Limburgse VastelaovesleedjesKal: de top 11 van 2024
Net oppertied veur de finale.
Hie is d'r weer: de jaorlikse vastelaoves-top-11 van Pater Noster. De lekkerste vastelaovesmeziek veur dit sezoen. Dit jaor gaon veer `ns neet van 1 nao 11, mer tèlle veer aaf van èlf nao de nómmer ein, net wie me det vreuger deej bie de top 40. Veer beginne dus mit de leedjes die oppe reservebank zote.
Op nómmer èlf (waat op zich al `ne ieër is), steit dit jaor ein leedje waat neet is doorgedrónge toet de finale van `t LVK: ''Ooit'' van Ivana. Aafkómstig oete stal van Limbo Music, is `t neet verwónjerlik det zoeawaal de teks es de meziek door Dwayne Horbag is gesjreve. `t Thema is lang neet uniek, mer deze is d'r eine waat zich nag waal `ns kan opwèrkte toet de top-10 inne Limburgse oetvaartbranche. Ich höb oet ieëste handj gehuuerdj det deze noe al gedrejd is gewaore op `n crematie. Inne meziekwerreld is det `n k mpliment.
Op tieën: Men in Pek mit ''Ich vastelaovendj''. Op meziek van Job van Hoof haet dichter-performer Quirien van Haelen weer `n poëtisch stökske teks gemaak. `t Wirkwaord 'carnavalle' waas al algemein bekindj en is oeats door Jacky en Fabrizio oppe kaart gezat. Van Haelen haet noe van 'vastelaovendj' `n wirkwaord gemaak. Det zorg veur interessante verveuginge wie "dich vastelaovendjs" en "wae vastelaovendje". Toet noe toe höbbe veer allein mer de verveuginge veur hujigen tied gehuuerdj. Mesjiens det d'r nao de vastelaovendj nag `n teks kan sjrieve mit de vergangen tied. "Ich vastelaovendje, dich vastelaovendjes, wae höbbe gevastelaovendj." Of zoeaget.
Gezak van 5 nao 9: Maud du Chatinier, dit jaor mit ''Ès de lempkes Zjweije''. Teks en meziek is van broor en zus Koonings van Pruuf Mâr.
Andy en Roy zeen de flotste zakkers waat waal nag binne de top 11 zeen gebleve: van nómmer 2 gezak nao 8. Dit jaor mitten titel ''Made in Limburg''. Aan de sjievers haet `t neet gelaege, mit Bas Keltjens es tekssjiever en Mark van Mullekom es componis. De kènners weite det deze samest lling mie veljige LVK-winnieër is.
De Mestreechse parodis John Tana steit op 7 mit de nuje release ''De Kantine''. De zelfgesjeve teks is gemaak op `n aanstaekelik Frans leedje van Partrick Sébastien: ''Les Sardine''. Good gekaoze, want deze blief dich inne kop zitte.
Dan op 6, oetkómmendj veur Vènlo, mer gezónge in zoeawaal Vènloos es Mestreechs: Spass Partout mit ''Vastelaovend is los!''. `t Duo besteit oet Mestreechteneer Maarten Baar en Vènlose Karen van Hoften. Jerôme Lenders haet veur dit leedje de nuuetjes oppe belk geteikendj. De teks is van Sheba van Mil-Krans (Mestreech) en Thijs van Hoften (Vènlo).
De nómmers waere wie langer wie klinder en de hits waere wie langer wie grotter. Zoea vinje veer op 5 de winnieër van CMC Alaif. `t Is nag mer de vraog of ze desnaovendj zin höbben óm te gaon, mer mesjiens doon ze d'r nag eine dan. Van Lieshout en Arts mit ''Ik wooj nie gaon''. De teks kump oete pen van ein hèlf van `t duo: Rob van Lieshout. De meziek is gemaak door Roel Gommans en Jules Reivers van Line29. Dit producersduo waas ouch verantjwaordelik veur de megasuccesse van Björn en Mieke. Nou ja, eigelik make zie 90% vanne vastelaovesmeziek waat oet Vènraoj kump. Van Lieshout en Arts is geinen ''''oetveurend arties'''', nae dit is `ne act. Óm dae raeje zeker `ne kanshöbber op `t LVK.
Stevig gevestig op dees lies is Spik en Span. Dit kieër op nómmer 4 mit ''Vastenach!''. `t Duo, besäöndje oet Jo Huijnen en Niek Dirkx haet zelf de meziek gesjreve en de teks kump van Jos Wackers en Niek. Det is `ne succesvolle samestèlling waat al sins `t succes van Blieve in 2018 `tzelfde is gebleve.
Dan kómme veer bie de top 3 van dit jaor, te beginne mit Sjpringlaevend. Dwayne haet zelf de meziek gecomponeerd. D'n titel verraojt al flot de tekssjiever. Die waord-aanein-rijgselkes zeen al jaore `t unique selling point van tekssjriever Bas Keltjens.
De spanning stieg. Op twieë `n hieërlik leedje van Rempetemp: ''Heerlik!''. Oppe Moferter Aovendj waas dees Awstraose formatie ouch al succesvol. Eine van `t trio, Roger Pisters, teikendje veur de meziek en veur de teks, same mit Julie Notermans.
En dan... op nómmer éín en daomit de topper vanne Pater Noster vastelaoves-top-11. Sjpaslegioen van de Aelsese formatie Wild Vleisj. De meziek is gemaak door Jos ''''Wir sind spitze'''' Gijzen en Niels Lemmens. De teks en `t idee kump ouch oet `t brein van ''''Prinses Gertie'''' Niels Lemmens. De clip is ouch waal lollig.
En hie-ónger nag effe de speellies.