Gemèndjeraod Ech-Zöstere stömp in mit Energievisie mit de optie veur windjmeules

En de wèthajer haet gein idee wo die 260 maeter vanaaf kómme.

De gemèndjeraod van Ech-Zöstere haet de Energievisie Echt-Susteren 2022-2026 inne raodsvergadering van desnaovendj aangenómme. Dao-in steit ónger angere det windjenergie `n optie is. Ein van de zeukgebiede veur windjengergie waat noe bekindj is, grens aan Mofert. Nao hoofdelike stömming bleek det 4 raodsleje van Lijst Samenwerking (LS) taenge wore. Twieë anger raodsleje van dae fractie, wo-ónger fractieveurzitter Jos Wackers, stömdje veur. De algemeine tendens inne raod waas det me ieës alles óngerzoch wiltj höbbe, zoeadet ze later `n waaleuverwaoge beslissing kónne naeme. Det zou ouch precies d'n instaek vanne engergievisie zeen op `t gebied van windjenergie.

Toezègking euver formele procedures

LS haw in ieëste instantie gevraog óm `t besloet oet te stèlle, mer det waerdje neet gehonoreerd. Vervolges waas `t veurstèl van dae fractie óm `t stökske windjenergie oet de engergievisie te haole. Daobie krege ze bieval van Michelle Kox-Stoffels van Partij Nieuw Ech-Susteren (PNES), `n pertiegenote vanne wèthajer. Opmèrkelik is waal det LS gein amendement haet ingedeend veur `t oetsloete van windjenergie oet deze energievisie. Oeteindelik wool Wackers `n toezègking van wèthajer Hub Meuwissen óm de NRD neet formeel in procedure te bringe. De NRD is de Notitie Reikwijdte en Detailniveau en dao-in wuuertj opgesjreve waatfer milieueffecte waere óngerzoch en wie. Wackers pleitte veur `ne informele procedure in plaats van dae NRD. De wèthajer wool dae toezègking waal doon, mer allein es Wackers veur de engergievisie stömp. Wackers vroog dao-op `n sjorsing veur euverlèk binne de fractie. Nao de sjorsing waas de stömming wo-oet bleek det Wackers en Toine Bocken van LS waal instömdje mit `t veurstèl van `t college. Dinkelik haet Wackers zich opgeofferd door veur te stömme, zoeadet LS zich dae toezègking waal inne tes kós staeke. Alle angere pertieje stömdje veur `t veurstèl.

Wèthajer haet gein idee wo die 260 maeter vanaaf kómme

Meis opmèrkelike opmerking kwoon dan toch vanne wèthajer zelf. Ik weet niet waar die 260 maeter vanaf komt. Ik heb ze nooit genoemd. Nae Hub, mesjiens höbtj geer det zelf noeats geneump, mer `t STEIT TOCH ECH ES ALTERNATIEF GENUMP inne NRD. Geer weit waal, daen NRD waat neet formeel in procedure wuuertj gebrach.

Funfact

Dit waas de aller-aller-aller-ieëste hoofdelike stömming oet de bórgemeisterstermien van Jos Hessels.