Coalitiekal: Roerdale krieg 4,2 wèthajers

Toch bestuursverantjwaordelikheid vanoet PRO.

Nao oetstèl van diek drie waeke zolle kómmende donderdig de wèthajers van `t nuuj kolleesj vanne gemèndje Roerdale waere beëdigd tiedes `n al geplandje raodsvergadering. Opmerkelike plot twist is det Jos Paffen toch wèthajer wuurtj en dus neet financieel adviseur. Daomit is de twiefelechige verantjwaordelikheid waat PRO Roerdale zou naeme, definitief vanne baan. Paffen zal es wèthajer jummers pólletiek verantjwaordelik veur zien portefuij.

Zoeawie noe bekindj is gewaore, loog d'r al ieëre `ne wins van PRO Roerdalen (de fractie formally known as GroenLinks-PvdA) op taofel óm `ne ónbetaaldje wèthajer te levere veur 0,2 fte. Dees rol zou dan ingevöldj motte waere door gepensioneerd controller Jos Paffen, waat op nómmer 12 vanne lies van GroenLinks-PvdA stóng. Wèttelik waas det aevel neet meugelik, wodoor me de meugelikheid haet óngerzoch óm Paffen es ónbetaald finincieel adviseur aan te stèlle, wobie geldjzakes bie de bórgemeister inne portefuij zou zitte. Bliekbaar haet me `n meugelikheid gevónje wobie d'n aankómmend wèthajer zien salaris kan truukbetale ane gemèndje, wodoor hae per saldo en ouch fiscaal onbezoldigd wèthajer is. Wachgeldj zal Paffen neet kriege, ómdet hae de AOW-gerechtigde laeftied al haet gehaoldj.

Portefuijverdeiling

Euver portefuijverdeiling is nannieks bekindj gemaak, mer `t lèk veur de handj det geldjzakes door Paffen zal waere gedaon, ómdet det zien expertise is en ómdet de pertieje `t ieëre hawwe euver zien meugelike rol es financieel adviseur. Det óngerwerp zal dinkelik neet (mieë) bie Jan Smits kómme te lègke en onneet bie de bórgemeister, wo ieëre spraoke van waas.

Aan edere kandidaat-wèthajer éín vraog

Dónderdig vanaaf 19:30 oere zal de raodsvergadering beginne en dae is te volge op OR6 via Ziggo kanaal 41, KPN en XS4ALL kanaal 1507, via de site van OR6, of hie ónger. Volg op Mofert.nl de liveblog mit exclusief: aan edere kandadaat-wèthajer éín vraog. Tiedes die vergadering zal ouch `t raodsakkaord Samen aan het roer 2026-2030 waere geprizzenteerd en nuuj raodsleje waere beëdigd.