Jo van Seef gestop mit spele
De lèste Romona is neet mieë. RIP
Jo van Seef (Roemen) is aafgeloupe dinsdig heim in Mofert gestorve. Det haet de femielje vandaag bekindj gemaak. Jo is in 2020 al ernstig krank gewaes en waas begin 2021 oetbehanjeld heives gesjik. Wie `n wónjer herpakdje hae zich en is nag `n paar jaor ónger ós gewaes, toet aafgeloupe dinsdig. Inne tössentied haet `t L1-televisieprogramma Óngerwaeg nag twieë aafleveringe mit Jo gedrejdj en oetgezónje (binjend truukkiekadvies; filmkes gans óngeraan dit artikel). Die paar extra jaor waat Slivvenhieër `m gegaeven haet, haet zoon Ron (van La Bamba) de gelaegenheid gegaeven óm nag `n duet mit zie vader op te naeme. `t Bekindjste leedje van Roemens orkes De Romona's, ''Mien aajers hoes'' is op die meneer in september 2021 nans oetgebrach.
Jo waas ouch bie `t fluit- en trómmelkorps `ne veuraanstäöndje figuur. Jaore is hae veurzitter gewaes van Excelcior. Veur de leje van `t korps waas Jo van Seef dan ouch bekindj es ''Ome Jo''.
Roemen is wie boete Mofert veural bekindj es zenger en toetsenis van De Romona's. Ieës same mit zien aadste broor Pierre zaliger en later mit zien jóngste broor Martin (Matje van Seef) zaliger. Daomit is Jo ós noe es lèste Romona ontvalle. De Romona's waeren in `n artikel op 1Limburg gepreze vanwaege häöre twieëstömmige samezang.
Jo van Seef is 83 jaor gewaore.
Waarsjienlik ein van zien lèste optraejes
