Liveblog: Jaqueline oetzwejje tiedes de raodsvergadering

Wedstriedje waem `t helste kan zwejje.

Aafgeloupe zaoterdig veel `t dook veur de coalitie van Roerdale. Teminste, waat PvdA/GroenLinks betruf. Es gevolg daovan haet wèthajer Jacqueline Westhelle-Aelen (PvdA) per 1 november óntslaag genómme. Det beteikentj det de raodsvergadering van desnaovendj d'n ieëste is zónger Westhelle es wèthajer. Veer zeen benuujd in wieverre dao ruchbaarheid aan wuuertj gegaeve. De raodsvergadering begintj óm 19:30 oere en wuuertj oetgezónge op Ziggo kanaal 41 of via de livestream. Mer zoeadet geer `t neet hoof te doon, volge veer `t veur uch.

Update 19:43 Actuele politieke situatie is es extra agendapuntj oppen agenda gezatj.

Update 19:45 Willem vanne Koets noe aan `t waord. Bliekbaar waas `t al effekes hommeles binne `t kolleesj en kwoom `t initiatief van deze breuk vanoet Roerstreek Lokaal! en Democraten Roerdale. Óm neet de voele was boete te hange waas aafgespraoke det de drie pertieje gezamelik mit `n statement nao boete kwome. RL! verbaasd zich d'r euver det PvdA/GroenLinks zich nag los daovan haet oetgelaote inne pers.

Update 19:49 Noe PvdA/GroenLinks-fractieveurzitter Schotemeijer aan `t waord.

Update 19:51 Schotemeijer snap neet woróm zie neet mieë mit mochte doon.

Update 19:53 Volges Vanne Koets wringde `t `n bietje mit `t dualisme.

Update 19:54 Agendapunt aafgesloate. Strakkes hie-ónger nag `n oetgebrèdjere analyse.

Analyse
Roerstreek Lokaal!-fractieveurzitter Willem vanne Koets refereert innen ieëste termien nao `n artikel inne TeleLimburger van 31 oktoeaber. (Sorry Mofert.nl-volgers, mer dae hawwe veer effe gemis.) `t Artikel waas `ne klaagzank van PvdA/GroenLinks-fractieveurzitter Schotemeijer, wo-in zie verklaordje det häör fractie gedwónge waas óm op te stappe. Willem vanne Koets verklaortj noe det `t initiatief vanne breuk inderdaad waal kwoom vanoet RL! en DR. Oet respek veur de 22-jäörige politieke carrière van Westhelle en óm häör neet wiejer te besjadige, hawwe alle drie de pertieje beslaoten óm gezamelik nao boete te traeje mit `tzelfde persberich. Mofert.nl mèrkje toen al op det `t berich vanne PvdA/GroenLinks-fractie net ietskes anges waas es det van de coalitiepartners. Wiejer waerdje nag `n artikel inne TeleLimburger van 1 november aangehaoldj (sorry, ouch dae höbbe veer gemis). In det berich waerdje gesuggereerd det d'r is gelaogen euver det `t ein en anger in onderling overleg waas gegange. Mer, ech. Serieus. Es se örges zuus staon in onderling overleg is besloten dat..., dan wits se toch waal wie laat `t is. Det is geine rocket science.

Henk van der Linden (Ons Roerdalen) begós in zien betoog ouch weer euver det in onderling overleg. Hae is bang det d'r mieë speelt en maak zich zörg euver de bestuurbaarheid vanne gemèndje.

Schotemeijer verklaordje det de fractie neet wis det d'r `t ein en anger speeldje binne `t kolleesj.

Inne twieëdje termien reageerde Willem vanne Koets op vraoge van Van der Linden euver wie det noe zootj mit die versjille in inzich. Volges hem lepe de rol van Westhelle es bestuurder en es veurmalig politiek leider doorein en det wringt dus mit `t dualisme tösse bestuur en volksvertaengewuuerdiging.

Wie `t noe wiejer geit, weite veer nanneet. De coalitiepartners RL! en DR gaon zich bedinke of ze de coalitie nag wille gaon oetbreie of neet. De portefuille van Westhelle is veurluipig verdeild euver de euvergebleve wèthajers. `t Is dus onnanneet bekindj of en zoea jao wie `t kolleesj wuuertj oetgebrèdj.

Tiedes de raodsvergadering waas d'r dus gein aafsjied van Westhelle. Zie waas zelf neet aanwezig en mot `t doon mit die doeaze Merci vanne aafgeloupe daag. Die twieë jaor wachgeldj wo zie rech op haet mótte neet nuuedig zeen, zoea dinke veer. D'r is werk zat veur `ne gediplomeerd kaakchirurg.