PSV-veldjbestormer is Dylano vanne K.

Wo zou d'r det toch van höbbe?

De PSV-supporter waat gister in `t Philipsstadion `t veldj op kwoom óm de Sevilla-keeper te lief te gaon is volgens GeenStijl Dylano Kempkens. Ieëre vandaag waerdje al inne media bekindj det `t óm `ne 20-jäörige sjab hooligan oet Remunj ging. Integer wie veer zeen, höbbe veer `t natuurlik euver Dylano vanne K.

Waal `n sjiek heupteske. (Bron: GeenStijl)

Gevloerd

Inne slotfase van de wedstried PSV-Sevilla gister in Indjhaove, kwoom `ne PSV-hooligan `t veldj op en belaogdje dao de keeper van Sevilla. Det waas weinig succesvol, want nao `ne bezaope oethaol van de PSV-fan mit links waerdje d'r rücksichtslos gevloerd door de Sevilla-doelman. Vervolges kwome `n paar stewards aangetreuzeld óm de belaoger van `t veldj aaf te veure. Nao `n kort gesprek tösse de deensdoondje arbiter en dae keeper waerdje beslaoten óm de pot waal aaf te make.

Straofblaad

Dylano vanne K. haet volges 1Limburg gein VOG-waerdig straofblaad. `t Aopenbaar Ministere Oeas-Braobantj meldj det Vanne K. in 2021 en in 2022 al `n taakstraof kreeg. Daobie haw hae al `n stadionverbod en `n gebiedsverbod oppe tes. Bliekbaar laek de handjhaving daovan wie `n manj. Neet ech gooj reklaam veur Brainport. Doe vruuegs dich toch aaf of Chinese spionne ouch zoea gemekkelik bie ASML binne kómme. Clubdirecteur Marcel Brands geit in eder geval de betrokke instanties in gesprek euver wie ze det stadionverbod baeter kónne handjhave.

Goonsdig 8 mieërt mot Dylano zich veur de pliesierechter verantjwaorde. D'r wuuertj `m mishanjaling en euvertraejing van `t gebiedsverbod te laste gelag. Det zal waal `n stevig gesprek waere.

Jenkverhaol

Inmiddels kump d'n advekaot van de ajers van Dylano van mit `n oetgebrèdj jenkverhaol inne TeleLimburger (hie achter betaalmoer). De ajers zoue hele nare berichten höbbe gekrege. Waat de strekking van die berichte is, dao ging daen advekaot Paul Saris wiejer neet op in, behalve det `t niet los te zien is van de bijna opruiende teksten van de directeur van PSV. `t Waas bliekbaar neet zoea leef van Brands, det hae ouch `n meining haet, namelik det deze kaerel `n laeveslang stadionverbod mot kriege. Volges Saris wuuertj alles vanoet ein standjpunt d'n ether in gegoeadj en verdwient daodoor de nuance.

Nuance

Nou. Speciaal veur Paul Saris. Hie kump d'r dan. De nuance:
Dylano haw volges `t OM `n promilaasj van 1,6.

Update: Facebookpagina van Dylano is noe offline. Meugelik is d'r `n verbandj mit `t gegaeve det GeenStijl `n linkse haw geplaats.