Dylano vanne K.: ''Ik weet niet wat me bezielde.''

Ja, det vraoge veer ós ouch aaf, Dyl.

Dylano vanne K. (Bron: De Telegraaf; © Aloys Oosterwijk)

PSV-veldjbestormer en notoire keepermepper Dylano vanne K. mos zich desmorge verantjwaorde veur de pliesierechter in Den Bosch veur `n stevig gesprek. Behalve det Vanne K. toeguuef det `t dóm waas waat d'r haw gedaon en det d'r superveel spijt haet, trèk d'r ouch de onnuuezelekaart. Hae wis ja neet waat `m bezielde en kós zich onnimmieë precies herinnere wie en waat. `n Good geweite door `n slech geheuge dus; dao kóns se in dit landj Minister-President mit waere, mer alleh. Euver `t motief duit de keepermepper zelf `n beukske aop: Ik wilde alleen laten zien dat ik er weer was. Achteraf op een foute manier, citeert De Telegraaf. Ja jao, achteraaf kalle is altied mekkelik, wor. Mer veer zeen `t gans mit `m èns det dit de verkieëerdje meneer is óm te laote zeen des se d'r weer bös. Hae haw ouch `t T-shirt euver ziene kop kónne doon en zoea `n ieërerundje euver `t zèstieënmaetergebied kónne make. Of gewuuen ajerwits streake. Mer es se örges neet moogs zeen, dan is `t mesjiens verstenjiger óm gaar neet te laote zeen des se d'r weer bös. Merja, 1,6 promille duit get mit `ne miens.

Reclassering

Ómdet Vanne K. al dökker veroeardeildj is veur voetbalgerelateerde akkefietjes moch de reclassering ouch get sjrieve: Hij komt uit een liefdevol, stabiel gezin (det geer `t effe weit, red.) en heeft tot op heden geen moeite gehad om werk te vinden (lang laeven `t personeelstekort, red.). De officier van justitie zoog dao-in gein verzaachtende ómstenjighede en eiste drie maondj bajes, wovan eine veurwaerdelik. Daobie waerdje nag `n gebiedsverbod van twieë jaor geëist (veur waat `t waerd is).

Gein spraoke van mishanjeling?

Advekaot (en rechshangende befkesdraeger) Paul Saris mèntj det d'r juridisch gein spraoke waas van mishanjeling: Er blijkt niets van letsel, pijn of ander ongenoegen. Uit bewijs blijkt ook niet dat de cliënt een rake stomp heeft uitgedeeld.. Volges Saris lèk `t uiteraard allemaol genuanceerder en haolt oet `t reclasseringsrapport aan det d'r spraoke waas van bewiesdrang, groepsdrök en euvermaotig alcoholmisbroek. Hae vindj det de straof daoróm lieëger mot.

Deze waas dus neet raak volges advekaot Paul Saris; tied veur `n brilke mesjiens veur de Èndjhaovense straofpleiter. (© ANP).

Twieë maondj brómme

De rechter ging aevel mit in de eis vanne OvJ. Hae zuutj wáál wèttig en euvertuugd bewies veur mishanjeling (lang laeve `t ANP) en noom daoróm de straofeis euver. Hae heel daobie ouch raekening mitte impact oppe maotsjappie. Det wuuertj dus twieë maondj brómme, wovan al `n paar waeke zeen voldaon. Dylano vanne K. kan noe nag óngerhalve maondj gaon kaarte mit Danny S. Doe kóns `t slechter treffe.

Wèrkloeas

Aoh jao: volges de TeleLimburger (hie achter betaalmoer) haet de wèrkgaever van Dylano `m zónger pardon op straot gezat. Wie zègke ze det ouch alweer: De een zijn stoot is de ander zijn brood?