Koeltoerkatern: vastelaovesmeziek oet Mofert
...en ómgaeving.
Mit 3 meziekkorpse op 3000 inwoners kan Mofert zichzelf zónger gène `n muzikaal dörp neume. En ouch de vastelaovendj is in Mofert `n fieës waat, veur `n dörp, nag oetbundig wuuertj gevierd. Toch haet `t lang gedoerd veurdet `t make van vastelaoesleedjes `n vas óngerdeil is gewaore van dit fieës in oos dörp. `ne Leedjesaovend is beveurbeeldj nag noeats vanne gróndj gekómme. Veurdet La Bamba van après-skimeziek is euvergestap nao vestelaovesmeziek moste veer `t doon mit Bèsten Tied van Cor en Maan, ''Mofert'' van The Sjrot en hie en dao nag get leedjes van róndj 1990 waat door Joekskapel Eine Ôngerein zeen opgenomme. De lèste jaore is me in Mofert toch weer get mieë bezig mit `t sjrieve van vastelaovesleedjes. Veer höbbe veur uch alle vastelaovesleedjes van dit sezoen waat min of mieë get mit Mofert te maken höbbe.
La Bamba
Vastelaoesduo La Bamba haet in december al twieë nuuj leedjes oetgebrach. Óm te beginne ''Limburgse nachte'', wovan ze de clip bie kefee Bószich in Pötbrook höbben opgenómme. Op zich waal `n aardig melodieke, mer dae is neet door Ron van Jo van Seef zelf bedach.
Ze höbbe veur dit sezoen ouch `n inzending gedaon veur `t LVK. Dit kieër haet Ron `ne ballad bie-ein gecomponeerd, mer deze is neet wiejer es de veurrunjes gekómme. Mesjiens is die stöm van Ron toch mieë geëingendj veur `ne fieësnómmer.
Nieks verlaore
Wie aljaors haet Nieks Verlaore weer `ne prinsesjlager opgenómme mit es titel (min of mieë de spreuk van Prins Roger I): ''Noe Branj mer los''. Es meziek höbbe ze gekaoze veur `t lich controversieel leedje ''Layla'' van DJ Robin. Doe waans dich gans bie de Ballerman 6 zoea. Waal apaart det de men van Nieks Verlaore nauwelik ruchbaarheid höbbe gegaeve ane release terwiel de clip toch al `n waek op YouTube steit.
Update: Nieks Verlaore haet `n waek geleje onnag `nen angere sjlager op YouTube gezat. Geine prinsesjlager, mer `nen aad prinsesjlager. Ouch nörges nieks van gelaezen oppe socials. Nieks Verlaore haet mesjiens `n bietje PR nuuedig. Nou, bie deze dan PR van Mofert.nl gratis en veur nieks.
Moferter Uulkes
Ouch de Moferter Uulkes höbbe dit jaor weer `ne sjlager opgenómme. Oppe meziek van ''Dit is Vastelaovendj'' van B.I.N.K. haet Roger vanne Feller `n teks gesjreve veur de jeugraod van Mofert. Mer waat d'n titel vanne nómmer is? Gein idee. De clip begintj mitte spreuk van `t jeugprinsepaar in beeldj. Mesjiens is det `n teike det det ouch d'n titel van `t leedje is. De Facebook-behieërder vanne Moferter Uulkes haw get mieë contex kónne gaeve. Mit huuerbaar enthousiasme höbben `t prinsepaar en de adjudante braaf de tekste ingezónge mit `ne timing, dao kan Rotsjo nag `n puntje aan zuge. Bie `t twieëdje couplet hölp Wild Maurice (veurhaer van Rock-It en Moereflaai) nag `n bietje mit.
Update:Nao aanleiding van ozen tip is d'r oppe Facebook-post de nuuedige extra informatie gezat. D'n titel vanne Moferter Uulkessjlager is ''Dit is Uulkes Vastelaovendj''.
Zenger Rotsjo
Euver timing en geveul veur ritme gespraoke: gebäörtig Moferter Zenger Rosjo haet ouch weer `ne vastelaovessjlger oetgebrach. Rotsjo is dit jaor de reggae in gedaoke mitte meziek van "Red Red Wine" inne versie van UB40. Speciaal veur `t sjoonste fieës van `t jaor ómgeduip toet ''Polonais''.Sjöp en Sjoop
De hoes-DJ's van CV ''Nooit Genóg'', Sjöp en Sjoop, höbbe net wie de lèste twieë jaor `nen eige nómmer ineingemix. Mitten titel ''Kal plat mit mich'' doon zie `n poging óm de vernederlandsing van Limburg taenge te gaon. Good bezig!Update: Björn van Berkel
Huh, mer dae haet toch gaar nieks mit Mofert te make?
Klop. De oetveurend arties neet, mer de sjriever waal. Teks en meziek van ''Als mâr Gekker!'' kump oete pen van Martijn de Jong. Dae Jóng (ouch waal bekindj en Mr. Plopkap) moog dan waal zelf ouch `ne ''''Grevorster'''' zeen, mer woontj al gerumen tied in Mofert, vriejt al diek 11 jaor mit `n Moferse en is vader van twieë Moferter maedjes.