Wie zitj det noe in Mofert mit det hoeag water?

Gaontj geer mer röstig slaope. Chritje Wolfhage waak euver uch.

In Vloearep haet me veure Kers al mit bigbags loupe sjörge. Bron: 1limburg, © Orange Media.

In `t ganse landj haet me vandaag las van hoeag water. Kelders en zelfs hoezer dreige te euverstruime, sjeepvaart is stilgelag en euverloup-dinger loupe euver. Tömmerfrans zitj al de gansen daag Nu.nl te F5'e óm te kieken of d'r al emes is verzaope. De Rien blief mer stiegen esof `t nieks is en morge: dan steit de Maas hoger es zomer `21. `t Watersjap is haet op Aadjaorsdaag opgesjaold nao DEFCON 2. En det is allemaol de sjout van BBB. Sins die in de watersjappe zitte is `t dweile mitte kraan aop. Gelökkig dan mer det `t algemein bestuur van Watersjap Limburg noe gekaozen haet veur `n diekgravin oet GroenLinks-hook, dus alles kump good. Mer toet daen tied motte veer `t veurluipig doon mit `ne CDA'er aan `t roer. Es veer det dan mer euverlaeve.

Mer wie zitj det eigelik in Mofert? `t Stedje waat in vreuger jaore ómgaeve waas door water en zómp. `t Dörp mit `n zoeadanig waterrieke ómgaeving det me zelfs bang is det statushajers d'r verzoepe. Veer höbbe veur uch `n rundje gemaak langs de waterpeilschaoldingese in Mofert en de baovestruimse ómgaeving.

Dao wo de Helderbaek `t Vlaot in struim haet `t waterpeil vandaag efkes in alarmfase gael gestange. Meer gelökkig daalt `t water dao weer langzaam. Aan `t begin van `t Vlaot ane grens mit `t Pruses is nieks ane handj. Anen angere kantj vanne päöl: alles im grünen Bereich.

Dan de Helderbaek en zietek. Bie de stuw op Ieësele peilt me 25,69 maeter óngerstruims en 26,26 maeter baovestruims, waat normaal is veuren tied van `t jaor. Ane Brookhorswaeg is `t waterpeil netjes in `t greune en ouch bie de Brookhorslossing is gèn raeje veur paniek. Mer waat zeen veer dan noe oppe Pepinusbaek bie de Deelgaardlossing? ALARM!!! Verhuuegdje waakzaamheid.

Gelökkig höbbe veer plaatsvervangend vice-loco-diekgraaf Chrit Wolfhage dae euver uch waak. De man dae de Roer door zienen achterhaof haet loupe. Hae hèltj veur uch `t waterpeil in Mofert en ómgaeving nauwlèttendj inne gate en zal uch wakker maken es det nuuedig is. Zoeawie Colijn in 1936 al zei: Ik verzoek den luisteraars om wanneer zij straks hunne legersteden opzoeken, even rustig te gaan slapen als ze dat ook andere nachten doen. Er is voorshands nog geen enkele reden om werkelijk ongerust te zijn. En daarmee, geachte luisteraars, laat ik u over aan de verpozing die de radio u pleegt te bieden. Goedenavond.