Mofert.nl

Donderdig 27 juli 2017

Feeds en gadgets

Waat zeen feeds

`ne Webfeed is e bestandj, waat op internet steit mit dao-in de verkorte versie van berichte waat op `n site staon. Det klink allemaol hieël ingewikkeld, meh det is `t neet. De Mofert.nl nuutsfeed is e veurbeeldj van zónne webfeed. Dao-in staon alle actuele nuutsberichte van Mofert.nl in `n verkorte versie, mit `ne link nao `t ganse berich.

Waat kóns se mit `ne webfeed?

`ne Feed kóns se mit `ne webfeedlaezer bekieke. `t Veurdeil daovan is, det se geliek kóns zeen wèlke berichte d'r op det moment op `n site staon, zónger det se de ganse site hoofs te äöpene. Allewiel höbbe de moderne browsers - zoeawie Firefox en de nuutste versie van Internet Explorer - ingeboewdje feedlaezers. Ouch kóns se noe feeds op dien Google startpagina zètte.

Wie herkèn ich `ne webfeed?

Es d'r veur `n bepaolde site `ne webfeed besjikbaar is, dan zal det meistal op die site vermeldj staon. D'r zeen versjillende name veur, zoeawie feed, RSS, RSS feed of Atom. Döks wuuertj ouch mit `n symbool aangegaeve, det d'r `ne webfeed oppe site steit beveurbeeldj mit `t RSS-symbool of `t XML-symbool. Allewiel wuurtj al mieër dit Webfeed symbool gebroek. Es se op zón symbool of op zónne link kliks, dan kries se meistal de webfeed zelf in dien browservinster te zeen. Dao kóns se dus neet zoea väöl mit. Waal kóns se dan innen adresbalk de URL vanne feed zeen. Dae kóns se dich dan kopiëre en in diene feedlaezer plekke. Döks wuuertj ouch `ne Add to Google-knoep oppe site gezat. Daomit kóns se hieël simpel de feed op diene Google startpagina zètte.

Waat is `ne gadget?

`ne Gadget is `n henjig vinsterke waat se ouch op dien Google startpagina kóns zètte. Det varieerd van `n klok toet beveurbeeldj `ne bujeradar. Es d'r op `ne bepaolde site `ne gadget steit, dan zal dao ouch meistal `ne Add to Google-knoep op staon, óm de gadget snel en gemekkelik op dien Google startpagina te zètte.

Feeds en gadgets op dien Google startpagina

Doe kóns feeds en gadgets op dien Google startpagina zètte. Via Mofert.nl geit det hieël gemekkelik. Doe kliks gewuuen oppe Add to Google-knoep en de res wies zich vanzelf.

Al `t Moferter nuuts van Mofert.nl kóns se snel bekieke via de Mofert.nl nuutsfeed. Doe kóns hiemit in eine kieër zeen waat `t nuuts op Mofert.nl is, zónger de pagina te äöpene.

Reklaam