Coalitiekal: PvdA/GroenLinks duit nimmieë mit

Westhelle-Aelen kan lekker in Oearsbaek blieve wone.

`t Is zoeawied: stikstofvrie gezeik inne coalitie. De fractie PvdA/GroenLinks stap oet de coalitie. Coalitiepertieje Roerstreek Lokaal!, Democraten Roerdalen en PvdA/GroenLinks höbben `t in `n gezamelike verklaoring euver `n versjil van inzich, richting en oetveuring van `t coalitieprogram. Det versjil is inne aafgeloupe periode wie langer wie mieë zichbaar gewaore.

Inne TeleLimburger verklaortj Roerstreek Lokaal!-fractieveurzitter Willem vanne Koets det de discussies euver windjturbines op `t Wolfsplateau en de boew vanne Meru-tore toet fundamentele meiningsversjille binne de coalitie lèdje.

De Maharishi-tore

Dae Meru-tore is `ne 57 maeter hoeage tore (det is óngevieër 0,2 kieër de huuegdje van `n megawindjmeule) veur de volgelinge van de Maharishi zaliger. Zie probere daomit in nag hoeagere sfere te kómme. Inne raodsvergadering van 21 september dit jaor haoldje de fractie van PvdA/GroenLinks alles oete kas óm de boew taenge te haje. PvdA/GroenLinks-fractieveurzitter Mieke Schotemeijer prebeerdje tevergaefs ieës nag `t puntj vannen agenda te haole. Zie repen `t kolleesj op óm nans in euverlèk mitte provincie te gaon óm d'r zeker van te zeen det d'r gein procedurele belemmering is. De fractie waas bang det de vergunninge waeren aangevochte toet ane Hoeage Raod. De PvdA/GroenLinks-fractie kreeg bie det ordeveurstèl bieval van Democraten Roerdalen, mer `t veurstèl haoldjen `t neet doordet zie Ons Roerdalen en `t CDA neet mitkrege.

Volges Schotemeijer steit de natuur oppe Mienwaeg op ómkiepe en druueg de stikstofoetstoeat van bezeukers aan daen tore dao aan bie. Zie vreesdje onnag doeaje in `t verkieër en verbreiïng vanne Bóslaan richting Vloearepperstaasje.

Democraten Roerdalen haw ouch zörg euver de verkieërsveiligheid oppe Bóslaan en Vloearepperstaasje en hawwe bezwaor taenge de huuegdje. Óm dae verkieërsveiligheid te borge waas `n raodsbreie motie aangenómme waat `t kolleesj opruuep óngerzeuk te doon nao de verbaetering vanne verkieërsveiligheid veur langzaam verkieër ter plekke.

Oeteindelik stömdje zoeawaal PvdA/GroenLinks en Democraten Roerdalen taengen `t raodsveurstèl. Veur DR waas de huuegdje vanne tore `t braekpuntj. Bliekbaar waas det versjil van inzich gein raeje veur dae fractie óm oet de coalitie te traeje.

Aaftraeje wèthajer Westhelle

Es gevolg van deze coalitiebreuk trèk wethajer Jaqueline Westhell-Aelen zich per 1 november truuk oet `t kolleesj. Zie verklaortj Mijn ideaal was en is om van Roerdalen een gezonde en mooie gemeente te maken voor mens en natuur, voor nu maar zeker ook voor de toekomst. Zie liekj hiemit te suggerere det zie det ideaal neet vorm kós gaeve mit coalitiepartners RL! en DR.

Roerstreek Lokaal! en Demcraten Roerdalen höbbe same mit 10 zetels `n nipte mieërderheid inne raod, dus höbben in principe gein extra fractie nuuedig óm door te besture. Zie gaon zich de kómmendje tied bedinke wie ze wiejer gaon.