Kómkómmertied: geziek óm genderkitsch
De Griekse tragedie in Peries
Kómkómmertied is weer bezig. Waat zèk ich? `t
Is al `n half jaor kómkómmertied in Mofert. Planne veur windjmeules lègke naeve
`t PVV-pertieprogram innen
ieskas. D'r wuuertj serieus getwiefeltj
euver `t rendement van zon-op-landj. En wie zitj `t mit die tiejelike weuninge?
Dao steit nannieks. Nieks nuuts ónger de slaagsjeem zon dus. Volgers van Mofert.nl zeen al maonje de
homepage aant F5'e, zónger resultaat. Dus haet de redactie mich gekóntakteerd
of `t neet weer `ns hoeag tied wuuerj veur dae zomercolumn. Alleh dan.
Sportzomer
`t Insigste nuuts in deze kómkómmertied is det dan de aafgeloupe sportevenemènte. En det wore d'rs nagal get: `t EK voetval, D'n Tour en uiteraard de Olympische Spele. En es d'r örges zeik waas, dan waas `t waal bie Olympische Spele. Döks terechte zeik, döks lètterlik zeik, mer ouch döks zeik óm nieks. Zoeawie dit:
Bacchusclub Peries
Wis geer det Peries ouch `n Bacchusclub haw? Ich onneet. Meer tiedes de äöpeningsceremonie vanne Olympische Spele in Peries, zoge veer det ouch de Fransoos bekindj is mit dit fenomeen.
Taenge `nen achtergróndj van genderkitsch loog dae
blawwe Bacchus mit zien vot in `n fruitmanj. Mer `t waas dus neet dae Groeate Smurf
wat veur ophef zorgdje, mer d'n achtergróndj. `t Queer tableau vivand van drag
queens, androgyne kaerels en angere lètterbakmiense leek waal verdach väöl op `t
Leste Aovesaete van Da Vinci. Dus, waat dinks se? Gans conservatief, woke-hatend en dóm-rechs
Twitter X kómplieët euver de zeik. Ouch Ayatollah Khamenei vónj `t mer nieks
(wo bemeujt dae zich eigelik mit?).
Da Vinci of Jan van Bijlert?
Wore de oppe tene getraoje Christene neet get te gaw gaon bäöke det häöre profeet hiemit inne zeik waerdje gezat? `t Liek `ne verkieërdje aanname te zeen gewaes det `t oetgebeeldje tafereel ouch ech `n parodie waas op `t Leste Aovesaete. Want waat duit Bacchus op `t aafsjiedsfiëske van Jeses; zoea stóng `t in eder geval neet in `t Nuje Testament.
Kunshistorici zeen mieë geliekenis mit `n anger sjiljerie, namelik ''`t Fieës van de gaoje'' (Le Festin des dieux) van de Utrechse sjiljer Jan van Bijlert. En inderdaad: me zuutj dao `ne Bacchus oppe veurgróndj en oppen achtergróndj `n taofel mit volk en es centraal figuur emes mit `ne halo of aureool rónjelóm de kop.
Op de #OpeningCeremony van #Paris2024 werd een tableau vivant (een levend schilderij) getoond van 'Het Feest van de Goden' van Jan van Bijlert uit 1635 (bewaard in het museum in Dijon). Apollo, de Zonnegod, is herkenbaar aan de stralenkrans, Bacchus aan de druiven op zijn hoofd. pic.twitter.com/gzLk1APOIy
— Walther Schoonenberg?️ (@WSchoonenberg) July 28, 2024
''Le Festin des dieux'' van Jan van Bijlert (bron: Musée Magnin) (opklikke veur vergruueting)
Mergood, stèl det `t tafereel waal `n parodie op `t Lèste
Aovesaete zou zeen gewaes. Waat zou det? Waas `t neet de Christen waat waal
taenge `n stuuetje kós? Waas `t neet de vrieje westerling waat zien sjouwers
ophaoltj es häöre profeet of häöre cultuur inne zeik wuuertj gezat? Oké, `t bespotte
van Jeses resulteerd nag ummer neet in `t (letterlik) `n köpke klinder make van
miense, zoeawie det waal döks `t geval is mit `t ''''beledige'''' van daen
angere profeet. Mer doe nums dien eige religie waal erg serieus es se dich hie
drök óm geis make. Waat `ne zeik óm nieks. Of, zoeawie Steve
Hughes al zei: So what, be offended. Nothing happens.
Dich de böl oete bóks lache
Kéntj geer die oetdrökking? D'r waerdje vanoet dezelfdje conservatieven hook sjanj gespraoken euver `ne knakker wovan waerdje gezag det hae de kluuet oete bóks haw hange.
Haw dae kaerel persoean zich lètterlik de böl oete bóks gelache? Ich
kan uch gerös stèlle: `t waas neet mieë es `n gaat
in zien/häör haoze. Kiek mer:
Nou. Is det verhaol ouch weer oete werreld.
Oetsmieters
Speciaal veur alle Christelijke snowflakes hie nag `n paar beledigende oetsmieters: