Verkezingskal: dit zeen de Moferter kandidate
19 vanne 108 kandidate kómme oet Mofert.
De gemèndjeraodsverkezige kómme weer draan, dus `t is weer tied óm `n analyse te make van `t aantal Moferter kandidate. De kandidatelies is nanneet aangekómme op `t Mofert.nl-haufketeer. Dus gaon veer in beginsel oet van de site allekandidaten.nl, wo de gemèndje zelf ouch haer verwies. Opmirkelik is aevel det op allekandidaten.nl dus neet alle kandidate staon. De politieke redactie haet daoróm ouch óngerzeuk gedaon nao de informatie waat te vinjen is oppe internetsites van de deilnaemende pertieje. OSINT vanne bäövelste plank.
Favoriete
Op basis vanne noetiejige zetelverdeiling staon d'r mer 2 kandidate oet Mofert op `n verkeesbare plaats, namelik Willen vanne Koets (Van Pol) en Frans vanne Biemel (Peeters). Allebei zitte noe ouch inne gemènderaod en staon allebei op nómmer twieë vanne lies; Van Pol veur Roerstreek Lokaal! en Peeters veur Democraten Roerdalen. Bie de veurige verkezinge waas Willem vanne Koets liestrèkker van Roerstreek Lokaal!. Doe haw de pertie de nómmer 2, Loes Vestjens, al veur de verkezinge veurgedrage es wèthajerskandidaat. Det suggereert dat Van Pol `n functie es wèthajer neet ambieerde; veur hem waas `t fractieveurzittersjap weggelag. Det liek noe ouch `t geval te zeen, mer dit kieër höbbe ze d'rveur gekaoze óm de hujige wèthajer Vestjens de lies te laote trèkke. Willem behaoldje veer jaor geleje de meiste veurkeurstömme van alle kandidate. Ómdat stömmers döks oet gewuuendje `t bäövelste hökske vanne lies roead kluuere, kónne die kandidate raekene op `ne liestrèkkersbonus. Die extra stömme krieg hae noe neet, dus `n herhaling van de veurige verkezinge op dit puntj zitj d'r waarsjienlik neet in.
Frans vanne Biemel stóng bie de veurige verkezinge ouch op nómmer 2 achter liestrèkker en wèthajer Jan Smits. Óngetwiefeldj wiltj Smits gaer in `t kolleesj blieve zitte, mer det hink sterk aaf vanne resulate vanne verkezinge en `t formatieproces.
John vanne Vogel (Vogels), waat noe ouch al veur `t CDA inne raod zitj, steit op nómmer 5 van dae lies. Op dit moment haet `t CDA 4 zetels inne gemèndjeraod van Roerdale, mer plaats 5 mot toch waal es verkeesbaar waere betrach. Veer jaor geleje stóng John jao ouch op nómmer 5, mer is doe mit veurkeurstömme inne raod verkaoze. En es det neet lök dan zal hae ein vanne ieëste gegadigde zeen es emes oete CDA-fractie beveurbeeld wèthaje wuuertj, of óm `n anger raeje oete raod geit.
Mofertgehalte per pertie
Roerstreek Lokaal!. haet 3 Moferter oppe lies staon. Behalve Willem vanne Koets zeen det Ruud van Jan van Driekes (Mestrom) op nómmer 15 en Remy vanne Paaj (Beckers) op nómmer 19. De politieke redactie van Mofert.nl vermoed det `t lidmaotsjap vanne redactie vanne vastelaovesgezèt `n kóndiesje is óm es Moferter op die lies te moge staon. `t Percentage Moferter oppe lies van Roerstreek Lokaal! blief daomit staeke op `n karige 14%.
`t CDA scoort procentueel `n stök baeter: 7 vanne 26 kandidate kómme oet Mofert (27%). John vanne Vogel op nómmer 5 waerdje al geneump. Veer dreune `t lieske effe op: Nr 9: Ron van der Varst, Nr. 13: Bram Dirks, Nr. 14 Roy Wolters, Nr. 16: Jacques Welters, Nr. 18: Wim Brentjens en toet slot op nr. 21: Constant van Genouwe (Frenken) dae al 100 jaor oppe lies van `t CDA steit.
Democraten Roerdalen duit `t nag baeter. Neet in absolute getalle - d'r staon 6 kandidate oet Mofert oppe lies - mer waar relatief gezeen. Mit `n lies van 21 kandidate in totaal kómme zie oet op 29%. Behalve Frans vanne Biemel zeen det van ónger nao baove: Peter Moens op Nr. 18, Saté Roger (Janssen) op 17, Huub Peters op 16, Mark Meuwissen op 11 en Edwin vanne Veurhaof (Kurstjens) op nómmer 8. Lèsgeneumdje stóng 3 jaor geleje veur `t Watersjap oppe lies van BBB. Ieëre deej hae veur Waterbelang Limburg mit ane verkezinge.
De pertie Ons Roerdalen haet mer twieë kandidate oet Mofert oppe lies staon. Det zeen op nómmer 6: Diëgo Helwegen en op nómmer 16: Sandra Hafke. De pertie scoort hiemit 12% persoene oet Mofert. Mer de slechs presterende lies is dae van GroenLinks-PvdA. Vrrreugerrr, wie GroenLinks-PvdA nag PvdA-GroenLinks waas, stóng PvdA'er Max van Baden nag oppe lies, en veur daen tied haw d'r veur de sociaaldemocrate inne raod gezaete. Noe is Van Baden verhoes nao Mestreech; oet betroewbare bron weite veer det d'r dao onneet oppe lies steit, neet veur de PvdA en onneet veur GroenLinks. Effae, mit de aankómmendje verkezinge steit oppe lies van GroenLinks-PvdA dus geinen eine Moferter.
Aafsplitsers
Veer höbbe dit kieër `n nuuj pertie d'rbie. Vitaal Perspectief (de naam liek mieë op dae van `n pertekelere obisitaskliniek) is `n aafsplitsing van Democraten Roerdalen. Wim Tegels en Jo van Kruchten höbbe Democraten Roerdalen verlaote en zeen `n eige pertie begós. Volges Voor Midden-Limburg vónj Van Kruchten det de koers vanne fractie te rechs en te populistisch waerdje; hae maakdje toet veurig jaor deil oet van dae fractie. De nuuj pertie haet einen inwoner van Mofert oppe lies staon, namelik Mark Maessen. Hae steit geliek achter de oprichters oppe lies, op nómmer 3. Theoretisch is det `n verkeesbare plaats, mer det is mit zón nuuj pertie lestig in te sjatte.