Raodslid Henk van der Linden kan neet tèlle
Maak van twieë aaj kuuj zès.
Tiedes de raodsvergadering vanne gemèndje Roerdale van vandaag leet raodslid Henk van der Linden zich weer `ns van ziene bèste kantj zeen. Oppen agenda stóng namelik de tiejelike weuninge waat in Postert en Mofert nag geboewdj motte gaon waere. De rechter tikdje `t kolleesj oppe vingers, ómdet ze de procedure veur de ómgaevingsvergunning neet juus haw gevolg. Ten ónrechte mèndje zie det mit ein ''verklaoring van gein bedinkinge'' geliek veur alle locaties kós waere beslaote. De rechter oeardeildje det det neet juus waas en det det per locatie mos waere gedaon. Daoróm waerdje `t veurstèl nans nao de raod gesjik. `n Formaliteit natuurlik, ómdet d'r breije raodssteun is veur de gekaoze locaties.
Oppositiepertie Ons Roerdalen mos uiteraard van zich laote huuere. De fractieveurzitter vónj `t nuuedig óm nans truuk te kómme op `ne informatieaovendj van 7 september veurig jaor, wo ouch de wiekagent in vol ornaat aanwezig waas. Van der Linden suggereerde in zien betoog ónger angere det des mesjiens waal waas gedaon óm de aanwezige te intimidere. Bórgemeister De Boer-Beerta haw veurig jaor al `ne kieër, nao aanleiding van vraoge van Van der Linden, oetgelag woróm det de wiekagent aanwezig waas mit de ganse oetrösting. Zichbaar geïrriteerd, klikkend mit häör Bic-pen wees de bórgemeister Van der Linde dao nag `ns op.
Tiedes de raodsvergadering van 21 september 2023 lag de bórgemeister aan de fractieveurzitter van Ons Roerdalen oet woróm det de pliesie aanwezig waas oppen informatieaovendj.
Bliekbaar vertroewdj de fractieveurzitter de bórgemeister neet, want vervolges zaetj d'r det de pliesie dao mit zien zès man wore (geluif d'r). In wèrkelikheid wore ze dao mit zien twieëje. Oppe beelje zuus se De Boer nao die opmèrking aarzele óm dao-op in te gaon mer luuet `t veur waat `t is. En es de bórgemeister `t neet duit, dan mótte veer `t mer zègke: Henk van der Linden kan neet tèlle.
Éíne pliesiewage in `t dörp tiedes de informatieaovendj bie de Vogel op 7 september veurig jaor. Passe d'rs dao 6 in?
