Edwin vanne Veurhaof zuutj aaf van raodszetel

Det is: jaomer.

Es insigste medium meldje Mofert.nl veurige waek al det - nagal ónverwach - Edwin vanne Veurhaof (Kurstjens) mit veurkeurstömme de gemèndjeraod in waas verkaoze. RoerdalenNu.nl meldj vandaag det Kurstjens aafzuutj van ziene raodszetel.

Volges RoerdalenNu.nl luuet `ne waordveurder vanne fractie van Democraten Roerdalen weite det hae in verbandj mit drökke wèrkzaamhede d'r nanneet aan toe is. Waal zou hae es commissielid de raod advisere op zien specialiteit.

De zetel van Edwin wuuertj ingenómme door noetiejig raodslid Rolf Joosten, dae `t ironisch aantal van 115 stömme haoldje. Ironisch, ómdet det exact `tzelfde aantal stömme is es waat de Moferter Roy Wolters haoldje. Det waas net neet genóg veur de veurkeursdörpel (van 116 komma nagget) te haole. `t Centraal Stömbureau haet daoróm - op verzeuk van dae kandidaat - de stömme van `t CDA gehertèltj. `t Resultaat bleef dannóch geliek.

Vandaag zwejdje 5 raodjleje aaf tiedens `n speciale raodsvergadering. Twieë daovan staon alweer inne startblök óm truuk te kómme op `t moment det emes oete fractie wèthajer wuurtj (of blief). Geine van de aafzwejjende raodsleje is van Mofert.

Morge vanaaf 19:30 oere is `t zoeawied: dan waere in `n speciale raodsvergadering de nuuj raodsleje beëidig. Securliere doon de belofte, christene doon de eid en moslims doon de eid mubarak (meine veer; nag opzeuke, red.). Allemaol te volge via OR6 op Ziggo kanaal 41 of kanaal 1507 van XS4ALL. Of straem hie live.

Óngerwiel bie Ons Roerdalen: gezeik.