Jan van Storms geit mit pensioen

Haopelik haet d'r good gespaard en alles en alles.

Jan van Storms wie veer `m allemaol kènne (Bron: Storms & Geurts Assurantiën)

D'n daag wovan veer allemaol wiste det d'r oeats ging kómme, mer wovan nemes wis wienieë, geit noe toch ech binnekort aanbraeke: Jan van Storms geit mit pensioen. Zien assurantiekantoear haet det sjriftelik aan häör klantje bekindj gemaak. Mer dit is neet d'n insigste boeadsjap van dae breef. D'n aanleiding van `t sjrieve is det Storms & Geurts Assurantiën per 1 juli 2023 geit ''''samewirke'''' mit Veldsink advies. De naam van Storms & Geurts Assurantiën geit dan ouch verangere in Veldsink - Storms Geurts. `t Logo is in principe det van Veldsink Advies; döks is det `n teike det de filiaal-specifieke aanduding op termien geit verdwiene, mer det is aafwachte.

John Geurts blief, zoea laeze veer, es mit-eigenieër en directeur aangeslaote bie `t kantoear. En Jeanine en Cindy dan? Nou, die gaon allebei `n nieuwe uitdaging aan. Of det allemaol in goed overleg is gegange, det weite veer onneet, want det sjrieve ze neet. Mer `t liek d'r in eder geval op dat Jan zien aandeile haet verkoch aan Henri Veldsink, veurdet de volgende financiële crisis wiejer gestalte krieg. En dan zolle Jeanine en Cindy noe ouch waal höbbe gecasht. Mer det zeen natuurlik ouch mer speculaties. Wie dan ouch wuuertj John Geurts es insigste persoean es mit-eigenieër betiteld, mer good, det waas d'r natuurlik al bie Storms & Geurts.

Henri Veldsink in geslaote hajing. (Bron: VPP)

Henri Waem?

Henri Veldsink is Algemein directeur van Veldsink Groep en waarsjienlik ouch eigenieër, of in eder geval mit-eigenieër van det bedrief. Es se geis googele op Henri Veldsink kump es ieëste suggestie henri veldsink vermogen nao baove. Bliekbaar is det `t ieëste waat de luuj van dae goje miens wille weite. Veer gaon d'r daoróm veur `t gemaak mer van oet det deze miens good inne slappe was zitj. Veer kónne mit zekerheid zègke det hae `ne veuraanstaonde persoean is inne werreld van financieel advies. Volges `t Ratinginstituut Financieel Dienstverleners waas hae in 2021 de meis invloedrieke persoean in dae sector. Inmiddels is hae aevel nao de twieëdje plaats gezak.

Dit zuus se es se Henri Veldsink googels.

Veldsink Advies

`t Bedrief Veldsink Advies haet op dit moment maar leefs 90 vestiginge versprèdj euver gans Nederlandj, wovan de hèlf mit RegioBank-kantoear. Veer weite neet in wieväöl van die filiale Veldsink gans of deils eigenieër is, mer `t is waal dudelik det `t `n groeat netwèrk is.

En de klantje dan?

Zoeawie det altied is mit dit saort euvernames samewirkinge gaon de klantje d'r nieks van mèrke. D'n telefoonnómmer (det Jan van Storms al haet sins det d'r in Mofert 4-sieferige abonneenómmers zeen, en allein bie `t ómnómmere de Mofert-specifieke 54 d'rveur haet gekrege) is nag ummer 0475-542244 en de kóffe steit nag ummer vaerdig. Wie lang `t doert zal motte blieke, zoeawie normaal mit dit saort dinger.

Veer winse Jan alle goods en rös mit zien waalverdeend pensioen en alles en alles en `t ganse gebeure. Veer haope det d'r zich neet geit ververvaele. Is d'r anges nag `n vereniging of stichting in Mofert waat `ne goje penningmeister kan gebroeke?