Edwin vanne Veurhaof mit veurkeurstömme inne gemèndjeraod
En de Vogel ouch.
Onverwachte stömmetrèkker
Dankzij veurkerstömme kump Edwin vanne Veurhaof names Democraten Roerdalen inne gemèndjeraod. Mit mer leefs 281 stömme haolt hae ruum de veurkeusdörpel en is hae qua zetelverdeiling de nómmer 3 achter liestrèkker Jan Smits en vice-liestrèkker Frans vanne Biemel. Democraten Roerdalen kump mit 5 zetels inne raod, wodoor de nómmer 5 oppe lies Rolf Joosten in principe achter 't net vès. Es Smits nao de formatie aevel wèthajer blief, sjuuf dae man toch weer de raod in.
De Vogel blief zitte
Ouch John vanne Vogel kump mit veurstömme inne nuuj same te stèlle gemèndjeraod. Hae stóng op nómmer 5 van 't CDA en veel op basis van liesvolgoede boete de boeat. Mer mit 188 stömme haoldje hae mieë stömme es de nómmer 2 oppe lies Rachelle Dohmen. Waat det aangeit haet John 'nen track record es 't geit óm nómmers 2 te euvertroeve. In 2022 stóng Jeroen Crieëmers op 2 mer hae mos 't doe ouch aaflègke taenge de (toen nag) kastelein John Vogels
Pechvogel Roy Wolters
Pechvogel vanne waek is Roy Wolters. Deze Moferter telg oete Kaoleboer-dynastie haoldje 115 stömme. Det zeen mer twieë stömme te min óm de veurkeusdörpel van 117 te haole. Óndanks det det mieë is es de 111 stömme waat nómmer 2 (Rachelle Dohmen) haet gehaold, blief hae veur de zeteltoewiezing oppe 14e plaats staon. Daomit zal `ne zetel inne gemèndjeraod d'r de kómmende veer jaor waal neet in zitte, onneet es liestrèkker Vrinzen wèthajer wuurtj, of es d'r leje zeen waat gaonderwaeg deze periode stoppe es raodslid. Ós tunk det rol es börgerraodslid waal op zien plek is.
Veer Moferter
Op basis vanne bekindj gemaakdje veurluipigen oetslaag kómme 4 Moferter inne gemèndjeraod te zitte:
- Willem vanne Koets (Van Pol): 360 stömme
- Frans vanne Biemel (Peeters): 319 stömme
- Edwin vanne Veurhaof (Kurstjens): 281 stömme
- John vanne Vogel (Vogels): 118 stömme
Anger veurkeurstömmenuuts
Ons Roerdalen haet mer eine zetel behaold, mer waem geit dae zetel invölle. De nuje liestrèkker van die pertie, John Peggen haet mit 177 stömme éín stöm minder behaoldj es de nómmer 2 oppe lies, de veteraan Henk van der Linden. `t Aad-staotelid veur 50plus en later Lokaal-Limburg Van der Linden is noe veurzitter van Lokaal-Limburg en zal dus ouch inne gemèndjeraod blieve zitte. Tenzij de stömmetèllers net zoea slech kónne tèlle es Henk zelf. Es det zoea is dan kan d'r nag `n verrassing oete bös kómme tiedes de zitting van `t Gemèndjelik Stömbureau noe donderdig 26 mieërt.