieke.
NOS
Ouch de NOS deej live verslaag van de herdinking wobie vanaaf 18:17 door militair historicus Erwin van Loo de situatie in januari 1945 róndj Mofert kort wuuertj toegelich.
Theatrale herdinking
Wiltj geer nag mieë weite euver waat zich allemaol in januari 1945 in Mofert haet aafgespeeld? In `t weekend nao 23 januari organisere de eigenieër van `t Roerdriehookmuseum Roy Pfennings en reservebörgemeister Piet Wolters `ne theatrale herdinking róndj de bevriejing van Mofert in `t Dörpshoes.