Igor Stel nump horeca op Kestieël Mofert euver

Dao kan bès nag waal `n kestieëlke bie.

Entertrain Events, de evenemènte-ongernaeming van Igor Stel, geit de horeca op `t Kestieël oetbate. Det meldj de Stichting Kasteel Monfort op häör Facebookpagina. Zie doon noe ouch al de horeca in en róndj anger monumente, zoeawie Kestieël Lömmerig en de Hómpese Meule. Stel, dae in 2021 de slömste miens van Limburg waas, is oeats begós es belonnekloon. Naeve de geneumdje exploitaties is ouch `t entertainment center All in Echt van hem.

Sins de aopestèlling van de kestieëlkelders haet John vanne Vogel de horeca dao oetgebaat. Dao is `n inj aan gekómme, ómdet John per 1 januari dit jaor is gestop mitte kefee. Tim Bremmers, dae al jaore bie de Vogel wirkdje, haet de kefee euvergenómme, same mit ziene partner Stephanie. Veur de horeca op `t Kestieël waas `n anger paad weggelag. D'r wore mieë gegadigde, mer oeteindelik is de keus dus gevalle op Entertrain Group.